Bloomberg paviedamiŭ pra tajemnaje supracoŭnictva Kaśpierskaha z FSB

«Łabaratoryja Kaśpierskaha» padtrymlivaje kudy bolš ciesnyja suviazi z rasijskimi śpiecsłužbami, čym raspaviadaje pra heta, paviedamlaje ahienctva Bloomberg sa spasyłkaj na elektronnuju pierapisku Jaŭhiena Kaśpierskaha, što akazałasia ŭ jaho rasparadžeńni.

Pavialičyć

Pavodle danych Bloomberg, u listach, adrasavanych vysokapastaŭlenym supracoŭnikam «Łabaratoryi Kaśpierskaha», hiendyrektar kampanii apisvaje prajekt, realizacyja jakoha była pačataja ŭpotaj «pa vialikaj prośbie Łubianki». Siarod mier, jakija prymajucca dla abarony klijentaŭ, u tym liku ŭradavych struktur, ad napadaŭ chakieraŭ, u pierapiscy zhadvajucca i tak zvanyja «aktyŭnyja kontrmiery», pra jakija Kaśpierski rekamienduje svaim mieniedžaram maŭčać, piša RBK.

Zvyčajna, kažučy pra «aktyŭnyja kontrmiery», zmahary z kibierzłačynnaściu majuć na ŭvazie ataki na kampjutary samich chakieraŭ, tłumačyć Bloomberg. Adnak u dadzienym vypadku havorka idzie pra bolšaje.

Krynica Bloomberg, znajomaja z raspracavanaj «Łabaratoryjaj Kaśpierskaha» sistemaj abarony ad DDOS-napadaŭ, rastłumačyła, što taja nie tolki pieranakiroŭvaje «škodny trafik» na sierviery, zdolnyja biez škody dla siabie «pieravaryć» jaho, ale i ŭ režymie realnaha času pieradaje FSB danyja pra miescaznachodžańnie atakujučych. Paśla hetaha ekśpierty antyvirusnaj kampanii sumiesna z palicyjaj i supracoŭnikami FSB vyjazdžali na zachop chakieraŭ.

«Jany nie prosta ŭzłomvali [kampjutary] chakieraŭ, jany łamali dźviery», — tłumačyć Bloomberg.

Krynicy ahienctva paviedamili, što adnym z udzielnikaŭ takich rejdaŭ byŭ kiraŭnik adździeła rasśledavańnia kampjutarnych incydentaŭ «Łabaratoryi Kaśpierskaha» Rusłan Stajanaŭ, aryštavany ŭ śniežni 2016 hoda ŭ ramkach rasśledavańnia spravy ab dziaržaŭnaj zdradzie.

Kiraŭnikom ža prajekta ŭ cełym nibyta vystupaŭ kiraŭnik jurydyčnaj słužby «Łabaratoryi Kaśpierskaha», były aficer KDB Ihar Čakunoŭ. Pavodle danych krynic Bloomberg, jon źjaŭlajecca hałoŭnym śpiecyjalistam pa techničnaj padtrymcy, jakaja akazvajecca FSB i inšym śpiecsłužbam.

U pres-słužbie «Łabaratoryi Kaśpierskaha» zajavili, što ŭ kampanii «niama i nie było nieetyčnych suviaziaŭ ci palityčnych pieravah nivodnamu ŭradu, uklučajučy rasijski».

«Da nas nikoli nie prychodziŭ aficyjny zapyt ad FSB ci inšych uradavych orhanaŭ Rasii z prapanovaj stvaryć abo ŭziać udzieł u prajekcie pa abaronie ad DDoS-napadaŭ», — havorycca ŭ adkazie kampanii.

«Udzielničajučy ŭ aficyjnych rasśledavańniach kibierzłačynstvaŭ u Rasii, my ŭ adpaviednaści z rasijskim zakanadaŭstvam pravodzim tolki techničnuju ekśpiertyzu», — adznačyli ŭ kampanii.

U pres-słužbie paviedamili, što ŭ pieryjad 2005-2010 hh. «Łabaratoryja Kaśpierskaha» pracavała nad tym, kab prapanavać rynku anty-DDoS pradukt. «Rasijski orhan pa baraćbie z kibierzłačynstvami kampanii paviedamiŭ, što, na ich dumku, DDoS-ataki ŭjaŭlajuć ź siabie surjoznuju pahrozu, jakaja aktyŭna raźvivajecca. I pakolki na rynku isnavała patreba ŭ abaronie ad DDoS, «Łabaratoryja Kaśpierskaha» inviestavała ŭ raspracoŭku adpaviednaha rašeńnia», — dadali ŭ kampanii.

U červieni 2017 hoda kamitet pa ŭzbrojenych siłach sienata ZŠA prapanavaŭ zabaranić ustaloŭvać pradukty «Łabaratoryi Kaśpierskaha» na kampjutarach Ministerstva abarony. Inicyjatar uviadzieńnia zabarony sienatar-demakrat Džyn Šachin patłumačyŭ jaho nieabchodnaść «najaŭnaściu suviaziaŭ «Łabaratoryi Kaśpierskaha» z Kramlom», jakaja «vyklikaje vielmi vialikuju tryvohu». Pa słovach Šachina, praduktam Kaśpierskaha «nielha davieryć abaronu krytyčnych vuzłoŭ infrastruktury, u asablivaści kampjutarnych sistem, žyćciova važnych dla zabieśpiačeńnia nacyjanalnaj biaśpieki».

Tady ž telekanał NBC paviedamiŭ, što bolš za dziesiać amierykanskich supracoŭnikaŭ «Łabaratoryi Kaśpierskaha» byli dapytanyja ahientami FBR, jakich, u pryvatnaści, cikaviła, nakolki padrabiazna ofisy ŭ ZŠA dajuć spravazdaču pierad hałaŭnym ofisam ŭ Maskvie. Spasyłajučysia na mierkavańnie supracoŭnikaŭ amierykanskich vyviedsłužbaŭ, NBC pakazaŭ, što Jaŭhien Kaśpierski «maje ciesnyja suviazi ź niekatorymi asobami ŭ vyviedcy Rasii».

• 0
• 0
• 0
• 0
• 0
• 0
• 0
• 0