Łukašenka źniaŭ skandalna viadomaha staršyniu Aršanskaha rajvykankama

Kiraŭnik Biełarusi Alaksandr Łukašenka 7 žniŭnia pravioŭ novyja kadravyja pryznačeńni. U pryvatnaści, novaha kiraŭnika atrymaŭ Aršanski rajvykankam.

Pavialičyć

Pasady pazbaviŭsia Leanid Piańkoŭski, jaki ŭstupiŭ na pasadu ŭsiaho tolki 12 maja, to bok jon prabyŭ u kreśle mienš za try miesiacy.

Užo praź dziesiać dzion paśla pryznačeńnia proźvišča Piańkoŭskaha zahučała na nacyjanalnym uzroŭni. Alaksandr Łukašenka 22 maja, prymajučy staršyniu Śledčaha kamiteta Ivana Naskieviča, skazaŭ: «Chto daŭ prava da čałavieka, uzhodnienaha da pryznačeńnia prezidentam, uryvacca ŭ dom? Bo dla taho, kab pravaachoŭnym orhanam navat vieści niejkija rasśledavańni pa čałavieku, jaki ŭvachodzić u kadravy rejestr prezidenta, treba zhoda prezidenta. Uvarvalisia, pačali niešta ŭdakładniać, — aburyŭsia Łukašenka. — Novy čałaviek pryjšoŭ pracavać. Taŭro na im pastavili. Niadobry sihnał».

Potym vyśvietliłasia, što ŭvarvańnie ŭ dom staršyni Aršanskaha rajvykankama pravodzili supracoŭniki MUS, bo čynoŭnik nie źjaŭlaŭsia na pracu.

Piańkoŭski naradziŭsia ŭ 1968 hodzie ŭ vioscy Baŭsievičy Kruhlanskaha rajona Mahiloŭskaj vobłaści. U 1993 hodzie skončyŭ Viciebski vieterynarny instytut pa śpiecyjalnaści «Zaatechnija», u 2003 hodzie — Akademiju kiravańnia. Doŭhi čas pracavaŭ staršynioj kałhasa na Aršanščynie. U 2005—2008 byŭ pieršym namieśnikam staršyni Haradockaha rajvykankama. U 2008—2017 uznačalvaŭ Biešankovicki rajvykankam.

Novym kiraŭnikom Aršanskaha rajvykankama staŭ Alaksandr Paźniak, da hetaha času jon zajmaŭ pasadu pamočnika prezidenta pa Viciebskaj vobłaści, a jašče raniej uznačalvaŭ Saviecki rajon Minska.

Orša i Aršanski rajon byli abvieščanyja Alaksandram Łukašenkam stratehična važnym rehijonam, na dobraŭparadkavańnie hetaha rehijona buduć kinutyja vialikija dziaržaŭnyja vysiłki i srodki.

Novaha staršyniu taksama atrymaŭ Salihorski rajvykankam. Im staŭ Aleh Paskrobka, jaki raniej zajmaŭ pasadu pieršaha namieśnika ministra žyllova-kamunalnaj haspadarki. Papiaredni staršynia rajvykankama Alaksandr Rymašeŭski byŭ zatrymany ŭ červieni paśla atrymańnia chabara ŭ pamiery 2700 dalaraŭ.

• 0
• 0
• 0
• 0
• 0
• 0
• 0
• 0