Syn — dyrektar pradpryjemstva, brat — načalnik tulskaj palicyi: piać faktaŭ pra novaha ministra pryrody
14 vieraśnia Alaksandr Łukašenka pryznačyŭ novaha ministra achovy pryrodnych resursaŭ. Im staŭ namieśnik kiraŭnika spravami prezidenta Andrej Chudyk. Papiaredni ministr Andrej Kaŭchuta trapiŭ u karupcyjny skandał.
«Naša Niva» sabrała najbolš cikavyja fakty pra top-čynoŭnika.
Naradziŭsia va Ukrainie, pracavaŭ u kałhasie
Andreju Chudyku 58 hadoŭ. Jon naradziŭsia ŭ 1959 hodzie ŭ vioscy Astraŭčanie Kamianiec-Padolskaha rajona Chmialnickaj vobłaści. Słužyŭ u vojsku.
Jak akazaŭsia ŭ Biełarusi? Zakachaŭsia ŭ miascovuju dziaŭčynu, tamu i pierajechaŭ. Pačaŭ pracavać u śfiery sielskaj haspadarki.
Admietna, što Andrej Chudyk zusim nie vučyŭsia ŭ Biełarusi. Abiedźvie svaje adukacyi jon atrymaŭ u Rasii. Spačatku skončyŭ Leninhradski sielskahaspadarčy instytut (1987), a paśla — Rasijskuju akademiju dziaržaŭnaj słužby pry prezidencie Rasii (2006). Chacia na toj čas biełaruskaja Akademija kiravańnia taksama poŭnym chodam štampavała vypusknikoŭ.
Na praciahu 11 hadoŭ Chudyk uznačalvaŭ kałhas imia Kirava ŭ Iŭjeŭskim rajonie. Paśla jaho pamatała pa krainie — Brasłaŭ, Vaŭkavysk. Urešcie ŭ 2002 jon staŭ staršynioj Dziatłaŭskaha rajvykankama. Jašče praź niejki čas uznačaliŭ Lidski. Kali pracavaŭ u Lidzie, to ŭ narodzie chadziła šmat čutak pra Chudyka.
Davier kiraŭnictva krainy jon zavajavaŭ paśla taho, jak uzorna pravioŭ u horadzie respublikanskija «Dažynki»-2010.
Sprava za abrazu honaru
U 2011 hodzie Andrej Chudyk źviarnuŭsia ŭ Lidski rajonny sud pa spravie abrazy honaru i hodnaści. Sprava ŭ tym, što karystalnik Ukantakcie Jaŭhien Kucko pad uražańniem ad prezidenckich vybaraŭ — 2010 raźmiaściŭ na svajoj staroncy apaviadańnie «Kłopat pra čałavieka — pryjarytet majoj pracy», siarod hałoŭnych piersanažaŭ jakoha byŭ Chudyk. Kucko byŭ uražany intervju Chudyka ab tym, kolki jamu važnych spravaŭ davodzicca vyrašać štodnia, jakija pytańni razhladać. Apaviadańnie było napisanaje ŭ absurdnaj maniery.
Tvor skančvaŭsia frazaj: «Chudyk uratuje śviet!». Chudyk znajšoŭ apaviadańnie, kali ŭžo pracavaŭ namieśnikam staršyni Hrodzienskaha abłvykankama. U vyniku Kucko zvolnili, jon pracavaŭ na dziaržaŭnaj pasadzie — u adździele statystyki.
Spačatku sprava kvalifikavałasia jak kryminalnaja. Adnak paśla taho, jak Kucko prynios publičnyja prabačeńni, jaje pierakvalifikavali ŭ administracyjnuju. U vyniku sud prysudziŭ maładomu čałavieku 700 tysiač rubloŭ štrafu — 140 dalaraŭ pa kursie červienia 2011.
Brat — načalnik tulskaj palicyi
Litaralna ŭ červieni pavyšeńnie atrymaŭ i małodšy brat Chudyka — Vasil. Jon staŭ načalnikam upraŭleńnia MUS pa horadzie Tuła. U orhanach unutranych spravaŭ Vasil Chudyk adpracavaŭ bolš za 30 hadoŭ. U 22 hady pajšoŭ pracavać milicyjanieram u rodnym Kamianiec-Padolsku. U 33 — skončyŭ Chabaraŭskuju vyšejšuju škołu MUS Rasii.
Dvaccać try hady Vasil Chudyk adpracavaŭ u Mahadanskaj vobłaści. Paśla hetaha pieravodziŭsia na pracu ŭ Kałuhu i Chakasiju. Vasil Chudyk maje adznaku «Hanarovy supracoŭnik MUS Rasii», a taksama miedal «Za vydatnuju achovu hramadskaha paradku».
Syn — dyrektar «Lidanaftapradukta»
36-hadovy Vadzim Chudyk nie tak daŭno ŭznačaliŭ adkrytaje akcyjaniernaje tavarystva «Lidanaftapradukt». Da hetaha jon byŭ načalnikam učastka AZS №5 upraŭleńnia razdrobnych prodažaŭ «Hazpramnafta-Biełnaftapradukt».
Žonka Vadzima Chudyka Viktoryja šmat piša pra siamiejnaje žyćcio ŭ sacyjalnych sietkach. U pary dvoje synoŭ — Nazar i Matviej. Ciapier žyvuć u Lidzie na zdymnaj kvatery. Pa słovach žonki, kab zarabić na žyllo ŭ Hrodnie, jaje muž paŭtara hoda pracavaŭ u Šviejcaryi.
Pry hetym sama Viktoryja nie asabliva chavaje, što baćka dapamahaŭ mužu z pracaŭładkavańniem: «Skažycie, a chiba drenna, kali baćki dapamahajuć svaim dzieciam? Mnie zdajecca, tak i pavinna być. Tak i adbyłosia, kali baćka dapamoh majmu mužu ź jaho pieršaj pracaj u śfiery, u jakoj jon pracuje ciapier. Muž pry hetym prajšoŭ usie prystupki leśvički sam. I dziakujučy pracavitaści, ruplivaści, prafiesijnym i čałaviečym jakaściam jon raźvivaŭsia vyšej. Baćka nikoli nie lez u jaho spravy, chiba što dapamahaŭ paradaj».
Praca ŭ Hrodnie, namieśnik u Šejmana
Usiaho tolki kala hoda Andrej Chudyk adpracavaŭ staršynioj Hrodzienskaha harvykankama. «Horad vialiki, za hod ciažka niešta źmianić», — kazaŭ jon.
Adnak kaža, što praca ŭ Hrodnie navučyła jaho: «Nie treba bajacca bracca za realizacyju płanaŭ, jakija spačatku zdajucca niazbytnymi. Ideja pavinna paśpieć, kab ŭsprymacca całkam realistyčnaj i realizavacca. A praź niekatory čas zdajecca: jak my raniej biez hetaha žyli?»
U 2014 Chudyka pieraviali ŭ Kiraŭnictva spravami prezidenta, dzie jon byŭ namieśnikam u Viktara Šejmana.
Za jakija pytańni adkazvaŭ Chudyk? Achova pryrody, zapaviedniki, zakaźniki, sanatoryi ŭ Biełarusi i za miažoj, haścinicy.
«Jamu pa načach śnilisia ludzi, jakich jon pasadziŭ». Stali viadomyja novyja detali apošnich dzion žyćcia syna Jarmošynaj22
Kamientary