Chronika represij i supracivu za 16–22 traŭnia

Chronika represij i supracivu za 16–22 traŭnia

16 traŭnia: zatrymańni kala rasiejskaha pasolstva

Mienharsud 15 traŭnia pakinuŭ biaź źmienaŭ rašeńnie sudździ Taciany Masalskaj ź Pieršamajskaha sudu, jakaja adchiliła pazoŭ kiraŭnika AHP Anatola Labiedźki da Nacyjanalnaj teleradyjokampanii z nahody abrazy jahonaha honaru j hodnaści ŭ filmie «Teoryja zmovy».

Kiraŭnik śledčaha adździełu pa asabliva važnych spravach prakuratury Miensku Siarhiej Ivanoŭ paviedamiŭ, što śledztva ŭ spravie pra zabojstva žurnalistki Vieraniki Čarkasavaj prypynienaje jašče 14 sakavika. Svajakam pra spynieńnie spravy nie paviedamlali.

Ciahnik «Horadnia–Kuźnica», jakim jechaŭ u Polšču na praces «Nivy» Alaksandar Milinkievič i jahony pres-sakratar Pavał Mažejka, na 15 chvilinaŭ byŭ zapynieny na miažy: pamiežniki doŭha praviarali ich asabistyja rečy j z kimści railisia.

U Miensku na akcyi Dzień salidarnaści kala rasiejskaha pasolstva zatrymanyja Andrej Zorka, Michaś Naskoŭ, Luda Atakułava, Alaksandar Kurbacki, Mikita Šyciankoŭ, Kaciaryna Dziatkoŭskaja, Nasta Šaškova, Źmicier Kniha, Źmicier Kumišča, Andrej Preśnik, Pavał Žurpał, Alaksandar Ściepanienka, Mikałaj Siarhiejenka, Maksim Hryčucha, Ira Jankielevič, Alaksandar Korban, Barysievič, A. Dareŭski.

17 traŭnia: try miesiacy turmy Radziviłu

Krupski rajsud skončyŭ razhlad spravy Alesia Puškina: materyjały viarnuli ŭ milicyju – praź niedachopy ŭ raśśledavańni. Puškina vinavacili ŭ tym, što nibyta jon abliŭ farbaj pomnik operupaŭnavažanamu adździełu kontravyviedki ŚMIERŠ Vasilu Čabatarovu, Hieroju Savieckaha Sajuzu.

Prakuratura Miensku aficyjna papiaredziła žurnalistku Irynu Chalip za šerah publikacyjaŭ u rasiejskaj «Novoj hazietie», pryśviečanych palityčnaj sytuacyi ŭ Biełarusi: prykmiety parušeńnia zakanadaŭstva (dyskredytacyja Biełarusi j paklop na prezydenta Biełarusi) prakuratura znajšła praktyčna ŭva ŭsich artykułach.

U Žodzinie rabotniki prakuratury pačali telefanavańniami vyklikać moładzievych aktyvistaŭ na dopyty. Śledčyja cikavilisia datyčnaściu aktyvistaŭ ad niezarehistravanaha «Maładoha frontu», faktam znajomstva z kiraŭnikami arhanizacyi Paŭłam Sieviaryncam, Źmitrom Daškievičam. Śpis asobaŭ, jakich treba apytać u hetaj spravie ŭ Žodzinie, pryjšoŭ ź Miensku: u śpisie 9 imionaŭ moładzievych aktyvistaŭ.

Dacent katedry słavianskaj historyi j metadalohii histaryčnaj navuki Jury Bačyšča, zvolnieny z BDPU, pačaŭ praces suprać navučalnaj ustanovy, abskardžvajučy zvalnieńnie. Bačyšču vyhnali z BDPU paśla taho, jak toj byŭ naziralnikam na adnym z vybarčych učastkaŭ na prezydenckich vybarach.

17–18 traŭnia adbyvaŭsia sud nad Jurjem Radziviłam, aktyvistam vybarčaj kampanii Alaksandra Kazulina. 2 sakavika supracoŭnik specsłužbaŭ stralaŭ pa aŭtamabili, u jakim Radzivił adjaždžaŭ ad pastarunku, dzie ŭtrymlivali Kazulina. Paśla padadzienaj Radziviłam u prakuraturu zajavy pra ŭžyvańnie zbroi zatrymali jaho samoha dy źvinavacili, što jon stvaryŭ pahrozu žyćciu rabotniku milicyi. Radziviła asudzili na 3 miesiacy turemnaha aryštu, bolš za dva ź ich jon užo adsiedzieŭ u SIZA. Pierad pačatkam pracesu kala budynku sudu dziažuryli ludzi ŭ cyvilnym, jakija nie padpuskali da budynku žurnalistaŭ, a taksama tych, chto pryjšoŭ padtrymać Radziviła. Zatrymali Juliju Haračku, Anatola Haračku (adpuścili jak niepaŭnaletnich), Kryścinu Šacikavu (2 bazavyja vieličyni štrafu), Alaksieja Stralcova (aryšt na 10 sutak), Paŭła Drazdova, Źmitra Daškieviča i Artura Fińkieviča (pa 15 sutak aryštu). Zatrymanych u aŭtazaku zavieźli ŭ turmu na Akreścina. Drazdovu pry zatrymańni złamali palec. Šacikavu paźniej niekalki razoŭ vazili ŭ bolnicu. Fotažurnalistaŭ, jakija sprabavali zdymać zatrymańnie, pravaachoŭniki bili pa kamerach.

Viarchoŭny sud prypyniŭ na 2 miesiacy dziejnaść apazycyjnaha Leninskaha kamunistyčnaha sajuzu moładzi Biełarusi za adsutnaść juradrasu.

U Salihorsku ŭ spravie «Maładoha frontu» na dopyt u haradzkuju prakuraturu vyklikali moładzievych aktyvistaŭ Ivana Šyłu, Jaŭhiena Miadźviedzieva, Ryhora Astapieniu, Hleba Sandrasa.

Administracyja AAT «Horadnia-Azot» pazbaviła ofisa supołku Biełaruskaha niezaležnaha prafsajuzu na pradpryjemstvie. List na admovu arendy padpisaŭ namieśnik dyrektara pa idealahičnaj rabocie Alaksandar Łapkovič.

18 traŭnia: aštrafany pastar u Povici

Kala Maskoŭskaha sudu zatrymali Irynu Zavadzkuju, jakaja išła na pracesy moładzievych aktyvistaŭ Z.Daškieviča, A.Fińkieviča, K.Šacikavaj i inš.

Illu Radkoviča, pastara niezarehistravanaj Abjadnanaj carkvy chryścijanaŭ viery evanhielskaj u miastečku Pović Kobryńskaha rajonu, aštrafavali na 150 tys.rub. za «ŭchileńnie ad rehistracyi supołki». Pastar zajaviŭ, što nia ličyć nieabchodnym aficyjna rehistravać statut.

Sud Žytkavickaha rajonu Homielščyny admianiŭ pastanovu administracyjnaj kamisii rajvykankamu, pavodle jakoj byŭ aštrafavany hałoŭny redaktar vydańnia «Volnyja naviny» Michaił Kozieł: jaho vinavacili ŭ raspaŭsiudzie drukavanych vydańniaŭ biez vychodnych źviestak.

Homielski abłsud padtrymaŭ rašeńnie Kalinavickaha rajsudu, jaki aštrafavaŭ Kanstancina Kavaleniu, aktyvista kamandy A.Milinkieviča, na 2550 tys.rub., chacia i źmienšyŭ štraf da 1450 tys.rub. Invalid nibyta ździejśniŭ kradziež.

Mahiloŭski sud admoviŭsia zadavolić skarhu Sieržuka Niahacina, jaki apratestoŭvaŭ štraf u 10 b.v., vyniesieny jamu padčas vybaraŭ. Analahičnyja admovy atrymali ŭ Kaściukovickim sudzie Mikałaj Małachaŭ i Ŭładzimier Patapaŭ.

U Viciebsku za «drobnaje chulihanstva» (abraza padčas zatrymańnia) byŭ aštrafavany na 2 b.v moładzievy aktyvist Ściapan Cišucin. Chacia vypadkovy śviedka adznačyŭ, što chłopiec nikoha nie abražaŭ, sudździa Valancina Michasiova zajaviła, što nia maje padstavaŭ dla niedavieru rabotnikam milicyi, jakija pisali pratakoł zatrymańnia.

19 traŭnia: dopyty junakoŭ u Lidzie

U aeraporcie «Miensk-2» ciaham 1 hadziny mytniki nadhladali rečy siabra Palitrady demakratyčnych siłaŭ Viktara Karniajenki, jaki lacieŭ u Kapenhahien na kanferencyju pa Biełarusi.

U Lidzie prakuratura dapytała ŭ spravie «Maładoha frontu» Sieržuka Čajku, Vitala Kałbyku, Jaŭhiena Łapka.

21 traŭnia: chłopiec nia daŭsia

Paśla «Nočy muzejaŭ» milicyjanty zatrymali ŭ pustym dvary Alaksandra Aparyna, jaki mieŭ značak «Za Svabodu». Jaho abvinavacili ŭ niecenzurnaj łajancy, ale padpisvać pratakoł jon admoviŭsia.

22 traŭnia: Aŭtuchovič pierajšoŭ da suchoj haładoŭki

Moładzievy aktyvist Kastuś Usianok, źbity specnazaŭcami padčas šturmu namiotavaha haradku, atrymaŭ ad kiraŭnika PMSN Padabieda piśmovy adkaz na svaju skarhu: milicejski načalnik piša, što fakt źbićcia pravierkaj nie paćvierdziŭsia.

Minjust adklikaŭ svoj pazoŭ na likvidacyju HA «Sajuz biełaruskich piśmieńnikaŭ».

U KDB vyklikali kiraŭnika Bieraściejskaj abłasnoj filii PBNF Jurasia Hubareviča i paprasili davieści da partyjcaŭ, što niamožna parušać art.342 i 369 KK (dziejańni, jakija hruba parušajuć pravy hramadzianaŭ, a taksama dziejańni, jakija dyskredytujuć Biełaruś).

Uładzimier Kacora atrymaŭ adkaz ad prakurora Čyhunačnaha rajonu Homielu, staršaha daradcy justycyi H.Ramaniuka: jon skardziŭsia na chłuślivyja śviedčańni milicyjanta S.Niaznajeva i hramadzianaŭ Śmirnova j Karža, pavodle jakich jaho pasadzili na 15 sutak za «supraciŭ rabotnikam milicyi». Prakuror adkazaŭ, što jany nia mohuć być pryciahnutyja da adkaznaści, bo «zakanadaŭstvam nie praduhledžana papiaredžańnie hramadzianaŭ pra adkaznaść za daču chłuślivych pakazańniaŭ pry razhladzie administracyjnych spravaŭ».

Mikałaj Aŭtuchovič pierajšoŭ da suchoj haładoŭki, patrabujučy źmianić jamu mieru strymańnia z aryštu turemnaha na chatni. Dahetul viazień trymaŭ zvyčajnaje haładavańnie.

AŠ

• 0
• 0
• 0
• 0
• 0
• 0
• 0
• 0