Nia treba bajacca zamiežnych bankaŭ

Zamiežny kapitał u statutnych fondach biełaruskich bankaŭ prysutničaje daŭno: jaho dola z 2000 hoda z 4,5 pracenta ŭzrasła da 22 pracentaŭ u vierasni 2008 h. Ale tolki z prychodam Raiffieisien Bank u Pryjorbank i krychu raniej Hazprambanka ŭ Biełhazprambank možna kazać ab prychodzie ŭ našu krainu surjoznych zamiežnych bankaŭ.

Niekatoryja stali aścierahacca, što kantrol nad važnym bankaŭskim siektaram piarojdzie da inšaziemcaŭ i Biełaruś paŭtoryć los krain Centralnaj i Uschodniaj Jeŭropy (CUJE), u jakich praktyčna nie zastałosia nacyjanalnych bankaŭ. Zaŭvažym, što da hetaha jašče daloka, navat z ulikam ustalavanaha Nacyjanalnym bankam barjeru dla inšaziemcaŭ — nie bolš za 50 pracentaŭ statutnaha fondu.

Zvyčajna ž uličvajuć nie dolu inšaziemcaŭ u akcyjaniernym kapitale, a dolu kantralavanych ich bankami aktyvaŭ. Dyk voś, u nas jana pa-raniejšamu nievialikaja i składaje kala adnoj piataj, heta značyć pakul i na kredytnym, i na depazitnym rynkach daminujuć čatyry dziaržaŭnyja banki: Biełarusbank, Biełahraprambank, Bielinviestbank i BPS-bank.

Zasvojena i dyrektyŭnaje kredytavańnie pad ilhoty abo harantyi dziaržavy. Ale sapraŭdnaha praryvu ŭ inviestycyjnym kredytavanni pa inicyjatyvie bankaŭ pakul nie nastupiła. Jość tolki asobnyja ŭdałyja prajekty pa pryciahnienni zamiežnych, u tym liku i sindycyravanych, kredytaŭ. Nie stali našy banki pakul stvaralnikami masavaha biznesu ŭ małych haradach, ahraharadkach i pa-sapraŭdnamu inavacyjnaha biznesu — niama pakul ni pry adnym z bankaŭ vienčurnych fondaŭ. Nie stali banki inviestycyjnymi kansultantami, abaroncami biznesu. A ŭ rynkavaj ekanomicy mienavita banki pavinny ŭziać na siabie ekanamičnyja funkcyi i abkama partyi, i viertykali ŭłady.

Vielmi nizkaj zastajecca pradukcyjnaść pracy, a takim čynam efiektyŭnaść pracy — realnaja marža z ulikam kamisijnych našmat pieravyšaje tradycyjnyja bankaŭskija 2—3 pracenty, što pavialičvaje realny košt kredytaŭ.

Salidnyja ž zamiežnyja banki pryniasuć novuju jakaść bankaŭskaha absłuhoŭvańnia dziakujučy sučasnym technałohijam i arhanizacyjna-kadravym rašeńniam. U čym heta prajaŭlajecca dla nasielnictva i arhanizacyj?

Pa-pieršaje, uzmacnieńnie žorstkasci kankurencyi pryviadzie da panižeńnia pracentnaj maržy — roznicy pamiž koštam vydadzienych kredytaŭ i pryciahnutych resursaŭ. Inšymi słovami, znižajecca košt kredytaŭ i heta adbyvajecca jašče i tamu, što inšaziemcy majuć dostup da tańniejšych resursaŭ. Da taho ž surjoznyja zachodnija banki nie buduć chitryć z kamisijnymi — jany zanadta kłapociacca ab dziełavoj reputacyi i daduć našym prykład zachavańnia normaŭ zakanadaŭstva i prazrystasci raboty.

Pa-druhoje, zamiežnyja banki stymulujuć pradprymalnickuju aktyŭnaść, asabliva rost novych firmaŭ, firmaŭ z inavacyjnym uchiłam. Jany prychodziać na kredytny rynak, dzie bujnyja klijenty razabranyja i im davodzicca znachodzić novych i być da ich bolš uvažlivymi, prapanoŭvajučy hnutkuju i efiektyŭnuju sistemu pasłuh. Zamiežnyja banki niejtralnyja ŭ dačynienni da ŭstalavanych "rodnasnych" adnosinaŭ pamiž asobnymi firmami i ich kišennymi bankami. Niekatoryja aścierahajucca, što, staŭšy zamiežnymi, banki nie stanuć akazvać sacyjalnyja pasłuhi. Ale hetaha moža zapatrabavać Nacyjanalny bank — luby klijent, i bahaty, i biedny, vybiraje bank, i bank nie maje prava admović.

Pa-treciaje, zamiežnyja banki prynosiać novyja inavatyŭnyja mietady raboty z klijentami: internet-bankinh, razlikovaja sistema klijent-klijent 24 hadziny ŭ sutki, ich charaktaryzuje chutkaść absłuhoŭvańnia.

Pa-čaćviortaje, zamiežnyja banki stanoviacca ŭzoram dla pierajmańnia jak u rabocie z klijentami, tak i ŭ rabocie z ułasnym piersanałam, i asabliva z sučasnymi infarmacyjnymi technałohijami (siońnia bank pracuje nie z hrašyma, a z infarmacyjaj ab ich).

Pa-piataje, zamiežnyja banki ŭ vačach nasielnictva bolš nadziejnyja i lepš zachoŭvajuć bankaŭskuju tajamnicu, i heta pavialičyć prytok układaŭ samych aściarožnych klijentaŭ — u Kamierc-bank achvotniej addaduć svaje skarbonki (a ich uvieś čas aceńvajuć u 5 młrd u.a.), čym u jaki-niebudź N-bank.

Pa-šostaje, z prychodam zamiežnych bankaŭ efiektyŭniej pačnie pracavać rynak pracy bankaŭskich rabotnikaŭ, a ich u krainie bolš za 40 tys. Častka piersanału piarojdzie ŭ novyja zamiežnyja banki, atrymaje novy vopyt raboty i vierniecca na bolš vysokija pasady ŭ svaje raniejšyja banki. Takaja ratacyja kadraŭ pavysić zarpłatu i pradukcyjnaść pracy ŭ bankaŭskaj śfiery. Naturalna, chto nie hatovy da sučasnych bankaŭskich technałohij, — stracić rabotu, ale biespracoŭja bajacca nie varta: na byłych bankaŭskich rabotnikaŭ vysoki popyt u ekanamičnych słužbach realnaha siektara. Da taho ž z prychodam zamiežnych bankaŭ biezumoŭna paskorycca farmavańnie zusim nie razvitaj ŭ nas infrastruktury pa kiravanni kapitałami ŭ vyhladzie inviestycyjnych, brokierskich, kansał-tynhavych, aŭtsorsinhavych i h.d. arhanizacyj i heta jość siomy vynik prychodu zamiežnych bankaŭ.

Vośmy vynik — salidnyja zamiežnyja banki pryvodziać u krainu svaich klijentaŭ u jakasci inviestaraŭ u tym liku tak patrebnyja nam TNK i absłuhoŭvajuć ich, spryjajučy rostu źniešnieekanamičnaj aktyŭnasci pamiž svajoj krainaj i Biełaruśsiu.

Dziaviaty vynik — zamiežnyja banki chutčej prymusiać pierajsci bankaŭskich rabotnikaŭ na metavuju ŭstanoŭku: «nie klijent dla banka, a bank dla klijenta».

Uzmacnieńnie žorstkasci kankurentnaj baraćby prymusić miascovyja banki pierajmać bujnyja zamiežnyja ŭ technałohijach pracy, a ich miascovyja pieravahi (viedańnie klijentaŭ, suviazi i h.d.) dapamohuć vystajać. Ahulnaje mierkavańnie ŭsich analitykaŭ — prychod zamiežnych bankaŭ pavyšaje kankurentazdolnaść krainy i pavialičvaje rost VUP. Zrazumieła, pry efiektyŭnaj rabocie centralnaha banka, jaki asabliva dbajna kantraluje inšaziemcaŭ z dapamohaj sistemnych narmatyvaŭ tranśmiežnaha ruchu kapitałaŭ (limity, terminy, reziervy). Tamu maja rekamiendacyja — Nacyjanalnamu banku prychod zamiežnych bankaŭ nie varta puskać na samaciok — jaho treba pradumana rehulavać i hieahrafična i siektaralna i asabliva, mahčymy adtok kapitału.

Na pohlad aŭtara, siońnia pryjarytetna pryciahnieńnie vielmi bujnych jeŭrapiejskich abo amierykanskich bankaŭ u statutnyja fondy AAT «AAB Biełarusbank» i Biełahraprambanka. Sietkavyja struktury dvuch našych samych bujnych bankaŭ majuć vostruju patrebu ŭ technałahičnaj i inavacyjnaj madernizacyi, jakaja patrabuje značnaha hrašovaha i intelektualnaha kapitału. Nieabchodna adrazu i doraha pradavać bujnym zamiežnym bankam zapłanavanuju dla inšaziemcaŭ dolu, pakinuŭšy druhuju pałovu ŭ dziaržavy i, mahčyma, pryniaŭšy abaviazak pradać častku jaje potym. Nie treba zabyvać i dolu nacyjanalnych inviestaraŭ, a mahčyma, i nasielnictva, abhavaryŭšy, kamu ŭ dziaržavie minarytarnyja nacyjanalnyja ŭłasniki buduć delehavać svaje paŭnamoctvy pa karparatyŭnym kiravanni.

• 0
• 0
• 0
• 0
• 0
• 0
• 0
• 0