Jeŭrakamisija abviaściła ab cełym šerahu mier z metaj vyjaŭleńnia i likvidacyi ŭ internecie infarmacyi, jakaja raspalvaje nianaviść, zaklikaje da hvałtu i teraryzmu, paviedamlajuć infarmahienctvy.
Pavodle źviestak JEK, anłajn-płatformy pavinny nadavać najvažniejšuju ŭvahu «prafiłaktyčnym, apieradžalnym krokam», bolš aktyŭna ŭzajemadziejničać z uładami ŭ vyjaŭleńni i źniščeńni takich nielehalnych materyjałaŭ, jak «dziciačaja parnahrafija, vystupy, jakija matyvujuć nianaviść, i materyjały terarystyčnaha charaktaru».
«Meta zaklučajecca ŭ tym, kab aktyvizavać prafiłaktyku, vyjaŭleńnie i vydaleńnie niezakonnaha kantentu, što raspalvaje nianaviść, hvałt i teraryzm u internecie, — havorycca ŭ zajavie. — Rastučyja dastupnaść i raspaŭsiudžvańnie materyjałaŭ terarystyčnaha charaktaru, jakija pravakujuć hvałt i nianaviść u internecie, ujaŭlajuć surjoznuju pahrozu dla žyćcia i biaśpieki hramadzian ES. Heta taksama padryvaje ich davier da ličbavaha asiarodździa — klučavoha ruchavika inavacyj, ekanamičnaha rostu i stvareńnia pracoŭnych miescaŭ».
Pa słovach jeŭrakamisara pa pytańniach ličbavaj ekanomiki i hramadstva Maryi Habryel, JEK maje namier rašuča pakončyć z prablemaj niezakonnaha kantentu ŭ internecie. Pa jaje słovach, u ciapierašni čas situacyja nie vytrymlivaje nijakaj krytyki.
«Bolš čym u 28% vypadkaŭ patrabujecca bolš za tydzień dla taho, kab anłajn-płatformy likvidavali niezakonnyja materyjały, — adznačyła jana. — Siońnia my nakiroŭvajem im vyrazny sihnał z tym, kab jany dziejničali bolš adkazna».
