«Pierajšoŭ na novaje miesca raboty, u Maskvu»: zachodnierusist Hronski bolš nie vykładaje ŭ BDUIR i BDU
Jak stała viadoma «Našaj Nivie», z pačatkam spravy troch prarasijskich publicystaŭ (Paŭłaŭca, Alimkina i Šyptenki) u Biełarusi bolš nie pracuje Alaksandr Hronski — były vykładčyk BDUIR (jak i Paŭłaviec), dacent Instytuta biźniesu i mieniedžmientu BDU.
«Jon tut bolš nie pracuje, pierajšoŭ na novaje miesca — u Maskvu», — tak skazali nam na kafiedry humanitarnych dyscyplin BDUIR.
Čym ciapier zajmajecca hety zachodnierusist?
Hronski staŭ «viadučym navukovym supracoŭnikam siektaru Biełoruśsii, Mołdavii i Ukrainy» Centra postsavieckich daśledavańniaŭ Nacyjanalnaha daśledčaha instytuta suśvietnaj ekanomiki i mižnarodnych adnosinaŭ imia Jaŭhiena Prymakova.
«Centr imia Prymakova» — heta struktura, stvoranaja pry padtrymcy fonda Harčakova.
***
Hronski — aŭtar vyznačeńniaŭ «biełarusamarfizm» dla biełaruskaj nacyjanalnaj idei, «kvazisamaidentyfikacyja» dla biełaruskaj nacyjanalnaj tradycyi i «kryptarevizijanizm» dla biełaruskaj histaryčnaj pamiaci, luty baraćbit za histaryčnuju reabilitacyju padaŭlalnikaŭ paŭstańnia 1863—1864 hadoŭ u Biełarusi i za adnaŭleńnie pomnika caru Alaksandru II u Minsku.
Teksty Hronskaha vyłučajucca, badaj, najbolšaj navukapadobnaściu siarod opusaŭ adeptaŭ zachodnierusizmu, ale voś adkaz na pytańnie pra pachodžańnie i sutnaść biełarusaŭ hety intelektuał daje hranična prosty: «Tady [u pačatku XX st. — NN] śpiecsłužbami Hiermanii i Aŭstra-Vienhryi pačaŭ rychtavacca prajekt raskołu adzinaha ruskaha etnasu na 3 narody: na ruskich, ukraincaŭ i biełarusaŭ. Hetyja idei byli padchoplenyja jak niešmatlikimi jašče etnasieparatystami ŭ Małarosii i Biełarusi [u aryhinale Biełoruśsii — NN], tak i internacyjanalistami-balšavikami, hałoŭnym voraham i achviaraj jakich zaŭsiody byŭ ruski narod, hetaja «vielizarnaja, kansiervatyŭnaja sialanskaja masa, što tarmaziła pieramohu suśvietnaj revalucyi». Adnak usie domysły pra toje, što biełarusy — nibyta asobny, niaruski narod, raźbivajucca ab tryvałuju ścianu histaryčnych krynic, vielizarny masiŭ jakich całkam abhruntoŭvaje tuju navukovuju teoryju i narodnuju ideju, jakija ličać biełarusaŭ ruskim narodam z ruskaj kulturaj i ruskaj etničnaj samaśviadomaściu».
Kamientary