Vice-staršynia Jeŭraparłamienta Ryšard Čarniecki (partyja «Prava i spraviadlivaść») adznačyŭ, što Polšča nie paddałasia šantažu, jaki datyčycca prymusovaha raźmiaščeńnia biežancaŭ u krainach ES, paviedamlaje Radyjo Polšča.
19 kastryčnika padčas sustrečy ź lidarami krain Vyšahradskaj hrupy staršynia Jeŭrapiejskaj rady Donald Tusk zajaviŭ, što prahrama prymusovaha pierasialeńnia biežancaŭ nie maje budučyni. Jon zajaviŭ, što treba šukać kampramisnaje rašeńnie, jakoje nie budzie padzialać krainy Vyšahradskaj hrupy i astatniuju častku Jeŭropy.
Na dumku Ryšarda Čarnieckaha, paśladoŭnaja palityka polskaha ŭrada ŭ dačynieńni da mihrantaŭ pryniesła vyniki. Jon ličyć, što Jeŭrasajuz šantažavaŭ Polšču z toj metaj, kab jana pahadziłasia na prymusovy pryjom biežancaŭ, adnak, ułady ŭ Varšavie nie paddalisia cisku.
«Ciapier krainam—siabram ES sprabujuć upichnuć hetych mihrantaŭ na asnovie pryncypu dobraachvotnaj zhody. Adnak nieaficyjna cisk u hetym pytańni moža praciahvacca», — miarkuje Čarniecki. Jon padkreślivaje, što Polšča i dalej nie maje namieru mianiać svajoj pazicyi i praciahnie ličyć, što dapamohu biežancam varta akazvać niepasredna ŭ łahierach na terytoryjach krain, dzie jany znachodziacca.
