Polskaja palicyja prakamientavała zatrymańnie biełarusa paśla stralaniny ŭ Hdyni
Aficer Michał Ziankievič z pres-hrupy vajavodskaj kamiendatury palicyi ŭ Hdańsku prakamientavaŭ Svabodzie zatrymańnie hramadzianina Biełarusi Ściapana Śvidzierskaha ŭ Hdyni. Zdareńnie adbyłosia ŭ aŭtorak uviečary ŭ ofisnym budynku ahienctva Thomson Reuters u Hdyni na paŭnočnym zachadzie Polščy.
«Učora kala 19.00 palicyja atrymała infarmacyju, što ŭ adnym z budynkaŭ na terytoryi Hdyni adbyłasia stralanina. Palicyja vyjechała na miesca zdareńnia i zatrymała tam 30-hadovaha hramadzianina Biełarusi», — kaža Michał Ziankievič.
Pavodle pradstaŭnika hdańskaj palicyi, nivodnaja asoba ŭ suviazi z hetym zdareńniem nie paciarpieła i nie była paranienaja. Siońnia hetaja sprava budzie pieradadzienaja ŭ Akružnuju prakuraturu ŭ Hdańsku.
Pavodle adnoj z versijaŭ, zatrymany nibyta chacieŭ pakazać svaju zbroju kalehu, ale heta vyklikała paniku i padčas mituśni adbylisia vypadkovyja streły.
«Usie versii — pakul spekulacyja»
Michał Ziankievič prakamentavaŭ hetuju infarmacyju nastupnym čynam:
«My praviarajem usiu infarmacyju, u tym liku i hetuju versiju. Kali b my ŭ dadzieny momant paćvierdzili adnu sa šmatliki versijaŭ, to heta była b spekulacyja. My chočam usio dakładna vyśvietlić i tady my zmožam kazać pra detali».
Nazvać imia abo inicyjały zatrymanaha pradstaŭnik palicyi admoviŭsia. Polskija zakony zabaraniajuć nazyvać navat inicyjały zatrymanaha, pakul nia buduć praviedzienyja śledčyja dziejańni. Pavodle źviestak Svabody, zatrymany — Ściapan Śvidzierski, heta paćviardžaje jahonaja maci.
Hramadzianin Biełarusi ŭ dadzieny momant zatrymany na 48 hadzinaŭ. Pavodle zakonu, hety termin moža być pradoŭžany na čarhovyja 24 hadziny. Rašeńnie pra dalejšuju mieru strymańnia budzie prymać prakuror.
Kamientary