«Cikavaja historyja, šmat u čym nie źviazanaja z Rasijaj»: jak prydziaržaŭnaja struktura rekłamuje krainu za miažoj
Na staronkach bujnoha rasijskaha internet-vydańnia «Łajfchakier», jakoje piša «pra karyść», niadaŭna źjaviŭsia artykuł z nazvaj «Šeść pryčyn naviedać Biełaruś». Partnioram (čytajcie — rekłamadaŭcam) artykuła paznačany internet-partał «Vietliva» — servis anłajn-braniravańnia i katałoh turystyčnych pasłuh Biełarusi, stvorany dziaržaŭnym turystyčnym apierataram «Centrkurort».
Jakija asablivaści našaje krainy ŭłady ličać nieabchodnym prarekłamavać žycharam Rasii? My vybrali asnoŭnyja tezisy z usich šaści apisanych pryčyn, jakija malujuć karcinu Biełarusi ŭ vačach našych uschodnich susiedziaŭ. Jak vam?
1. Cikavaja historyja, šmat u čym nie źviazanaja z Rasijaj
Akcent zrobleny na vialikaj kolkaści «typova jeŭrapiejskich słavutaściaŭ», da jakich adnieśli «ŭtulnyja vuzkija vułački z brukavanymi tratuarami i nievialikimi damami», a taksama kaścioły, sinahohi i pratestanckuju kirchu.
«Kazačny les ź dziŭnymi raślinami» — mienavita tak u artykule nazyvajuć Biełaviežskuju pušču.
2. Zapaviednik SSSR
Aŭtary artykuła rajać naviedać Biełaruś tym, chto nie zaśpieŭ časy isnavańnia Savieckaha Sajuza, «kab pahladzieć, u jakoj atmaśfiery žyli baćki», a starejšamu pakaleńniu — «źjeździć za nastalhijaj i ŭspaminami».
3. Žyćcio ŭ miehapolisie — heta pastajanny stres
«Para spynicca i adpačyć» — tak zaklikajuć rasiejcaŭ u biełaruskija sanatoryi, abiacajučy i płavańnie ŭ basiejnie, i chvajovyja i pierłavyja vanny, i prahułki ŭzdoŭž voziera ci pa chvajovym lesie.
4. Harnałyžnyja kurorty, jak u Jeŭropie
Raspaviadajecca pra dva biełaruskija harnałyžnyja centry, jakija pa svaim uzroŭni nie sastupajuć jeŭrapiejskim kurortam, majučy značna nižejšyja ceny.
5. Syry, kaŭbasy i prysmaki
A jašče draniki, kałduny, klocki sa skvarkami, bihas (kapustu ź miasam) i babku — voś što prapanujuć pakaštavać turystam u Biełarusi.
A nabyć u jakaść suvienira rajuć jeŭrapiejskija i miascovyja syry, žuraviny ŭ cukry, šakaład, fihurny cukar z karycaj, aŭsianuju kašu ŭ savieckaj ŭpakoŭcy, vafli «Artek» i «Čarnamorskija», abiacajučy «toj samy smak ź dziacinstva».
6. Nizkija ceny
«Biełaruś — niedarahaja kraina. Pajezdka siudy atrymajecca biudžetnaj, a ŭražańniaŭ budzie šmat», — zapeŭnivajuć aŭtary artykuła i abiacajuć košt abieda ŭ kafe ŭ miežach 8-10 biełaruskich rubloŭ.
Kamientary