Eks-kiraŭnik Minekanamraźvićcia Rasii Alaksiej Ulukajeŭ, jaki abvinavačvajecca ŭ atrymańni chabaru ŭ 2 młn dalaraŭ ad kiraŭnika «Rośniefci» Ihara Siečyna, u svaim apošnim słovie ŭ Zamaskvareckim sudzie zajaviŭ, što vinavaty tolki ŭ tym, što «zanadta časta išoŭ na kampramisy», kali «kruciŭsia ŭ biurakratyčnym karahodzie», piša RBK.
«Ja pryznaju siabie vinavatym. Nie ŭ tym absurdnym abvinavačvańni, jakoje mnie pradjaŭlenaje. Viadoma, ja jak moh słužyŭ hramadzianam Rasii, staraŭsia vykonvać svaju pracu dobra. Ale taho, što ja zrabiŭ — sumna mała. Ja zanadta časta vybiraŭ lohkija šlachi. Kruciŭsia ŭ biurakratyčnym karahodzie, atrymlivaŭ niejkija padarunki, sam ich rabiŭ. Kryvadušničaŭ. Tolki apynuŭšysia pa toj bok, razumieješ, jak ciažka žyvuć ludzi. A kali ŭ ciabie ŭsio dobra, prosta advaročvaješsia. Prabačcie mnie, ludzi», — skazaŭ Ulukajeŭ.
Eks-ministr paabiacaŭ, što reštu svajho žyćcia — jak by ni skłaŭsia jaho los — pryśviecić «adstojvańniu intaresaŭ ludziej», adznačyŭšy pry hetym, što dla čałavieka va ŭzroście 62 hadoŭ prysud da dziesiaci hadoŭ pazbaŭleńnia voli strohaha režymu mała čym adroźnivajecca ad śmiarotnaha prysudu.
Pry hetym Ulukajeŭ vykazaŭ nadzieju na toje, što sud zmoža zrazumieć, što jon staŭ achviaraj «žachliva žorstkaj pravakacyi», adnym z arhanizataraŭ jakoj, pa jaho słovach, staŭ Siečyn — «nie toje śviedka, nie toje paciarpieły», jaki tak ni razu i nie źjaviŭsia ŭ sud.
«Rastvaryŭsia dzieści pamiž Chanty-Mansijskam i Rymam, rastvaryŭsia, jak rastajała i sinierhija ad pryvatyzacyi «Rośniefci». Tolki pach siery ŭ pavietry zastaŭsia», — apisaŭ jaho eks-ministr.
«Śledstva i abvinavačvańnie zamiest taho, kab razabracca, pašyła spravu biełymi nitkami. Spadziajusia tolki, što sud padymiecca nad hetymi insinuacyjami i nie stanie zabirać syna ŭ pažyłych baćkoŭ, a ŭ maleńkich dziaciej — baćku. Ciažka im budzie bieź mianie», — skazaŭ eks-ministr.
Ulukajeŭ papiaredziŭ, što ŭ vypadku jaho asudžeńnia «zvon moža prazvanić» pa lubym z tych, chto naziraŭ za jaho pracesam.
«Zaraz heta vielmi lohka: sumka, košyk, videarolik, try kliki — usio OK», — skazaŭ Ulukajeŭ.
Abviaščać prysud eks-ministru pačnuć u Zamaskvareckim sudzie 15 śniežnia.
***
Na telehram-kanał «Našaj Nivy» možna padpisacca tut.
Ciapier čytajuć
Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»23
Kamientary