Upieršyniu biełarusu, jaki vajavaŭ za «ŁNR», dali realny termin — 2 hady kałonii
Jašče adzin biełarus, jaki pajechaŭ vajavać za «ŁNR», trapiŭ pad sud.
Pa viersii abvinavačvańnia, biełarus u kancy leta 2015 hoda vyjechaŭ praz pamiežny punkt z Rasii va Ukrainu, paviedamlaje «Homielskaja praŭda».
Na terytoryi samaabvieščanaj Łuhanskaj narodnaj respubliki jon ŭstupiŭ va ŭzbrojenaje farmavańnie — staŭ šarahoŭcam «kazackaha pałka». Vydali słužbovaje paśviedčańnie, bajavuju zbroju, formu i ježu. Amal hod biełarus udzielničaŭ u praviadzieńni vučeńniaŭ, vykonvaŭ haspadarča-bytavyja i inšyja zadačy.
Na akupavanaj terytoryi biełarus prabyŭ da studzienia 2017 hoda, pieryjadyčna vyjazdžaŭ u Rastoŭskuju vobłaść Rasii, zatym vyrašyŭ viarnucca dadomu ŭ Homiel.
Padčas sudovaha pasiadžeńnia abvinavačany nie admaŭlaŭ, što byŭ u kazackim pałku, ale śćviardžaŭ, što nie źjaŭlaŭsia vajskoŭcam, nie mieŭ ahniastrelnaj zbroi i nie ŭdzielničaŭ u vajennych dziejańniach. Jon zapeŭnivaŭ, što byŭ adpraŭleny «z humanitarnaj misijaj na terytoryju Ukrainy, padkantrolnuju ŁNR». Adnak pryznavaŭ, što jahonyja «kalehi»-kazaki ŭdzielničali ŭ bajavych dziejańniach.
Hamialčuk nie zmoh patłumačyć, čamu ŭ jaho słužbovym paśviedčańni paznačana prynaležnaść da padraździaleńnia vajennaha harnizona i najaŭnaść u jaho ahniastrelnaj zbroi.
U vyniku jon byŭ pryznany vinavatym va ŭdziele va ŭzbrojenym farmiravańni adnaho z supraćlehłych bakoŭ na terytoryi zamiežnaj dziaržavy.
11 śniežnia mužčynu pryhavaryli da dvuch hadoŭ pazbaŭleńnia voli ŭ kałonii ahulnaha režymu. Prysud pakul nie ŭstupiŭ u zakonnuju siłu.
Viadoma, što asudžanaha zavuć Vital Katłabaj. Jaho svajaki ŭpeŭnienyja, što Vital vaziŭ na Danbas humanitarnuju dapamohu, kažuć, nibyta navat majuć dakumienty, jakija paćviardžajuć heta.
«Ale na sudzie hetyja papiery čamuści nie padniali», — śćviardžaje baćka Vitala.
Cikava, što ŭ svoj čas Vitala rasšukvali z dapamohaj pieradačy «Ždi mienia». U 2014 hodzie vyjšaŭ siužet, pryśviečany jaho pošukam. Svajaki paviedamlali, što u 2013 hodzie Vital pracavaŭ u handlovaj kampanii, jeździŭ pa kamandziroŭkach pa roznych haradach Biełarusi. U Salihorsku 25 krasavika Vital paviedamiŭ supracoŭniku, što pajedzie ŭ Homiel u padatkovuju. Prynios svaje rečy ŭ kramu, uziaŭ pakiet i źjechaŭ. U Homieli jaho nichto nie bačyŭ, u padatkovaj jon nie byŭ i na pracu nazad nie viarnuŭsia. Paźniej stała viadoma, što na imia Vitala byŭ nabyty kvitok da Samary.
Pakul što svajaki Katłabaja nie chočuć padrabiaźniej kamientavać jaho historyju.
* * *
Heta nie pieršy prysud, vyniesieny hramadzianinu Biełarusi za ŭdzieł u farmiravańniach tak zvanych DNR i ŁNR. Raniej anałahičnyja sudy prajšli nad žycharami Rečycy (Homielskaja vobłaść), Pastaŭ (Viciebskaja vobłaść). Akramia taho, pavodle infarmacyi «Našaj Nivy», bajevika DNR u Bresckaj vobłaści asudzili farmalna za niaspłatu alimientaŭ. U toj ža čas byli asudžanyja i dvoje biełarusaŭ, jakija vajavali na baku Ukrainy, — adzin za zachoŭvańnie bojeprypasaŭ, a druhi — za vypadki chulihanstva i rabavańniaŭ na terytoryi Biełarusi.
***
Na telehram-kanał «Našaj Nivy» možna padpisacca tut.
***
Kamientary