Jak raniej paviedamlała «NN», 14 śniežnia byŭ uzłamany sajt Bsblog.info, jaki ŭznačalvaje były milicejski śledčy, analityk Andrej Parotnikaŭ. Nahadajem, što ŭ materyjał pra pajezdku Andreja Parotnikava ŭ Rumyniju byli dadadzienyja antyrasijskija vykazvańni, a raspaŭsiudžvaŭ adredahavany artykuł fejkavy akaŭnt «Vital Makarevič».
Skrynšot z fejkavaha akaŭnta.
Na hetym akaŭncie možna znajści šmat repostaŭ z artykułami prarasijskaha sajta «Imchakłab». Vyśvietliłasia, što ŭ realnaści fota z fejkavaha akaŭnta sapraŭdy naležyć čałavieku ź imiem Vital Makarevič, ale nijakaha dačynieńnia da fejsbučnaha akaŭnta, jaki pijaryć «Imchakłab», jon nie maje.
Staronki sapraŭdnaha Vitala Makareviča ź Minska možna znajści ŭ sacyjalnych sietkach Ukantakcie i Adnakłaśniki.
Ad fejsbučnaha trola staronki sapraŭdnaha Vitala Makareviča adroźnivajucca apalityčnaściu: tam zbolšaha zabaŭlalny kantent.
U toj čas jak fejsbučny fejkavy akaŭnt publikavaŭ pieravažna artykuły z «Imchakłaba» ź biełaruskamoŭnymi kamientarami. U siabrach u fejkavaha «Vitala Makareviča» byŭ redaktar «Imchakłaba» Alaksiej Dzierman, jaki aktyŭna pakidaŭ na hetaj staroncy svaje kamientary.
Fejsbučny «Vital Makarevič» pracavaŭ u IT-kampanii EPAM, u realnaści čałaviek z takim imieniem tam nie pracuje.
U dadzieny momant fejsbučny akaŭnt «Vital Makarevič» staŭ niedastupnym. Jaho niemahčyma znajści ŭ pošuku, ale infarmacyju pra hetuju staronku zachavaŭ keš Google.
My dasłali zapyt sapraŭdnamu Vitalu Makareviču. Ale ŭ Ukantakcie jon apošni raz byŭ daŭno, i nam pakul nie adkazaŭ.
