Dziasiatki biełarusaŭ načujuć zimoj na vulicy, kab kupić tannuju kvateru FOTY
Dziaržaŭny zabudoŭščyk abvieściŭ, što budzie ad ranicy zaklučać damovu z achvotnymi pabudavać u Minsku žyllo pa $620 za mietr. Dziasiatki čałaviek zaniali čarhu jašče ad viečara.
Miesiac tamu papiaredniaje źjaŭleńnie ŭ prodažy tannych kvater u stalicy skončyłasia skandałam. Minčukoŭ, jakija samaarhanizoŭvalisia i čakali ŭ stvoranych imi ž čerhach pa niekalki hadoŭ, pasunuli bolš nachabnyja i sprytnyja. Nievialikaja hrupka zaniała abaronu na hanku UKB Centralnaha rajona Minska, i tannaje žyllo (a košt za mietr byŭ amal udvaja nižejšy za rynkavy) adyšło im. UKB paviedamiła, što ŭsio pa zakonie — prava nabyć kvateru pradastaŭlajecca pa žyvoj čarzie, ŭsie damoŭlenaści patencyjnych klijentaŭ jurydyčnaj siły nie majuć.
I voś, 19 śniežnia — praciah historyi. UKB vystaviła na prodaž novuju «partyju» kvater u Navinkach.
Ale ludzi pačali farmiravać žyvuju čarhu zahadzia. I ŭviečary 18 śniežnia na hanku UKB užo stajała kala 30-40 čałaviek. Častka, u asnoŭnym žančyny, zaharnułasia ŭ koŭdry i ŭmacavałasia la samych dźviarej ustanovy. Vakoł patrulavali krepkija mužčyny, taksama ciopła adzietyja. Bačna, što ludzi hatovyja načavać i, kali što, zmahacca za prava nabyć žyllo «sa źnižkaj».
Čym bližej da dźviarej, tym bolš klijenty UKB niervujucca. Zaŭvažna, što ludzi zusim nie hanaracca abstavinami, u jakich jany akazalisia. Kali ich fatahrafujuć, budučyja žychary doma ŭ Navinkach advaročvajuć tvary ci zakryvajuć abjektyŭ rukami, na pytańni ci nie adkazvajuć, ci štości nieachvotna cedziać.
Ahułam, jak paviedamiła adna z žančyn, u žyvoj čarzie 44 čałavieki. Jana apošniaja, voś, vyrašaje, ci varta stajać — kvater ža ŭsiaho tolki 39. Niekatoryja z kanca čarhi ščyra pryznajucca: viedajuć, što kvater im nie chopić, pryšli pahladzieć što tut i jak, kab być hatovymi, kali UKB «vykinie» nastupnuju porcyju tannaha žylla.
Uvohule, jak śćviardžaje adzin z surazmoŭcaŭ, post na hanku staić z taho dnia, kali apublikavali prajektnuju dekłaracyju ab prodažy kvater — to bok ad 13 śniežnia. Ludzi paźmienna dziažurać na marozie amal tydzień — i 19 śniežnia narešcie zmohuć atrymać prava nabyć ułasnaje žyllo. Pryčym tych, chto raniej stvaraŭ śpisy, pa niekalki hadoŭ čakaŭ, zapisvaŭsia, damaŭlaŭsia ź inšymi patencyjnymi pakupnikami, siońnia la UKB niama. Tolki žyvaja čarha.
Ale zadavolenyja, kaniečnie, nie ŭsie.
«Dy ja viedaju, što ničoha nie atrymaju. Bo niekatoryja buduć pa dźvie kvatery sabie brać», — skardzicca mužčyna. Jaho numar u čarzie jakraz 39, ale jon upeŭnieny, što zastaniecca biez kvatery.
Adnak, kaža, zaŭtra ranicaj usio roŭna pryjedzie na hanak UKB. Na ŭsialaki vypadak.
***
Na telehram-kanał «Našaj Nivy» možna padpisacca tut.
Ciapier čytajuć
U Homieli za palityku asudzili kiraŭnika abjadnańnia, jakoje šukaje pareštki achviaraŭ vajny i stalinskich represij, i jaho žonku-miedsiastru4
Kamientary