U Biełarusi da 2020 hoda zamiest učastkovych terapieŭtaŭ buduć pracavać daktary ahulnaj praktyki, paviedamiła siońnia žurnalistam načalnica ŭpraŭleńnia kadravaj palityki ŭstanoŭ adukacyi Ministerstva achovy zdaroŭja Volha Maršałka, piša BiełTA.
Sa słoŭ Volhi Maršałka, u Biełarusi ciapier pieršasnaje źviano achovy zdaroŭja pierachodzić na pracu pavodle pryncypu doktara ahulnaj praktyki, idzie aktyŭnaje raźvićcio ahulnaj lekarskaj praktyki — anałaha siamiejnaj miedycyny.
«Da 2020 hoda ŭsie ŭčastkovyja terapieŭty buduć pieraviedzienyja i pradoŭžać pracavać lekarami ahulnaj praktyki. Prajekt maje na ŭvazie zładžanuju pracu cełaj kamandy — doktara, pamočnika doktara i miedsiastry. My raźličvajem, što hety prajekt dazvolić nam zabiaśpiečyć jakasnaje vykanańnie miedycynskaj dapamohi i nadać bolš uvahi kožnamu pacyjentu», — skazała jana.
Pavodle jejnych słoŭ, ciapier viadziecca aktyŭnaja padrychtoŭka adpaviednych śpiecyjalistaŭ. «Pačynajecca padrychtoŭka lekaraŭ ahulnaj praktyki na ŭzroŭni mieduniviersitetaŭ z 6-ha kursa. Hetyja śpiecyjalisty navučajucca ŭ subardynatury lekara ahulnaj praktyki, dalej prachodziać navučańnie ŭ internatury, a paśla pačynajuć pracavać lekarami ahulnaj praktyki. Heta pieršy sposab padrychtoŭki śpiecyjalistaŭ. Druhi viadziecca praz padvyšeńnie kvalifikacyi i pierapadrychtoŭki lekaraŭ, jakija ŭžo pracavali», — prainfarmavała Volha Maršałka.
Razam z tym Volha Maršałka zapeŭniła, što vuzkija śpiecyjalisty z paliklinik nie źniknuć.
«My ŭvažliva vyvučyli dośvied krain, dzie takaja sistema taksama funkcyjanuje. My nie płanujem prybirać vuzkich śpiecyjalistaŭ z paliklinik, prosta ich kolkaść zastaniecca takoj, jakaja nieabchodnaja pa isnujučych patrebach i zasnavanych standartach. Chvalavacca, što ŭsio zakončycca na lekary ahulnaj praktyki, nie varta. Kali pacyjent na pryznačeńnie lekara budzie mieć patrebu ŭ kansultacyi vuzkaha śpiecyjalista, takaja kansultacyja na ŭzroŭni pieršasnaha źviana jamu budzie zabiaśpiečanaja. Situacyi, pry jakoj palikliniki zastanucca biez vuzkich śpiecyjalistaŭ, nie budzie», — zapeŭniła jana.
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha142
Kamientary