Hrandy biełaruskaha IT u zachapleńni, suśvietnyja ŚMI pakieplivajuć — reakcyi na Dekret pra IT i lehalizacyju kryptavalut
«Rasijanie, čytajem, zajzdrościm, dumajem», — napisaŭ u siabie ŭ fejsbuku Juryj Hurski. Hurski — 34-hadovy biełaruski pradprymalnik, jaki prykłaŭ ruku da stvareńnia takich paśpiachovych IT-praduktaŭ, jak Maps.me i MSQRD.
«Apošni dyktatar Jeŭropy choča kiravać suśvietnym centram kryptafinansaŭ», — taki zahałovak dało navinie ahienctva biznes-infarmacyi Błumbierh.
Skieptycyzm inšaha mižnarodnaha ahienctva, Rojterz, vyklikaŭ niezadavolenaść zasnavalnika Tut.baj Juryja Zisiera: «Niepryjemny artykuł u duchu 2000-ch, ale jaki jość».
«Biełaruś uvodzić zakanadaŭstva pra kryptavalutu, kab pryvabić zamiežnych inviestaraŭ», — taki zahałovak svajmu artykułu daje Rojterz.
«Biełaruś lehalizavała ździełki ŭ kryptavalutach, heta častka namahańniaŭ pavialičyć tempy rostu pryvatnaha siektara i pryciahnuć zamiežnyja inviestycyi šlacham libieralizacyi asobnych siektaraŭ svajoj ekanomiki, jakaja zastajecca pa svaim typie savieckaj», — piša Rojterz.
Žurnalist adznačaje, što kurs samaj papularnaj kryptavaluty, bitkojna, u minułuju niadzielu daros amal da $20.000, a paśla za tydzień upaŭ na tracinu. Jaje adepty nie zvažajuć na takuju niaŭstojlivaść kacirovak i śćviardžajuć, što my žyviom na zołku novaj hłabalnaj valutnaj sistemy, jakaja nie budzie zaležać ad centrabankaŭ. I žurnalist cytuje słova Łukašenki, pramoŭlenyja im 11 dzion nazad: «Usie razumnyja i tałkovyja ludzi razumiejuć ciapier, što takoje stabilnaść i paradak. I da hetaha bieraha kožny sprabuje pryčalić. My hatovyja taki pryčał arhanizavać, i navat bolš — havań».
«Dekret [ab raźvićci ličbavaj ekanomiki] zadumany, kab pryciahnuć pradprymalnikaŭ sa śfiery ličbavych finansaŭ, — piša Rojterz, — jakija pieranosiać svoj biznes u jurysdykcyi, bolš pryjaznyja da kryptavalut, u čas kali rehulujučyja orhany [krain Zachadu] źviartajuć usio pilniejšuju ŭvahu na tyja srodki, što ŭkładvajucca ŭ ličbavyja valuty».
«Dla Biełarusi heta praryŭny dekret», — cytuje Rojterz kiraŭnika biełaruskaha ofisa kampanii Microsoft Antona Miakišava.
«Mnie b chaciełasia b skazać dziakuj Alaksandru Ryhoraviču za jahonuju zdolnaść być adkrytym da novaha, za ščyraje žadańnie zrabić Biełaruś inavacyjnaj i kvitniejučaj dziaržavaj», — nie strymlivaje siabie Dźmitryj Hurski, brat Juryja Hurskaha i inšy hrand biełaruskaha Parka vysokich technałohij.
Jon taksama nie škaduje dobrych słoŭ na adras byłoha pamočnika Alaksandra Łukašenki pa ideałohii Usievałada Jančeŭskaha, jaki staŭ kiraŭnikom biełaruskaj Silikonavaj daliny: «Čałaviek vielizarnaj enierhii, kałasalnych arhanizacyjnych zdolnaściej i vostraha rozumu».
Miž tym Rojterz zaznačaje: «Bliskučyja pierśpiektyvy IT-industryi nieparaŭnalnyja ź situacyjaj u inšych siektarach biełaruskaj haspadarki, u centry jakich pa-raniejšamu zastajucca stratnyja dziaržaŭnyja pradpryjemstvy, amal ci zusim nie refarmavanyja paśla krachu Savieckaha Sajuza».
«Apošni dyktatar Jeŭropy ciapier choča stać karalom jeŭrapiejskaha błokčejnu», — anansuje url artykuła Błumbierha.
«Dekret lehalizuje biznesy, zasnavanyja na błokčejnie — technałohii, jakaja lažyć u padmurku takich kryptavalut, jak bitkojn, — piša Błumbierh, — tak Biełaruś imkniecca stać suśvietnym centram dla zboru srodkaŭ praz tak zvanyja initial coin offerings, ICOs. Dachody i prybytak ad apieracyj z vykarystańniem ličbavych tokienaŭ [finansavych srodkaŭ] buduć vyzvalenyja ad padatkaŭ da 2023 hoda. Adnačasova buduć zroblenyja kroki dla spraščeńnia ruchu kapitału miž Biełaruśsiu dy inšymi krainami», — cytuje Błumbierh reziume dekreta, padrychtavanaje Viktaram Prakapieniem. Ahienctva nazyvaje jaho «łabistam pryniaćcia novaha zakanadaŭčaha akta».
«PLEASE SHARE! Belarus — the first government in the world to offer full blockchain regulation». «KALI ŁASKA, ZRABICIE REPOST! Biełaruś — pieršy ŭrad na śviecie, jaki całkam uzakoniŭ błokčejn», — usklikaje ŭ siabie ŭ FB Prakapienia.
34-hadovy Viktar Prakapienia — adzin z samych paśpiachovych biznesoŭcaŭ biełaruskaha IT. Za apošnija niekalki hadoŭ jon pieražyŭ katastrafičnaje padzieńnie i nie mienš fienamienalnaje viartańnie na jašče vyšejšuju arbitu. U 2006 hodzie jon zasnavaŭ Viaden Media — u 2012 hodzie jaje vykupić izrailski miljarder. Na zaroblenyja srodki Prakapienia stvaryŭ inviestycyjny fond VP Capital. Siarod pieršych inviestycyj hetaha fondu była kampanija exp(capital), sfakusavanaja na raspracoŭcy prahramnych praduktaŭ dla bankaŭ i finansavaj śfiery. Kab ujavić stupień paśpiachovaści pracy Prakapieni: adno tolki padraździaleńnie exp(capital), jakoje zajmałasia mabilnymi dadatkami, u 2014 hodzie było vykuplena brytanskoj IG Holdings za 200 młn dalaraŭ. Heta bolš, čym, naprykład, siońniašniaja rynkavaja cana hihanckaha Minskaha aŭtazavoda.
U 2015 hodzie Prakapieniu z padačy Ministerstva ŭnutranych spraŭ zatrymlivajuć nibyta za niezakonnuju pradprymalnickuju dziejnaść. Ale ŭ 2016 hodzie sprava razvalvajecca, adnak biznesoŭca zmušajuć spłacić niekalki socień tysiač dalaraŭ kampiensacyi, pierš čym vypuścić ź SIZA. Dalej jon — redki vypadak! — sustrakajecca z Alaksandram Łukašenkam. Prezident Biełarusi naviedaŭ ofis Prakapieni ŭ tavarystvie svajho asabistaha siabra, naftavaha miljardera Michaiła Huceryjeva. Huceryjeŭ nadzvyčaj zacikaŭleny inviestavać u IT i ŭkładaje sotni miljonaŭ dalaraŭ u prajekty Prakapieni pa raźvićci štučnaha intelekta (bieśpiłotnyja aŭtamabili i h.d.).
Prakapienia skončyŭ Biełaruski dziaržaŭny ŭniviersitet (jurfak), Biełaruski dziaržaŭny ŭniviersitet infarmatyki i radyjoelektroniki, a taksama biznes-škołu Minskaha Instytuta pryvatyzacyi i mieniedžmientu. Na siońnia jon žyvie i pracuje pieravažna ŭ Łondanie, ale jahony biznes skancentravany ŭ Biełarusi i hruntujecca na biełaruskim intelektualnym resursie.
Juryj Hurski — inšy pakazalny prykład pośpiechu biełaruskaha IT. Što cikava, Hurski taksama pa pieršaj adukacyi nie prahramist. I jon taksama — pradukt biełaruskaha hramadstva i biełaruskaj adukacyi. Jon skončyŭ žurfak Biełaruskaha dziaržaŭnaha ŭniviersiteta, a paśla dadaŭ dypłom biznes-administravańnia Instytuta pryvatyzacyi i mieniedžmientu.
Hurski ŭznačalvaŭ Prakapienieŭ Viaden Media, što zrabiła vializnyja hrošy na raspracoŭcy mabilnych dadatkaŭ dla praduktaŭ Apple. Hurski taksama byŭ mientaram Maps.me — kartahrafičnaha praduktu, kuplenaha ŭ 2014 hodzie Mail.ru. Paśla karotkaha pieryjadu supracy z hetym rasijskim infarmacyjnym hihantam, Hurski staŭ mientaram i inviestaram sełfi-dadatka MSQRD, nabytaha ŭ 2016 hodzie Fejsbukam. Narešcie, u 2017 hodzie, razam ź inšym hienijem biełaruskaha IT, Juryjem Mielničakam, Hurski pradaŭ karparacyi Google svoj startap Aimatter.
Hurski pravodzić bolšuju častku svajho času na Kipry, jahony biznes — hłabalny, jak i ŭ Prakapieni, ale Biełaruś — nieadjemnaja častka hetaj spravy.
Takija ludzi, jak Prakapienia, Hurski i Mielničak, stali bahatymi — vielmi bahatymi — nie dziakujučy handlu syravinaj, dostupu da dziaržaŭnych resursaŭ ci karupcyjnym poviaziam z čynoŭnikami i siłavikami, jak bolšaść miljarderaŭ Rasii i Ukrainy. Hetyja ludzi zrabili siabie sami, svaimi mazhami. Jany realna ŭvachodziać u suśvietny top pa hienieracyi prybytkovych idej. Jany nijak nie pryviazanyja da Rasii i rasijskaha rynku. I jany pastavilisia da novaha dekreta z vyklučnym entuzijazmam.
«Amazing work!» — «Kłasna zroblena!» — napisaŭ u svaim FB Mielničak.
«Dekret napisany dakładna tak, jak taho chacieła technałahičnaja supolnaść. Biełaruś stanie adnoj z najlepšych jurysdykcyj u śviecie dla kryptavalut i błokčejnu», — pryvodzić Bloomberg słovy kiraŭnika Parka vysokich technałohij Usievałada Jančeŭskaha.
Ciapier čytajuć
Novym śpikieram Kaardynacyjnaj rady, chutčej za ŭsio, stanie Arciom Bruchan6
Kamientary