Kolki kaštuje dajechać da Vilni ci Varšavy na pryvatnym tranśfiery?
Paśla admieny častki aŭtobusnych rejsaŭ ź Minska ŭ Vilniu popyt na tranśfier pa hetym kirunku asabliva vyras. A voś pryjarytetčyki amal pakinuli čat.
Minsk-Varšava
Cana na pryvatny tranśfier ź Minska, Bresta ci Hrodna da Varšavy i inšych polskich haradoŭ budzie zaležyć ad adlehłaści da patrebnaha miesca.
Možna zakazać dadatkovyja pasłuhi — naprykład, vas sustrenuć z admysłovaj tabličkaj u aeraporcie. Taksama tranśfier moža davieźci pasažyra nie tolki da vakzała ci aeraporta, a naŭprost da doma ci hatela.
Mašyna na čatyroch čałaviek ź Minska da Varšavy budzie kaštavać 380-480 jeŭra. Kali vybirać aŭto biznes-kłasa, budzie daražej.
Niekatoryja pieravozčyki abiacajuć pastajannym klijentam prachodžańnie biełaruska-polskaj miažy biez zatrymak — pa-za čarhoj.
Raniej chutka prajści miažu čaściej za ŭsio atrymlivałasia, kali ŭ sałonie byŭ čałaviek ź invalidnaściu ci maleńkaje dzicia. Ale ŭ apošni čas schiema sa śpiecyjalna zaprošanymi lhotnikami moža nie spracavać — paśla skarhaŭ padatkovaja i pahraničniki stali praviarać ich. Pahražaje štraf i viartańnie ŭ Biełaruś.
U čatach pa prachodžańni miažy kolkaść abjaŭ pra taki prajezd za apošni tydzień značna skaraciłasia — karystalniki zaŭvažajuć:
«Kudy ž padziavalisia pryjarytetčyki? Niaŭžo im narešcie panasoŭvali? Raniej praz post byŭ pryjarytet, a ciapier — naohuł nikoha».
Praktyka z vykarystańniem ilhotnaha statusu dla chutkaha prachodžańnia miažy ŭ punkcie «Brest» užo skaraciłasia ŭ try razy.
«Naša Niva» pad vyhladam pasažyraŭ usio ž źviazałasia ź niekatorymi kiroŭcami, jakija ŭ telehram-čatach prapanujuć prajechać miažu biez zatrymak. Jak i paviedamlałasia raniej, košt takoj pajezdki dla adnoj mašyny — 350-400 jeŭra. Kali jechać ź inšymi nieznajomymi pasažyrami, u kožnaha paprosiać pa 90 jeŭra.
Miechanizm u «biznesmienaŭ» taksama rozny: adnaho pasažyra pryjarytetnaha aŭto mohuć abaviazać znajści čałavieku ź invalidnaściu advarotnuju mašynu ŭ Biełaruś paśla prachodžańnia miažy, a ŭ inšym vypadku hetu zadaču vyrašyć sam kiroŭca.
Maderatary adnaho z čataŭ pišuć, što ciapier lubych pasažyraŭ zabaroniena vysadžvać z aŭto. Sproba takoj vysadki kančajecca štrafam da 40 bazavych vieličyń i razvarotam mašyny ŭ biełaruski bok. Taksama ŭ aŭto z pryjarytetam ciapier praviarajuć dakumienty dla zajezdu ŭ Polšču.
Minsk-Vilnia
Popyt na tranśfiery da Vilni ci litoŭskich aeraportaŭ pavysiŭsia, kali pieravozčyki admianili niekatoryja z aŭtobusnych rejsaŭ. U telehramie ludzi pišuć, što tranśfier ź Minska ci ź miažy da Vilni im asabliva spatrebiŭsia, kali skasavali mienavita ich aŭtobus.
«My vielmi stresavali, kali za dva dni da adpraŭleńnia admianiŭsia naš aŭtobus, a zvodki navin byli niesuciašalnyja».
Cana na tranśfier ź Minska da Vilni nižejšaja, čym da Varšavy, — ad 150 da 300 jeŭra za mašynu.
Na hetym kirunku taksama pracuje schiema z pryjarytetnym prachodžańniem miažy — chacia, jak i ŭ vypadku z Polščaj, prapanoŭ u telehram-čatach ciapier publikujecca značna mienš. Adzin z kiroŭcaŭ nazvaŭ canu za pryjarytetny tranśfier z punktu «Kamienny Łoh» da Vilni — 70 jeŭra.
U harach Kyrhyzstana z drona adšukali cieły źnikłych biełaruskich alpinistaŭ8
Kamientary