Dadatkovy niepracoŭny dzień moža parušyć pravy ateistaŭ, ličać u Aparacie ŭpaŭnavažanaha pa spravach relihij i nacyjanalnaściaŭ.
Orhany ŭłady dali adkaz na pietycyju ab viartańni statusu niepracoŭnaha dnia 1 abo 2 listapada. Kalektyŭny zvarot z bolš za 1,8 tys. podpisaŭ byŭ nakiravany ŭ Saviet ministraŭ Biełarusi, a taksama ŭ Administracyju prezidenta. Asobny zvarot dasyłali kiraŭniku Biełarusi katalickija biskupy, u pryvatnaści, padtrymaŭ mitrapalit Tadevuš Kandrusievič.
Z Administracyi prezidenta paviedamili, što list byŭ nakiravany ŭ Aparat Saŭmina. Adkaz padpisała namieśnik Upaŭnavažanaha pa spravach relihij i nacyjanalnaściaŭ Alena Radčanka, paviedamlaje Katolik.life.
Pradstaŭnik ułady piša pra toje, «zvarot pa pytańni abjavy niepracoŭnym dniom 1 listapada, jaki źjaŭlajecca śviatam Usich Śviatych pa kalendary katalickaj kanfiesii, razhledžana ŭ aparacie Upaŭnavažanaha pa spravach relihij i nacyjanalnaściaŭ». Pry hetym pra Dzień pamiaci pamierłych, jaki adznačajecca 2 listapada, u adkazie ničoha nie havorycca. Ale aŭtary pietycyi rabili akcent mienavita na prablemie pracoŭnaha dnia na «Dziady», jaki adznačajuć nie tolki kataliki, ale i hramadskaść u cełym.
- U adpaviednaści z Zakonam Respubliki Biełaruś «Ab svabodzie sumleńnia i relihijnych arhanizacyjach» ŭsie hramadzianie roŭnyja pierad zakonam niezaležna ad ich adnosinaŭ da relihii, - pišuć u adkazie z aparatu Upaŭnavažanaha pa spravach relihij i nacyjanalnaściaŭ. - Prava na svabodu vieravyznańnia, zamacavanaje ŭ Kanstytucyi Respubliki Biełaruś, nie daje viernikam nijakich pieravah pierad hramadzianami, jakija prytrymlivajucca ateistyčnych pierakanańniaŭ. U advarotnym vypadku heta parušyć pryncyp raŭnapraŭja hramadzian.
Mienavita tamu ŭ Aparacie ŭpaŭnavažanaha pa spravach relihij i nacyjanalnaściaŭ ličać, što «ŭ ciapierašni čas dapaŭniać relihijnyja śviaty, jakija adznačajucca ŭ Respublicy Biełaruś u jakaści śviatočnych dzion, jašče adnym, i abjaŭlać jaho niepracoŭnym dniom, niemetazhodna».
Kamientary