Nabyć u Biełarusi dziciačyja mikraklizmy ad zaporu možna tolki… u seks-šopach
U biełaruskich aptekach šukać mikraklizmy «Mikrałaks», jakija chutka dapamahajuć małym dzietkam pry zapory, paprostu biessensoŭna.
Farmaceŭty tłumačać, što hety preparat nie zarehistravany ŭ Biełarusi. Maŭlaŭ, minułaj viasnoj čakałasia, što jon usio ž u nas źjavicca, ale hetaha tak i nie adbyłosia. I hałoŭnaje — raŭnaznačnaj zamieny jamu niama.
Daktary kažuć pra isnavańnie «Mikrałaksa» baćkam, dzieci jakich sutyknulisia z prablemaj zaporu, ale papiaredžvajuć, što nabyć jaho možna tolki za miažoj.
«Doktarka raiła nam «Mikrałaks» i jašče suśpienzii dla dziaciej «Trybuks». Ale adrazu skazała, što ŭ nas u krainie ich niama. To bok kali jość mahčymaść pryvieźci — dobra, — kaža maładaja maci Maryna. — Što rabić, kali nijak niemahčyma pryvieźci? Jość jašče «Dziufałak» [heta sirop — Red.], ale jon dziejničaje doŭha. Sa srodkaŭ terminovaj dapamohi — tolki tradycyjnyja hlicerynavyja śviečki, ale jany taksama nie nadta efiektyŭnyja, bo ad ich uźnikaje razdražnieńnie, jak ad zvyčajnaha myła. A bolš nijakich alternatyŭ niama. Zastajecca tolki klizma i dyjeta, jakija, znoŭ ža, dziejničajuć doŭha».
Cikava, što na baćkoŭskich forumach pra «Mikrałaks» pisali jašče ŭ 2007 hodzie, tady taksama jaho ŭ Biełarusi nie było, raili vieźci z Maskvy.
Siońnia ŭ Minsku jaho znajści ŭsio ž taki mahčyma, tolki šukać treba nie mikraklizmy dla dziaciej pry zapory, a słabilny srodak dla padrychtoŭki da analnaha seksu. I nie ŭ aptekach, a ŭ seks-šopach.
Što praŭda, daviadziecca zapłacić udvaja, a to i ŭtraja daražej, čym u krainach-susiedkach.
Kali ŭ našych seks-šopach za čatyry mikraklizmy prosiać dzie 31 rubiel, dzie 44 rubli, to ŭ aptekach susiedziaŭ značna mienš. U Polščy — 19 rubloŭ, u Vilni — 14, u Rasii — 13, a va Ukrainie — 7.
My zapytałasia va ŭłaśnicy sietki «Zialonych aptek» Ruhii Kienhierli, čamu «Mikrałaks» nie pradajuć u biełaruskich aptekach i ci sapraŭdy hetamu srodku niama alternatyvy?
«Apłatu rehistracyi lekavych preparataŭ u asnoŭnym zabiaśpiečvaje abo dystrybjutar vytvorcy, abo sam vytvorca. Časta biełaruski rynak jany nie ličać dla siabie pierśpiektyŭnym u materyjalnym płanie. Naš rynak nievialiki, a ŭkładvacca treba zaŭvažna, choć nie fakt, što srodak paśla budzie dobra pradavacca. Nie kažučy pra toje, što zarehistravać lekavy preparat — nie vielmi prosta, treba prajści šmat biurakratyčnych pracedur, — kamientuje Ruhija.
— A nakont taho, što niama anałahaŭ, to sapraŭdy, u vyhladzie mikraklizm ich niama. Ale jość preparaty, jakija prymajucca ŭnutr, jość raślinnyja srodki, ich vielmi šmat. Jość sirop na asnovie łaktułozy «Dziufałak», jość śviečki.
Nu i ŭ lubym vypadku zapory — čaściej za ŭsio simptom. I treba ŭ pieršuju čarhu zmahacca z pryčynaj. Moža być, jość parušeńni ŭ charčavańni, u režymie pićcia. Kali ŭ čałavieka jość stałyja zapory, jamu treba źviarnucca da doktara».
Kamientary