Mer Vieniecyi Łuidžy Bruńjara aburany vysokimi cenami ŭ restaranach horada — pra heta jon zajaviŭ paśla taho, jak čaćviora japonskich turystaŭ paskardzilisia ŭ palicyju na rachunak u 1100 jeŭra za čatyry stejki i talerku smažanaj ryby.
U rachunak, jaki prynieśli čatyrom studentam ź Japonii ŭ restaranie niedaloka ad płoščy Śviatoha Marka, taksama ŭvachodzili zvyčajnaja vada i absłuhoŭvańnie.
Try siabroŭki studentaŭ, što padarožničajuć razam ź imi, pajšli ŭ inšy restaran, ale i tam im daviałosia zapłacić 350 jeŭra za try talerki pasty z morapraduktami, paviedamlajuć miascovyja ŚMI.
«My staranna raźbiaremsia i daviedajemsia, nakolki pravamiernyja hetyja skarhi», — napisaŭ mer u tvitary.
«Kali paćvierdzicca, što heta hańba sapraŭdy była, my zrobim usio mahčymaje, kab pakarać vinavatych. My za spraviadlivaść — zaŭsiody!» - dadaŭ čynoŭnik.
Skarhi japoncaŭ padtrymaŭ aficyjny pradstaŭnik arhanizacyi žycharoŭ Vieniecyi «Hrupa 25 krasavika» Marka Hasparyneci.
Italjanskija ŚMI nie nazyvajuć restaran, u jakim abiedali japoncy, adnak ŭdakładniajuć, što ŭstanovaj kiruje jehipcianin, a vałodaje im kitajanka.
Hasparyneci ŭ hetaj suviazi skardzicca na toje, što tolki 1,1% restaranaŭ vakoł płoščy Śviatoha Marka naležać miascovym žycharam, dy i ŭ cełym vieniecyjancy vałodajuć tolki pałovaj ustanoŭ, raźmieščanych u histaryčnaj častcy horada.
«Hrupa 25 krasavika» maje namier apublikavać na fejsbuku parady dla turystaŭ, jakija pavinny dapamahčy im paźbiehnuć padobnych vypadkaŭ, dadaŭ jon.
Ciapier čytajuć
«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam15
Kamientary