«Heta byŭ moj pieršy apraŭdalny prysud pa zabojstvie». Jakuju spravu Łukašenka raskryŭ za sutki

Siońnia Alaksandr Łukašenka na sustrečy sa staršynioj Dziaržaŭnaha kamiteta sudovych ekśpiertyz Andrejem Šviedam raspavioŭ, jak dapamoh raskryć złačynstva, jakoje adbyłosia ŭ Mahiloŭskaj vobłaści. Pa dapamohu da prezidenta źviarnuŭsia baćka zabitaj.

— Pryjšoŭ i kaža: «Alaksandr Ryhoravič, nu nie moža być, kab było tak, jak sud pryniaŭ rašeńnie, i tak, jak śledstva praviali». (…) Ja sieŭ i sam za sutki vyvučyŭ jaje. I daŭ kamandu prakuroru i staršyni KDB, čaho b ni kaštavała, rasśledavać hetuju kryminalnuju spravu. Niahodnika znajšli ŭ Rasii, pryvieźli ŭ Minsk, raspačali znoŭ kryminalnuju spravu, pačali rasśledavać. Prytym ja kantralavaŭ uvieś hety praces. I akazałasia, što jon — zabojca. A jaho faktyčna apraŭdali.

Jak vyśvietliŭ TUT.BY, havorka idzie pra zabojstva žančyny, toje, što adbyłosia ŭ 2009 hodzie. Tady abvinavačvańnie było pradjaŭlena biełarusu, jaki rehularna jeździŭ na zarobki ŭ Rasiju. Praz hod — u lutym 2010 hoda — Mahiloŭski abłasny sud vynies apraŭdalny prysud. Sudździa, jakaja razhladała hetuju spravu, na piensii ŭžo niekalki hadoŭ. Pra toje, što apraŭdanamu znoŭ vystaŭlenaje abvinavačvańnie, jana daviedałasia siońnia ź internetu. U razmovie z žurnalistam TUT.BY žančyna admoviłasia abmiarkoŭvać historyju 2009 hoda.

— Heta było 8 hadoŭ tamu, pravaachoŭnyja orhany raźbiarucca, chto maje racyju, chto vinavaty. Moj prysud byŭ razhledžany va ŭsich instancyjach, pakinuty ŭ sile, respublikanskaja prakuratura padtrymała, — kaža byłaja sudździa. — Ja pamiataju jaje… Sapraŭdy, apraŭdalnyja prysudy vynosiacca niačasta, dla mianie heta byŭ pieršy apraŭdalny prysud pa hetym artykule [zaŭv. TUT.BY. - art. 139 KK «Zabojstva»]. Ja pracavała jakasna, tamu prysudy zastavalisia ŭ sile. U majoj 30-hadovaj praktycy sudździoj było ŭsiakaje: pa piać razoŭ mahli admianiać i znoŭ da vytvorčaści prymać. Tamu zahadzia rabić vysnovy, davać kamientary — heta niapravilna. Tym bolš što ja nie viedaju, ź jakoj pryčyny admianili prysud, u nas padstavaŭ dla admieny šmat.

— Kažuć, kryminalnuju spravu raspačali ŭ suviazi z novymi abstavinami.

— Tady heta zusim inšaja sprava. Kali admianiajuć za niadbałaje staŭleńnie, heta, viadoma, PP dla sudździ. A tolki novyja akaličnaści mohuć i praz 20 hadoŭ źjavicca, i praz 30. Jak luby sudździa, ja za toje, kab pieramahła iścina. Kali hetyja akaličnaści dapamohuć znajści złačyncu i asudzić — heta budzie pravilna.

Vosiem hadoŭ tamu svajaki paciarpiełaj byli nie zhodnyja z apraŭdalnym prysudam i abskardzili jaho ŭ Viarchoŭnym sudzie, jaki pakinuŭ prysud u sile. Paśla taho, jak złačynstvam zacikaviŭsia prezident, u 2017 hodzie hod byli raspačatyja kryminalnaja sprava pa č.2 p. 6 art.139 KK «Zabojstva z asablivaj žorstkaściu».

Na dniach materyjały spravy byli nakiravanyja ŭ Viarchoŭny sud. Chutka abvinavačvany znoŭ paŭstanie pierad sudom. Sankcyja artykuła praduhledžvaje pakarańnie: ad 8 da 25 hadoŭ pazbaŭleńnia voli, ci pažyćciovaje pakarańnie, ci śmiarotnaje pakarańnie.

• 0
• 0
• 0
• 0
• 0
• 0
• 0
• 0