Staršynia KDB pakazaŭ, jak vyhladaje telefon Łukašenki i centr kiravańnia ŭradavaj suviaźziu FOTY
Padčas intervju telekanału «Biełaruś-1» staršynia KDB Valeryj Vakulčyk pakazaŭ centr kiravańnia ŭradavaj suviaźziu, raspavioŭ pra jaje ŭnikalnaść i prademanstravaŭ sučasnyja aparaty, jakimi karystajucca čynoŭniki.
«Uradavaja suviaź — adzin sa składnikaŭ kiravańnia dziaržavaj, — raspaviadaje Vakulčyk. — Nami stvoranaja ŭnikalnaja sistema na asnovie optavałakonnaj suviazi: jana nie maje anałahaŭ na postsavieckaj prastory. Naprykład, interaktyŭnaja karta dazvalaje ŭ režymie realnaha času kantralavać stan linij suviazi, i, kali niedzie adbyŭsia razryŭ abo sproba praniknieńnia, sistema dazvalaje za dolu siekundy pieraklučacca na reziervovuju liniju i suviaź praciahvaje funkcyjanavać. Heta sistema stvoranaja litaralna dva hady tamu. Dla našych papiarednikaŭ heta fantastyka, mara, jakaja raniej zdavałasia niazbyŭnaj».
Staršynia KDB zapeŭniŭ, što sistema raspracavanaja biełaruskimi śpiecyjalistami, i ŭsio abstalavańnie, vykarystanaje dla jaje stvareńnia, — taksama biełaruskaj vytvorčaści.
Voś jak vyhladajuć pryłady, jakimi karystajuca niepasredna słužbovyja asoby — «abanienty uradavaj suviazi». Da ich adnosiacca pulty ŭpraŭleńnia kiraŭnika i telefonnyja aparaty. Raniej usio heta zakuplałasia za miažoj.
«Heta impartnaja stancyja suviazi, jana adpracavała svoj termin i treba było jaje zamianić, — praciahvaje Vakulčyk. — My pryjšli da vysnovy, što treba stvarać svaju stancyju. Abmierkavali z kiraŭnikom krainy ideju stvareńnia pulta i jahony dyzajn. Vidavočna, što hety aparat vyhladaje simpatyčniej u paraŭnańni z tym, što było.
Ale kiraŭnik krainy nie padzialiŭ našaha aptymizmu, skazaŭ, što patrebny zaŭtrašni dzień, i prykładna apisaŭ, što jon chacieŭ by bačyć. Ja abmierkavaŭ sa śpiecyjalistami, jany skazali, što heta niemahčyma, i ŭ našaj krainie my takoje zrabić nie možam. Ale zadača pastaŭlena, i treba jaje vykonvać. Pačali šukać sposaby i znajšli niekalki pradpryjemstvaŭ. U vyniku na praciahu hoda byŭ stvorany novy pult kiraŭnika. Atrymaŭsia cikavy, unikalny pradukt z zusim inšym dyzajnam: vykarystanyja sučasnyja aluminijevyja spłavy, zahartavanaje škło».
Adzin z paramietraŭ acenki abstalavańnia, pa słovach staršyni KDB, — vypramieńvańnie, uzrovień jakoha važny jak z punktu hledžańnia biaśpieki (treba vyklučyć pierachop sihnału i sčytvańnia infarmacyi), tak i zdaroŭja karystalnika. Akazałasia, što abstalavańnie, zroblenaje našymi śpiecyjalistami z našych materyjałaŭ, utraja tańniejšaje za toje, što my kuplali za miažoj.
Padčas intervju byŭ pakazany i novy telefonny aparat uradavaje suviazi, raspracavany ŭ kancy minułaha hoda, jaki taksama tańniejšy za zamiežnyja anałahi.
«Usie pryłady ŭradavaj suviazi my nie možam pakazać, bo siudy ŭvachodzić jašče i šyfr-aparatura, darečy, taksama biełaruskaj vytvorčaści. [Jakasnyja] kryptahrafija, suviaź — adzin z elemientaŭ niezaležnaści dziaržavy.
Niamnohija krainy mohuć pachvalicca tym, što ŭ ich jość takija mahčymaści. U nas hetyja mahčymaści jość», — zapeŭniŭ Valeryj Vakulčyk.
***
Kamientary