Litoŭskija banki rezka ŭźniali pracent, pad jaki vydajucca kredyty. Hiermanija vyłučaje 400 młrd eŭra na ŭratavańnie bankaŭskaj systemy. A ŭ Rasii znoŭ začyniłasia birža, i Pucin abiacaje dapamohu kampanijam, stratehična važnym dla krainy abo asobnych rehijonaŭ.
Finansavy kryzis, što skuŭ śviet, vymusiŭ litoŭskija banki zrabić umovy kredytavańnia bolš žorstkimi. Padnialisia pracentavyja staŭki, kupcy musiać rabić bolšy pačatkovy ŭniosak. Praŭda, da biełaruskich pracentaŭ — na siońnia heta prykładna 15 u valucie i 18 u rublach — litoŭskim bankam jašče daloka. Usio ž žychary Litvy, jakija mieli, naprykład, palepšyć svaje žyllovyja ŭmovy, kryzis adčuli.
Kvatery pry hetym patańnieli, varta zaznačyć. Tyja samyja tendencyi začapili Ŭkrainu. Nieruchomaść u rehijonach tut patańnieła ŭžo na 20—30 %. Ale ŭ Kijevie ceny trymajucca.
Stała viadoma, što
ŭrad Niamieččyny ŭ metach stabilizacyi finansavaj systemy nadaść bankam FRH kala €400 młrd.
Pakiet dapamohi hruntujecca na eŭrasajuzaŭskim rašeńni.
Brytanija padtrymaje svaje banki na $69 młrd. Urad vykupić značnyja pakiety akcyj Karaleŭskaha banku Šatlandyi, Lloyds TSB, Barclays i HBOS. Pieršy i apošni buduć praktyčna nacyjanalizavanyja.
Rynki zreahavali na ŭmiašalnictva dziaržavaŭ pazytyŭna: u paniadziełak upieršyniu za doŭhi čas raspačaŭsia rost kacirovak.
Tolki ŭ Rasii ŭ paniadziełak adbyłosia advarotnaje, birža znoŭ začyniłasia — za pieršuju hadzinu tarhoŭ akcyi ŭpali na 6 %.Padličana, što rasiejskija navaśpiečanyja aliharchi stracili ŭžo 55 % kapitalizacyi svaich pradpryjemstvaŭ. Premjer Pucin paabiacaŭ dapamohu kampanijam, ale nia ŭsim, a tolki stratehična važnym dla krainy abo asobnych rehijonaŭ. Raniej pracu prypynili KamAZ, HAZ i častka metalurhičnych vytvorčaściaŭ. Pryčyna — rezkaje padzieńnie popytu.
Asabliva ciažkaje stanovišča Iślandyi, Pakistanu i Ŭkrainy. Nad hetymi dziaržavami navisła pahroza defołtu.
Kab zhasić paniku na ŭnutranym rynku, u paniadziełak Nacyjanalny bank Ukrainy svaim rašeńniem abmiežavaŭ likvidnaść bankaŭskich depazytaŭ. Zhodna z rašeńniem, banki pavinny paźbiahać daterminovaj vydačy depazytaŭ, raniej času, paznačanaha va ŭmovie. Abmiežavańni nie datyčać dziaržaŭnych ablihacyj, aperacyj na bankaŭskim rynku i depazytaŭ, čas vydačy jakich pavodle ŭmovy nadyšoŭ. Adnačasova Nacbank Ukrainy ŭvioŭ hraničnyja viłki abmiennaha kursu valutaŭ u miežach plus‑minus 5 % ad aficyjnaha kursu.
Ukraina pieražyvaje ciažkija ekanamičnyja časy. Źnizilisia prodažy asnoŭnaha ekspartnaha tavaru: stali. Adnačasova pahoršyłasia finansavaje stanovišča šerahu bankaŭ, što pryviało da ŭźniknieńnia paničnych nastrojaŭ układčykaŭ.
Ćviorda trymajecca pakul ekanomika Polščy. Akramia nievialikaha źnižeńnia tempaŭ rostu, inšych nehatyŭnych źjavaŭ jana nie pakazvaje.
Što da Biełarusi, to jaje ekanomika, zaležnaja ad rasijskich datacyj, zaŭvažyć prablemy tolki ŭ vypadku istotnaha padzieńnia cenaŭ na naftu, kali kryzis vyčarpaje zołatavalutnyja zapasy Rasii.Pakul rasiejskija rezervy źnizilisia tolki na 5 % (biełaruskija za vierasień — na 10 %), i pakul niama padstavaŭ čakać rezkaha paharšeńnia sytuacyi.
