«Jon daŭ mnie mokry ručnik, kab ja nakryła hałavu i tvar». Jak Maksim Mirny z žonkaj vyratavalisia na pažary
Historyja z žyćcia lehiendarnaha biełaruskaha tenisista, pra jakuju vy naŭrad ci čuli.
U Instagram žonka Maksima Mirnaha Ksienija raspaviała pra toje, jak jany vyžyli padčas pažaru ŭ adnym z hatelaŭ Ryma ŭ 2004 hodzie. Na ščaście, trahiedyi ŭdałosia paźbiehnuć dziakujučy ŭpeŭnienym dziejańniam tenisista.
«1 maja 2004 hoda staŭ dla mianie i Maksa dniom našaha ahulnaha naradžeńnia. Užo 14 hadoŭ prajšło, a ja ŭsio pamiataju, jak byccam heta było ŭčora. Pažar u prestyžnym hateli Parka dej Prynčypie zabraŭ tady žyćcio 3 čałaviek.
Hłybokaj nočču mianie pabudzili dziŭnyja huki za ścianoj, ja padyšła da dźviarej, pahladzieła ŭ vočka i žachnułasia — tam byŭ ahoń. Viarnuŭšysia nazad u pakoj z krykami: «Maks, tam niešta haryć!».. ja ź ciažkaściu razvarušyła jaho, pad ranicu son taki hłyboki, ale mahčyma, heta dym užo rabiŭ svaju ciomnuju spravu … Maks pasprabavaŭ patelefanavać na recepšn, ale suviazi ŭžo nie było.
«Nam treba biehčy ŭniz», — spakojna skazaŭ jon mnie, namačyŭ chałat i daŭ mnie mokry ručnik, kab ja nakryła hałavu i tvar … Ja stała malić jaho nie rabić hetaha, nie ŭjaŭlajučy, kudy nam treba biehčy: «Pojdziem na bałkon, tam chutka pryjeduć pažarniki i zdymuć nas adtul… » Ale jany pryjechali tolki praź niekalki hadzin.
Zhareŭ uvieś 3 pavierch, na jakim naš pakoj byŭ apošni pa kalidory, a ačah uzharańnia — praz adzin pakoj ad našaha. Adziny šaniec dla nas vyratavacca byŭ pałajučy kalidor da leśvicy, jaki treba było chutka prabiehčy. I my heta zrabili razam. A praź niekalki chvilin z žacham hladzieli z vulicy, jak pałaje ŭ ahni naš pakoj.
Ščyra kažučy, ja dumała, što paśla ŭsioj hetaj historyi my pieršym ža rejsam vierniemsia nazad u Miensk, ale Maks, nasupierak maim čakańniam, tolki paprasiŭ tatu vysłać jamu rakietki i formu i ŭžo praź dzień hulaŭ … i darečy, vyjhraŭ tady hety rymski turnir u pary z Machiešam Bchupaci.
P.S. Napiaredadni viečaram, viartajučysia ź viačery ŭ haścinicu, my doŭha špacyravali, razmaŭlali pra kachańnie, maryli pra budučyniu i dziakavali Bohu za toje, što znajšli narešcie adzin adnaho i ščaślivyja …. Ciapier mnie zdajecca, što takoje žadańnie žyć i padziaka tamu, što my mieli, vyratavała nam tady žyćcio … »
Ciapier čytajuć
«Kaleśnikava kaža, što nie źbirajecca vychodzić, pakul nie vyjdzie apošni z palitviaźniaŭ»17
«Kaleśnikava kaža, što nie źbirajecca vychodzić, pakul nie vyjdzie apošni z palitviaźniaŭ»
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami2626
Kamientary