Prezident ZŠA Donald Tramp prybyŭ u Sinhapur dla ŭdziełu ŭ samicie z paŭnočnakarejskim lidaram Kim Čen Ynam, samit pavinien adbycca ŭ aŭtorak. Kim Čen Yn ŭžo prybyŭ u Sinhapur u druhoj pałovie dnia niadzieli.
Tramp «vielmi vieryć» u nastupnuju sustreču, ale pryznaŭ, što, vypraŭlajučysia na samit, jon stupaje na «nieviadomuju terytoryju», pieradaje Hołas Amieryki.
Adkazvajučy na pytańnie «Hołasu Amieryki» niepasredna pierad tym, jak vylecieć u Sinhapur paśla zaviaršeńnia samitu «Vialikaj siamiorki», jaki prajšoŭ u Kanadzie, Tramp zajaviŭ, što «adčuvaje upeŭnienaść» u suviazi ź biesprecedentnaj sustrečaj pamiž dziejučym prezidentam ZŠA i pradstaŭnikom siamji, jakaja na praciahu troch pakaleńniaŭ žaleznaj rukoj kiruje adnoj z samych zakrytych krain śvietu.
Razam z tym Tramp papiaredziŭ, što ŭ Kim Čen Yna nie budzie inšaj mahčymaści, kali pieramovy nie pojduć pa pravilnym šlachu.
Tramp i inšyja pradstaŭniki ŭradu ZŠA zajavili, što im udałosia prasunucca napierad u pieramovach ab hatoŭnaści Kim Čen Yna admovicca ad usich najaŭnych u KNDR jadziernych uzbrajeńniaŭ i balistyčnych rakiet dalokaha radyusa dziejańnia. Hety prahres moža pryvieści da zaklučeńnia mirnaj damovy i farmalnaha spynieńnia stanu vajny na Karejskim paŭvostravie, jaki zachoŭvajecca kala 70 hadoŭ.
Ci stanie zaklučeńnie takoha pahadnieńnia mahčymym? Jak abviaściŭ Tramp ŭ niadzielu, jon zrazumieje heta amal adrazu paśla pačatku sustrečy.
«Dumaju, ja zrazumieju ź pieršaj chviliny — pa kantaktach, pa adčuvańniach — tak ja zvyčajna rablu», — skazaŭ prezident, majučy na ŭvazie svoj dośvied zaklučeńnia ździełak u bytnaść biznesmienam.
Kali hetyja adčuvańni nie buduć pazityŭnymi, to Tramp, pavodle jaho słoŭ, «nie budzie hublać času darma».
«Heta lidar, ab asabistych jakaściach jakoha sapraŭdy ničoha nieviadoma, — skazaŭ Tramp. — [Ale niahledziačy na heta], my prystupajem da pracy, i majem vielmi pazityŭny nastroj. Ja liču, što vielmi dobra padrychtavaŭsia».
Adkazvajučy na pytańnie «Hołasu Amieryki», ci maje jon namier padniać pytańni ab aburalnych parušeńniach pravoŭ čałavieka ŭ Paŭnočnaj Karei, uklučajučy sistemu łahieraŭ dla hramadzianskich asob, pryznanych vorahami dziaržavy, i pra los japoncaŭ, jakich paŭnočnakarejskija ahienty vykradali na praciahu dziesiacihodździaŭ, Tramp skazaŭ: «My budziem padymać ŭsie pytańni».
Prezidenta supravadžajuć dziaržsakratar Majk Pampiea, jaki ŭ pracesie padrychtoŭki da samitu dvojčy naviedvaŭ Pchieńjan, a taksama daradca pa nacyjanalnaj biaśpiecy Džon Bołtan, jaki zajmaje žorstkuju pazicyju ŭ adnosinach z Paŭnočnaj Karejaj. Na borcie prezidenckaha samalota taksama znachodziŭsia kiraŭnik aparatu Biełaha doma Džon Keli i pres-sakratar Biełaha doma Sara Chakabi Sanders.
Kamientary