Łukašenka i Abama

Možna prahnazavać, što aficyjny Miensk vykarystaje efekt naviny i pieramieny dla praktyčnych krokaŭ pa narmalizacyi adnosinaŭ. Piša Barys Tumar.

Amerykancy paŭtara hodu pryhladalisia, kab vybrać sabie kiraŭnika. Marafon skončyŭsia. Amerykancy nahledzieli sabie pieršaha čornaha prezydenta.

Chto b jak da Abamy ni staviŭsia, heta novaja era.

Los čałaviectva, atamny čamadančyk i ryčahi suśvietnaj finansavaj systemy trapili ŭ ruki Baraka Chasejna, apošnija rasavia barjery ŭpali. 50 hadoŭ tamu, na našaj pamiaci, čornyja nia mieli poŭnych pravoŭ. Dyj nia tolki jany – jašče zusim niadaŭna ŭ bolšaj častcy śvietu palityčnych pravoŭ, prava kiravać i vyrašać zakony ŭłasnaści, nia mieli taksama žančyny. Na tym samym histaryčnym pramiežku adbyłasia i vialikaja dekalanizacyja: mała chto siońnia zadumvajecca, što ŭ Biełarusi tutejšych pačali pryznačać na hałoŭnyja kiraŭničyja pasady tolki 50 hadoŭ tamu, i tolki 17 hadoŭ tamu biełarusy pačali sami vybirać svaje ŭrady. Abama – heta amerykanski vynik usiaśvietnaje pieramieny sposabaŭ farmavańnia palityčnych elitaŭ i emansypacyi rasavych mienšaściaŭ.

Jak abrańnie Abamy adabjecca na śviecie?

Suśvietnaja ekanomika ŭvajšła ŭ tryvožny peryjad kryzisu, siłu i praciahłaść jakoha pakul niama jak pradkazać.

Kali najaŭnyja finansavyja padstrachoŭki vytrymajuć, heta budzie depresija, supastaŭnaja z 1970‑mi. Kali rezervaŭ akažacca zamała, kab kampensavać pierabory hlabalnaha kapitalizmu, to moža akazacca, što śviet staić na parozie poŭnaha pieraŭładkavańnia suśvietnaj haspadarki i navat palityčnaj systemy. Vialikaje padzieńnie vytvorčaści zdolnaje vyklikać biespracoŭje, dramy, haładamory, krach starych bahatyroŭ i sproby ŭratavańnia praź pieradzieł resursaŭ – jak toje było ŭ 30‑ia hady minułaha stahodździa byli radykalnaj formaj taho. Jak daść rady Abama? Mnohija ŭžo ciapier prymiarajuć na jaho kaścium vialikaha Ruzvelta. Z Abamam źviazvajuć nadzieju na azdaraŭleńnie ekanamičnych mechanizmaŭ. Sam jon abiacaŭ taksama sapraŭdnuju enerhietyčnuju revalucyju – kab Ameryka raźviła ŭnutranyja krynicy enerhii, pierastała impartavać naftu, rezka skaraciła enerhajomistaść VUP. Adnak klučavuju zadaču vynachodžańnia alternatyvy vuhlevadarodam naŭrad ci ŭdasca vyrašyć u valavym paradku.

Ad Abamy čakajuć taksama novaje idealohii dla zachodniaha śvietu, abnoŭlenaha duchu Zachadu, duchu prahresu na hruncie svabody i adkaznaści indyvida. Asabistaja pryvabnaść maładoha čykahca i jahony bliskučy intelekt dazvalajuć paraŭnańni z Kienedzi.

Ambitny prezydent ZŠA budzie ŭ lubym razie kiravacca nacyjanalnymi intaresami svajoj superdziaržavy, i treba dumać, u čym jany supadajuć ź biełaruskimi.

Kali Abama zrealizuje svaju enerhietyčnuju prahramu, heta pryśpiešyć vyzvaleńnie Biełarusi.

Kali Abama nadaść Zachadu novy duch, heta pryśpiešyć vyzvaleńnie Biełarusi. Kali ž jamu nia ŭdasca vykanać svaje pieradvybarčyja abiacańni, heta zaciahnie naša vyzvaleńnie.

Peŭnyja pavaroty palityki bližejšaha miesiaca možna pradkazać ź vialikaj dolaj imaviernaści.

Viedajučy Łukašenku, možna prahnazavać, što jon pastarajecca maksymalna vykarystać efekt Abamy — efekt naviny i pieramieny, navat kali ni sutnasnaj naviny, ni pieramieny ŭ zamiežnaj palitycy Vašynhtonu nia budzie.

Možna prahnazavać, što Łukašenka vykarystaje the change we can believe in dla praktyčnych krokaŭ pa narmalizacyi adnosinaŭ. Pavysicca ŭzrovień dyplamatyčnych adnosinaŭ miž krainami, viernucca pasły, buduć admienienyja sankcyi z boku ZŠA. Moža adbycca navat źmiena prapahandysckaha dyskursu — čaho b nie. Adbyłosia ž toje ŭ adnosinach z Eŭropaj, a čamu b nie z Novaj Amerykaj? Urešcie, nichto nie admianiaŭ staroha pryncypu kryzisnaj hieapalityki: susied tvajho susieda — tvoj siabar.

Narmalizacyja adnosinaŭ nia prosta ŭpisvajecca ŭ taktyku łukašenkaŭcaŭ na hetym etapie, jana jašče i supadaje ź pieradvybarnymi abiacańniami Abamy,

jaki nastojliva dakazvaŭ patrebu pieramovaŭ i pierakanańnia dyktataraŭ. Łukašenka, zdajecca, budzie nie adzin taki ŭ čarzie: sam hanarysty Čaves praciahnuŭ Abamu ruku. Što vy chočacie: ekanamisty padličyli, što biudžet Rasii vykonvajecca biez sekvestraŭ pry canie na naftu 70 dalaraŭ za barel, Biełarusi — pry 82‑ch, a Venesuele treba až 90. Siońnia ž cana paniziłasia da 65, i kudy dziajecca pycha dyktataraŭ. Z svajho boku, i Ameryka siońnia vymušanaja dziejničać inakš.

• 0
• 0
• 0
• 0
• 0
• 0
• 0
• 0