Prezident ZŠA Donald Tramp pryznaŭ, što jaho syn sustrakaŭsia z rasiejskim advakatam u červieni 2016 hoda «dla atrymańnia infarmacyi pra apanienta», ale ličyć heta zakonnym, piša bbc.com.
Havorka idzie pra sustreču Donalda Trampa-małodšaha z rasijskaj jurystkaj, źviazanaj z Kramlom, Natallaj Viesialnickaj u červieni 2016 hoda.
Śpiecprokuror Robiert Miuler rasśleduje infarmacyju amierykanskaj vyviedki ab tym, što rasiejcy ŭpłyvali na vybary dla pieramohi Trampa. Prezident admaŭlaje zmovu. Jon nazvaŭ hetaje rasśledavańnie «samym vialikim palavańniem na palityčnych viedźmaŭ u historyi».
Rasija nieadnarazova admaŭlała pretenzii ab ŭmiašańni ŭ prezidenckija vybary 2016 hoda, dzie Tramp pieramoh supiernika ad demakrataŭ Chiłary Klintan.
Što skazaŭ Tramp?
U niadzielu aŭtarytetnyja amierykanskija ŚMI paviedamili, što prezident ZŠA zaniepakojeny mahčymymi jurydyčnymi prablemami, jakija mohuć paŭstać u Donalda Trampa-małodšaha z-za sustrečy 9 červienia 2016 sa spadaryniaj Viesialnickaj. Jany spasłalisia na niekalki nienazvanych krynic.
Donald Tramp adkazaŭ: «Źjavilisia fejkavyja naviny i absalutnaja vydumka pra toje, što mianie niepakoić sustreča majho vydatnaha syna Donalda ŭ Trump Tower».
«Heta była sustreča dla atrymańnia infarmacyi pra apanienta, jana absalutna zakonnaja. Takija sustrečy stała pravodziacca ŭ palitycy — heta nikudy nie źnikła». «Ja nie viedaŭ pra heta!» — dadaŭ Tramp.
Čamu heta važna?
Apošni tvit prezidenta, miarkujučy pa ŭsim, supiarečyć papiarednim zajavam kamandy Trampa ab hetaj sustrečy.
Kali New York Times upieršyniu napisała pra hetyja pieramovy, Tramp-małodšy zajaviŭ, što jon abmiarkoŭvaŭ sa spadaryniaj Viesialnickaj u asnoŭnym temu ŭdziełu amierykancaŭ va ŭsynaŭleńni rasijskich dziaciej. Adnak paśla pryznaŭ, što pahadziŭsia na sustreču paśla taho, jak daviedaŭsia, što na joj mohuć prapanavać infarmacyju ab Chiłary Klintan.
Amierykanskija ŚMI paviedamili, što prezident ZŠA braŭ udzieł u padrychtoŭcy zajavy svajho syna. Hetuju infarmacyju paźniej paćvierdzili advakaty Trampa.
Ciapier čytajuć
Na mitynhu ŭ Vilni palicyja zatrymała pravakatara. A Cichanoŭski zajaviŭ pra namier dabivacca sustrečy ź Zialenskim1
Kamientary