440 ŭdzielnikam antyŭradavaj manifiestacyi ŭ Buchareście, u tym liku 24 žandaram, była akazana miedycynskaja dapamoha, 65 čałaviek trapili ŭ balnicu, paviedamlajuć infarmahienctvy.
Prezident Rumynii Kłaŭs Jochanis asudziŭ razhon akcyi. Ab hetym kiraŭnik dziaržavy napisaŭ u piatnicu ŭ svaim Fejsbuku.
«U sapraŭdnaj demakratyi kožny čałaviek maje prava pratestavać, a hvałt niedapuščalny, niezaležna ad palityčnych pazicyj, — padkreśliŭ jon. — Ja ćviorda asudžaju žorstkaje, zusim niepraparcyjnaje ŭ adnosinach da pavodzin bolšaści ludziej na płoščy Viktoryi ŭmiašańnie žandarmieryi. Sproba zdušyć volu ludziej hvałtoŭnaj reakcyjaj sił pravaparadku — heta rašeńnie, vartaje asudžeńnia. Ministr unutranych spraŭ pavinien terminova dać tłumačeńni ŭ suviazi z tym, jak jana [žandarmieryja] kaardynavała padziei hetym viečaram».
10 žniŭnia ŭviečary žandarmieryja z dapamohaj hranat sa ślezaciečnym hazam i vadamiotaŭ razahnała antyŭradavuju manifestacyju, u jakoj brali ŭdzieł dziasiatki tysiač čałaviek.
Inicyjatarami antyŭradavaj akcyi pratestu pad łozunham «Dyjaspara doma!» byli rumyny, jakija žyvuć i pracujuć za miažoj. Jany patrabujuć adstaŭki levacentrysckaha ŭrada i daterminovych vybaraŭ (heta značyć, likvidacyi ciapierašniaj parłamienckaj bolšaści).
Ad 3 da 5 młn rumyn vyjechali na zarobki za miažu, hałoŭnym čynam u zachodniejeŭrapiejskija krainy. Mnohija ź ich śćviardžajuć, što pakinuli Rumyniju z-za karupcyi, nizkich zarobkaŭ i adsutnaści pierśpiektyŭ.
Tut ličycca, što tyja, chto žyvie i pracuje za miažoj, — heta ŭ asnoŭnym elektarat pravaj apazicyi. Tak, na prezidenckich vybarach 2014 hoda Kłaŭs Jochanis niečakana pieramoh, dziakujučy hałasam dyjaspary. Mnohija ekśpierty, adnak, adznačajuć, što vialikuju častku ŭdzielnikaŭ akcyi pratestu składali miascovyja žychary.
U Rumynii pravacentryscki prezident Jochanis suisnuje ź levacentrysckimi parłamienckaj bolšaściu i ŭradam.
Heta palityčnaje supraćstajańnie pryniało, hałoŭnym čynam, formu baraćby z karupcyjaj. Za apošnija niekalki hadoŭ rumynskija prakurory adpravili za kraty šmatlikich čynoŭnikaŭ i biźniesmienaŭ, u bolšaści svajoj sacyjał-demakrataŭ. U svaju čarhu, levyja abvinavačvajuć prezidenta ŭ pieravyšeńni ŭładnych paŭnamoctvaŭ.
Kamientary