Prezydent ZŠA Donald Tramp uviečary ŭ aŭtorak, 21 žniŭnia, vystupajučy na mitynhu ŭ Čarłstanie (Zachodniaja Virdžynija), zajaviŭ, što Izrail «zapłacić vysokuju canu» za pieranos amerykanskaj ambasady ŭ Ijerusalim. Pavodle jaho, palestyncy «atrymajuć niešta vielmi dobraje» ŭ abmien na hety krok. «Tamu što ciapier ich čarha», — skazaŭ Tramp, nia daŭšy bolš kankretnych tłumačeńniaŭ.
Hetuju zajavu Trampa cytujuć mnohija amerykanskija i izrailskija ŚMI, u pryvatnaści sajt hazety The Jerusalem Post.
Amerykanski prezydent praciahvaje nastojvać na tym, što pieranos ambasady ZŠA ŭ Jerusalim byŭ «krokam na šlachu da miru». Jon adnosić hetaje rašeńnie da svaich palityčnych dasiahnieńniaŭ. Tamu jon uźniaŭ temu ambasady ŭ Izraili ŭ kancy svajoj pramovy, pryśviečanaj, u asnoŭnym, bolš aktualnym dla amerykancaŭ temam.
U svaim vystupie Tramp padkreśliŭ, što ambasadu ZŠA varta było pieranieści ŭ Jerusalim jašče šmat hadoŭ tamu, ale heta nie było zroblena z pryčyny nierašučaści jaho papiarednikaŭ na prezydenckaj pasadzie.
Kamientary