Našto Łukašenku spatrebiŭsia mienavita Rumas? Viersija Andreja Parotnikava

Źmiena premjer-ministra Biełarusi vyklikała peŭnaje ažyŭleńnie. I jak by pryčyna jość: zamiest nievyraznaha biurakrata Andreja Kabiakova pryjšoŭ pierakanany rynačnik i finansist Siarhiej Rumas. Tolki voś u mianie asabliva entuzijazmu niama.

U nas bolšaść čynoŭnikaŭ — pierakananyja rynačniki. Prynamsi, na słovach. Ale być rynačnikam i ŭmieć pracavać u rynkavych umovach — dźvie vialikija roźnicy. Siarhiej Rumas pa pieršaj adukacyi naohuł vajenny finansist. A vajennyja finansy da narmalnych majuć vielmi apasrodkavanaje dačynieńnie. Svaju pracoŭnuju dziejnaść pravioŭ pieravažna ŭ bankaŭskaj śfiery. Ale jakoj: Biełarusbank, Biełahraprambank, Nacbank, Bank raźvićcia. Kažučy praściej — pry dziaržaŭnych hrošach, pa absłuhoŭvańni dziaržaŭnych prahram i palityki ŭ śfiery ekanomiki. H.zn. praktyčnaha dośviedu pracy ŭ narmalnym kankurentnym asiarodku ŭ Siarhieja Rumasa niama.

Dalej, chaču nahadać, što heta jaho druhi prychod va ŭrad. U studzieni 2010 hoda z pasady staršyni praŭleńnia Biełahraprambanka jon byŭ pryznačany vice-premjeram i kuryravaŭ ekanamičnyja pytańni. Praz 2,5 hoda pakinuŭ Saŭmin i ŭznačaliŭ Bank raźvićcia. U jakim ad bankaŭskaha — tolki nazva. Za čas znachodžańnia va ŭradzie niejkich asablivych hrachoŭ za im zaŭvažana nie było. A tamu pierachod jaho ŭ Bank raźvićcia, chutčej za ŭsio, źviazany ź jaho asabistym žadańniem: nie mocna čałaviek radavaŭsia vice-premjerskamu kresłu. A tamu i jaho viartańnie ŭ jakaści kiraŭnika ŭrada mahło być daloka nie tolki pa svajoj achvocie. Ale i ŭ vyniku prapanovy, ad jakoj niemahčyma admovicca. Naprykład, u styli «abo premjer-ministr, abo ŭ Oršu».

Siarhiej Rumas moža być choć trojčy rynačnikam. Prablema ŭ tym, što ŭ našaj sistemie ŭrad — rabočy orhan pry prezidencie. A premjer-ministr isnuje, kab «usio jak u ludziej było». My rehularna možam bačyć infarmacyju ab tym, jak ministry chodziać na spravazdaču da Alaksandra Łukašenki. Ale ja nie mahu ŭzhadać, kab ministry chadzili na spravazdaču da premjera. Moža, prosta pra heta nie paviedamlajuć. Pry takoj sistemie piersona kiraŭnika ŭrada naohuł mała na što ŭpłyvaje. Na žal.

I niejak zabyvajecca, što siarod vice-premjeraŭ, jakija stracili pasadu, akazaŭsia i rynačnik dalej niama kudy Vasil Maciušeŭski. Kali b havorka išła ab realnym farmiravańni ŭrada reformaŭ, to jon by pasadu jak minimum zachavaŭ, a mahčyma, i vyras by da premjera.

Navošta ž Łukašenku spatrebiŭsia mienavita Rumas? Usio prosta: va ŭmovach nievyraznych pierśpiektyŭ ekanamičnaj padtrymki z uschodu, znoŭ stała pytańnie adnaŭleńnia adnosinaŭ z MVF. A dla hetaha spatrebiŭsia adnosna śviežy tvar z rename prahresista i rynačnika. Darečy, adsiul i vykazvańnie Łukašenki, što MVF nie patrabuje pavyšeńnia kvartpłaty — heta ŭsio padkopy raniejšaha kiraŭnictva ŭrada.

• 0
• 0
• 0
• 0
• 0
• 0
• 0
• 0