U Ryzie vyjavili hrupu rasiejskich infarmataraŭ ź liku hramadzian Łatvii, dva ź ich paśpieli źjechać u Biełaruś

Jak pišuć łatvijskija vydańni, aryšty adbylisia dziakujučy dakumentam, atrymanym arhanizacyjaj rasiejskaha apazycyjanera Michaiła Chadarkoŭskaha «Daśje Centar» i pieradadzienym prahramie «Nekā personīga».

«Materyjały pakazvajuć, što «Bałtyjskija antyfašysty» — heta nia prosta hrupa rasiejskich zaŭziataraŭ. Jany sprabujuć trapić na zavody pa vytvorčaści dronaŭ u Łatvii, źbirać infarmacyju ab pieramiaščeńni vajskovaj techniki i ab tym, chto robić achviaravańni Ŭkrainie ci chodzić z ukrainskaj symbolikaj», — paviedamili ŭ teleprahramie.

Aŭtary taksama adznačyli, što rasiejskija infarmatary rychtavali śpisy ŭkraincaŭ i prychilnikaŭ Ukrainy, vyśviatlali ich persanalnyja źviestki i numary mašyn, na jakich jany pieramiaščalisia ŭ Łatvii, i pieradavali ich Rasiei.

U Słužbie dziaržaŭnaj biaśpieki Łatvii paviedamili ahienctvu LETA, što «hrupa fizyčnych asobaŭ, jakija nazyvali siabie «Bałtyjskija antyfašysty», pačała rasšyrać i kaardynavać dziejnaść, nakiravanuju suprać nacyjanalnaj biaśpieki Łatvii, vykarystoŭvajučy stvoranyja dla hetaha hrupy suviazi na platformie Telegram. Kryminalny praces suprać hetaj hrupy pačali ŭ listapadzie 2022 hodu.

Dva ŭdzielniki hrupy — Taciana Andryjec i Alaksandar Žhun — ciapier znachodziacca pad sudom u Łatvii. Inšyja — Siarhiej Vasiljeŭ (nazyvaŭ siabie kiraŭnikom «Bałtyjskich antyfašystaŭ») i Stanisłaŭ Bakajns — paśpieli vyjechać u Rasieju, a Viktoryja Matule i Raman Samul — u Biełaruś.

Što viadoma pra tych, chto vyjechaŭ u Biełaruś

U publikacyjach dziaržaŭnych ŚMI Biełarusi sapraŭdy zhadvajucca imiony Viktoryi Matule i Ramana Samula.

Raman Samul i jahonaja žonka Volha atrymali ŭ Biełarusi status uciekačoŭ. Jany razam z maleńkaj dačkoj, jakaja naradziłasia ŭžo ŭ Biełarusi, žyvuć u svaim budynku, jaki kupili ŭ sielskaj miascovaści. Ale ŭ svaich interviju dziaržaŭnym ŚMI jany nie zhadvajuć nazvu vioski, u jakoj žyvuć.

Spačatku Raman pajšoŭ pracavać u kałhas, a potym jaho zaprasili pracavać pazaštatnym žurnalistam u Biełteleradyjokampanii. Usie planujuć nieŭzabavie atrymać hramadzianstva Biełarusi.

U interviju infarmacyjnamu ahienctvu BiełTA Samul paviedamiŭ, što vymušany byŭ vyjechać z Łatvii, i pakul u Biełarusi vyrašałasia pytańnie jaho lehalizacyi, vielmi chvalavaŭsia za svaju siamju, jakuju, pavodle jaho, «mahli vykarystać, kab vymanić jaho nazad».

U 2022 hodzie jon udzielničaŭ u vybaraŭ u parlament.

«Ja nia stolki chacieŭ trapić u palityku, kolki chacieŭ, kab mianie pačuli. Ja išoŭ ad rasiejskaha rehijonu ŭ Łatvii — Łathalii. I ja kazaŭ rečy, jakija nia vielmi papularnyja. Ciapier mnie za heta inkryminujuć try artykuły. Ledź nia ŭ zdradzie Radzimie abvinavačvajuć», — raskazvaŭ Raman Samul ahienctvu BiełTA.

Ciapier jaho aktyŭna vykarystoŭvajuć jak śviedku, jak nibyta kiepska žyć u Eŭropie, i ŭ pryvatnaści ŭ Łatvii, i naadvarot, jak dobra žyć u sacyjalna aryjentavanaj Biełarusi, u jakoj jość usio dla dobraha žyćcia.

Viktoryja Matule, jak i Raman Samul, taksama paśpieła vyjechać z Łatvii ŭ Biełaruś u 2022 hodzie. Jana była administrataram adnaho z Telegram-kanałaŭ «Bałtyjskich antyfašystaŭ». Ale ŭ Biełarusi jana žyła mienš za dva miesiacy, a potym usio ž vyjechała ŭ Rasieju.

Jak jana raskazvała ŭ interviju dziaržaŭnamu telekanału STV, jana trapiła ŭ pole zroku łatvijskich specsłužbaŭ paśla taho, jak vyrašyła ŭskłaści kvietki 9 traŭnia da pomniku vyzvalicielam u Ryzie. Pavodle jaje, za joj sačyli i prasłuchoŭvali telefon.

«Ja pačała bajacca, što da mianie taksama pryjduć. Tamu pryniała rašeńnie jechać u Biełaruś, bo byŭ biaźviz. I praź litoŭskuju miažu ja pajechała, tamu što, jak vyśvietliłasia paźniej, maje źviestki byli pieradadzienyja na miažu. Kali ja traplaju na miažu Łatvii, to mianie pieradajuć specsłužbam adrazu ž», — skazała Viktoryja Matule.

• 1
• 0
• 0
• 0
• 0
• 0
• 2
• 0