Alaksandr Łukašenka sustreŭsia z trecim prezidentam Ukrainy (2005-2010) Viktaram Juščankam, paviedamlaje pres-słužba kiraŭnika krainy. Admietna, što padčas sustrečy Juščanka pramaŭlaŭ pa-ŭkrainsku.
«Jość šmat prablem, jakija ja z zadavalnieńniem hatovy z vami abmierkavać, u tym liku i pa pazicyi Ukrainy ŭ SND. Jak viadoma, Ukraina faktyčna zajaviła ab vychadzie, ale aficyjna heta padzieja jašče nie nastupiła. I na apošnim samicie ŭ Dušanbe ŭkrainski ściah prysutničaŭ, jak zaŭsiody. Ja tak razumieju, što heta praces nie adnaho dnia. Napeŭna, i Ukrainie irvać usiakija suviazi z našymi dziaržavami paasobku i ŭ cełym z SND niavyhadna. Tamu budzie niejki praces. Moj punkt hledžańnia vy viedajecie. Ja zaŭsiody kazaŭ pra toje, što vyjści praściej, čym potym uvajści, kali treba budzie. Ale heta suvierennaja sprava Ukrainy, my vymušany z hetym ličycca», — skazaŭ biełaruski kiraŭnik.
«Pa padziejach va Ukrainie vy maju pazicyju viedajecie. My ni ŭ jakim razie nie chočam umiešvacca ŭ padziei va Ukrainie. Hruba kažučy, heta nie naša sprava, kali nas nie prosiać. Choć, ščyra skažu, — my pra heta pahavorym — upłyŭ padziej va Ukrainie na nas vielmi vialiki. Asabliva ŭ płanie, što nas turbuje, — prytok zbroi praz ukrainskuju miažu. Vielmi šmat my kanfiskoŭvajem zbroi», - adznačyŭ kiraŭnik Biełarusi.
Pavodle jaho słoŭ, vyjaŭlajucca fakty, kali zbroja idzie ŭ Biełaruś z Ukrainy praz Rasiju. «Kali kryminalnyja spravy rasśledujucca, my taksama takija fakty fiksujem. I ja prezidentu Rasii pra heta kazaŭ. Voś heta nas bolš za ŭsio turbuje», — zajaviŭ kiraŭnik Biełarusi.
«Ale, ščyra kažučy, mahło b być našmat horš. I kali ŭžo ščyra kazać, niama takoj azłoblenaści ŭ dačynieńni da biełarusaŭ z boku ŭkraincaŭ. Niama hetaha sutyknieńnia narodnaj dumki i narodaŭ. Voś heta samaje hałoŭnaje. Heta abnadziejvaje. Heta asnova našych dobrych adnosin, — adznačyŭ Alaksandr Łukašenka. — Prablem šmat, i ja hatovy abmierkavać hetyja prablemy».
Zakranajučy dvuchbakovyja adnosiny Biełarusi i Ukrainy, kiraŭnik dziaržavy ŭspomniŭ i pra čas prezidenctva Viktara Juščanki.
«Kali paraŭnoŭvaješ ciapierašni čas… Ja ŭžo nie tolki kažu pra Ukrainu i Biełaruś, - i našy ŭzajemaadnosiny na postsavieckaj prastory. Viadoma, heta byŭ nie horšy čas, asabliva pamiž našymi dziaržavami. My pry ŭsich adroźnieńniach, roznych punktach hledžańnia zaŭsiody znachodzili niejki kansensus i vybudoŭvali našy adnosiny, — zajaviŭ Alaksandr Łukašenka. —I heta datyčycca nie tolki nas. Jak by ni było składana, i z Rasijskaj Fiederacyjaj znachodzili ahulnuju movu, uzajemaprymalnuju, ź inšymi dziaržavami. Usialak było, ale ŭ cełym zaŭsiody my vychodzili na pazityŭny vynik. I pa tavaraabarocie my tady vysokimi tempami raśli. Choć i ciapier u nas kryŭdzicca niama na što - pryrost tavaraabarotu 20-30 pracentaŭ. Darečy, u SND jašče vyšejšy. Druhi hod taki rost adbyvajecca. Było surjoznaje padzieńnie, a ciapier salidny rost i ŭ Jeŭrazijskim ekanamičnym sajuzie, i ŭ SND u cełym. Toje ž samaje adbyvajecca i z Ukrainaj».
U svaju čarhu Viktar Juščanka adznačyŭ, što ŭ jaho razumieńni dvuchbakovyja adnosiny ź Biełaruśsiu zaŭsiody byli idealnymi i na palityčnym uzroŭni, i na narodnym.
«My zaŭsiody znachodzili nieabchodnaje parazumieńnie ŭ samych składanych pytańniach. Ciapier toje, što adbyvajecca nie tolki va Ukrainie — heta vialikaje vyprabavańnie, heta vialikaja prablema dla ŭładkavańnia i našaha žyćcia jak nacyi, krainy, i susiedziaŭ, i Jeŭropy», — adznačyŭ eks-prezident Ukrainy.
Pavodle jaho słoŭ, z adnaho boku, va Ukrainie ludzi stali bolš kansalidavanyja, čym, naprykład, 5-10 hadoŭ tamu. «My praciahnuli adzin adnamu ruku bolš, čym kali-niebudź, bolš stała adzinstva», - skazaŭ jon.
Ź inšaha boku, Viktar Juščanka adznačyŭ składanaść terytaryjalnaha pytańnia, padkreśliŭšy, što prostaha adnakampanientnaha rašeńnia nie moža być znojdziena. «Vidavočna, havorka idzie pra doŭhaterminovy praces», — miarkuje eks-prezident.
Jon kanstatavaŭ, što na fonie ŭsich padziej unutrypalityčnaje žyćcio va Ukrainie taksama składanaje, bo jość šmat bakoŭ, jakija chočuć niešta ŭziać z kantekstu i na hetym rabić palityku. Viktar Juščanka vykazaŭ mierkavańnie, što pa hetaj pryčynie na prezidenckich vybarach moža być samaja vialikaja kolkaść kandydataŭ u historyi krainy. Jon adznačyŭ, što vostraja ŭnutrypalityčnaja dyskusija časta nie pracuje na stabilizacyju, ale ŭkrainski narod prachodzić vielmi važnuju nacyjanalnuju škołu.
Ciapier čytajuć
«Ja jechała ad vajny i bambiožak»: Jaŭhienija Čarniaŭskaja pra pierajezd na Kipr8
Kamientary