Hramadzianin Ukrainy pryjšoŭ z pavinnaj u SBU — jon raspavioŭ, što jaho nibyta zavierbavali biełaruskija pamiežniki. Rovienski sud urešcie vyzvaliŭ jaho ad adkaznaści.

Što zdaryłasia?
Ukrainiec raspavioŭ, što hod tamu jon jechaŭ praz punkt propusku «Nieviel» u Biełaruś. Tam jon nibyta byŭ zavierbavany padpałkoŭnikam apieratyŭna-vyšukovaha adździełu pamiežnaj słužby. Ad ukrainca patrabavalisia dadzienyja ab pieramiaščeńni kantrabandy, u tym liku — burštynu, jaki nielehalna ŭvoziać u Biełaruś.
Padpałkoŭnik paviedamiŭ, što jaho psieŭdanimam budzie «Artur» i navat pakinuŭ numar mabilnaha (numar jość u pastanovie suda, ciapier jon zabłakavany).
Paśla, pa słovach ukrainca, jon mieŭ jašče dźvie sustrečy z «Arturam», u listapadzie i śniežni. Ukrainca paprasili sabrać źviestki pra kantrabandu zbroi i «padabrać kandydataŭ dla pravakańnia supracoŭnikaŭ punktu propusku Nieviel na atrymańnie niepravamiernaj vyhady».
Treciaja sustreča nibyta adbyłasia ŭ studzieni 2018 hoda kala vioski Končycy, što ŭ Pinskim rajonie. Na joj «Artur» daŭ zadańnie sabrać infarmacyju pra dziejnaść ukrainskich pamiežnikaŭ: skład, kiraŭnictva, kolkaść supracoŭnikaŭ, techniku, infarmacyju pra supracoŭnikaŭ apieratyŭna-vyšukovaha adździeła ŭkrainskaha pamiežnaha atrada. Za heta hramadzianinu Ukrainy abiacali dapamahčy vyrašyć pytańni ź pierasiačeńniem biełaruska-ŭkrainskaj miažy i pieramiaščeńniem tavaraŭ z Ukrainy ŭ Biełaruś.
Ale ukrainiec vyrašyŭ «zdacca». U Rovienskaj vobłaści Ukrainy jon źviarnuŭsia da śpiecsłužbaŭ i raspavioŭ im hetuju historyju.
Paśla hetaha byŭ sud. Mužčynu vyzvalili ad kryminalnaj adkaznaści, bo złačynstva ździejśnić jon nie paśpieŭ, a zahadzia pryznaŭsia ŭ im i dobraachvotna pryjšoŭ u SBU.
Jakija jość pytańni?
Kali ŭsio, što raspavioŭ ukrainiec, praŭda, to nielha nie źviarnuć uvahu na niekatoryja momanty.
Pa-pieršaje, čamu mienavita jaho sprabavali zavierbavać? Chutčej za ŭsio, ukrainca spynili z kantrabandaj. Inakš čamu tady jon spačatku daŭ zhodu na supracoŭnictva? I čamu «Artur» abiacaŭ jamu dapamohu ź pierasiačeńniem miažy?
I chto taki hety ŭkrainiec? Čym jon zajmajecca na radzimie? Sabrać infarmacyju pra pieramiaščeńnie zbroi praź miažu niaprosta. Adkul vypadkovy čałaviek moža mieć padobnuju infarmacyju? A padrabiaznuju infarmacyju pra pamiežnikaŭ?
Zadańnie sabrać źviestki pra pamiežnikaŭ ukrainiec atrymaŭ u studzieni. A ŭ SBU pryjšoŭ tolki 31 lipienia, kali vieryć materyjałam z pastanovy suda. Čamu tak: sprabavaŭ, ale nie zmoh sabrać patrebnuju infarmacyju? Ci pieradaŭ usio, što znajšoŭ, a paśla pryjšoŭ zdavacca?
Što kažuć biełarusy?
Ničoha. U Pinskim pamiežnym atradzie paviedamili, što pakul niemahčyma źviazacca ani z načalnikam atrada, ani z kimści ź jaho namieśnikaŭ.
Kamientary