29 kastryčnika ŭ Bresckim abłasnym sudzie abviaścili prysud 35-hadovaj žycharcy Pinska, jakaja abvinavačvałasia ŭ zabojstvie dziciaci z asablivaj žorstkaściu.
Sud pryznaŭ žančynu vinavataj i pryznačyŭ pakarańnie 11 hadoŭ pazbaŭleńnia voli ŭ kałonii ahulnaha režymu.
Prysud nie ŭstupiŭ u zakonnuju siłu i moža być abskardžany.
Pavodle viersii abvinavačvańnia, 35-hadovaja pinčanka ab svajoj ciažarnaści daviedałasia prykładna ŭ mai minułaha hoda. Jana pramaŭčała pra svajo stanovišča i nie stała na ŭlik u miedycynskuju ŭstanovu. 26 studzienia 2018 hoda žančyna naradziła žyćciazdolnuju dziaŭčynku, u jakoj adsutničali zahany i anamalii raźvićcia, niesumiaščalnyja z žyćciom. Paśla rodaŭ mama naniesła małoj nie mienš za 49 cialesnych paškodžańniaŭ rukami i «nieŭstanoŭlenymi pradmietami» pa hałavie, hrudziach, tułavie, rukach i nahach. Novanarodžanaja dziaŭčynka atrymała šmatlikija traŭmy, ale jašče była žyvaja. Tady abvinavačanaja rukami zakryła małoj nos, rot i ścisnuła šyju — dziaŭčynka pamierła ad miechaničnaj aśfiksii.
Zatym abvinavačanaja schavała trup u sumku, kab niezaŭvažna vynieści jaho z kvatery, ale nie paśpieła. Kala 18.30 jaje z kvatery pavieźli miedyki z-za kryvacioku. Miedyki paviedamili pra zdareńnie ŭ milicyju, i da pacyjentki vyjechała śledča-apieratyŭnaja hrupa. Padčas ahladu kvatery śledčyja vyjavili ŭ žanočaj sumcy zahornuty ŭ pakiet trup novanarodžanaj dziaŭčynki.
Zhodna z zaklučeńniem kompleksnaj psichołaha-psichijatryčnaj ekśpiertyzy, abvinavačanaja mahła ŭśviedamlać faktyčny charaktar svaich dziejańniaŭ i kiravać imi.
U sudzie pinčanka svaju vinu pryznała častkova. Jana nie pahadziłasia z tym, što naŭmysna pazbaviła žyćcia svaju dačku. Pa jaje viersii,z-za słabaści jana vypuskała z ruk dziaŭčynku i sama časta padała.
- Ja ŭpała na małuju … niekalki razoŭ … I niedzie ja jaje prycisnuła svaim ciełam, — raspaviała ŭ sudzie abvinavačanaja
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary