U Minsku nie dali skončyć kancert, arhanizavany niepryznavanym Sajuzam palakaŭ
Śviatočny kancert u Minsku z nahody stahodździa adnaŭleńnia niezaležnaści Polščy, arhanizavany miascovym adździaleńniem niepryznavanaha ŭładami Sajuza palakaŭ Biełarusi, byŭ skončany praz paŭhadziny pad ciskam administratara zały, piša znadniemna.pl.
Raniej try roznyja ŭłaśniki admaŭlali ŭ arendzie pamiaškańnia. Jak rastłumačyła kiraŭnica minskaha adździaleńnia Sajuza palakaŭ Alena Marčukievič u dźviuch załach było admoŭlena navat u vychodnyja dni. Kala 200 čalcoŭ SPB sabralisia pierad trecim pamiaškańniem, ale i tam sutyknulisia z admovaj.
U apošni momant udzielniki pierajechali na čaćviortaje miesca, ale praz paŭhadziny administratar zapatrabavaŭ skončyć mierapryjemstva.
U karotkaj pramovie kiraŭnik niezarehistravanaha SPB Anžalika Borys adznačyła, što abaviazak palakaŭ u Biełarusi — dbać pra polskija miemaryjały, bo «niezaležnaść vymiarajecca kryžami — na mahiłach našych dziadoŭ i pradziedaŭ».
Pasoł Polščy ŭ Biełarusi Artur Michalski padziakavaŭ prysutnym, što pryjšli na cyrymoniju. Jon padkreśliŭ, što svaboda i niezaležnaść źjaŭlajucca univiersalnymi kaštoŭnaściami.
Prykładna praz paŭhadziny paśla pačatku kancertu, padčas jakoha praśpiavali polski nacyjanalny himn i niekalki patryjatyčnych piesień, rabotnik vyklučyŭ śviatło, a praź niejki čas zapatrabavaŭ skončyć mierapryjemstva.
Anžalika Borys zaklikała prysutnych razyścisia mirna i nie paddavacca na pravakacyi.
Varta adznačyć, što ludziej sabrałasia stolki, što jany nie źmiaścilisia ŭ zału.
Sajuz palakaŭ u Biełarusi (SPB) padtrymlivaŭ biełaruski ruch za nacyjanalnyja i hramadzianskija pravy. U adkaz ułady Biełarusi prykładna ŭ 2005 hodzie raspačali cisk na SPB. Jany stvaryli padkantrolny sabie alternatyŭny Sajuz palakaŭ, ale bolšaść aktyvistaŭ zastalisia prychilnyja arhanizacyi na čale z Anžalikaj Borys. SPB karystajecca padtrymkaj Polščy, jakaja finansavała pabudovu «Damoŭ Polskich» i vychad polskamoŭnaj presy.
Biełaruscy pa pašparcie 120 hadoŭ. Ale ŭ knihu Hiniesa jaje nie zapišuć — i voś čamu5
Kamientary