Što my słuchali ŭ listapadzie: 11 samych značnych muzyčnych albomaŭ miesiaca
Tradycyjna na pačatku miesiaca my robim spravazdaču muzyčnych navinak minułaha miesiaca. Sustreča sa starymi znajomymi, dumki pra svajo pryznačeńnie na Ziamli i muzyčny sihnał ab aktualnych prablemach — usio heta ŭ našym topie!
The Prodigy — No Tourists
U svajoj čarhovaj płytcy kultavy hurt zaklikaje nie być turystami i nie bajacca iści pa žyćci nieviadomymi šlachami. Inšaje pytańnie, ci pierastali być turystami sami muzyki, jakija niekali paviali niachožanaj muzyčnaj ściežkaj za saboj cełuju hienieracyju, a potym pieraŭtvarylisia ŭ samapaŭtor. Adkaz musić kožny dać sabie sam paśla prasłuchoŭvańnia.
TROICA — Car-Ahoń
Svoj siomy albom udzielniki etna-trya nazyvajuć najbolš kamiernym i intymnym. I sapraŭdy, u paraŭnańni ź fiejeryčnaj «Zimačkaj», što vyjšła piać hadoŭ tamu, «Car-Ahoń» hučyć askietyčna.
U pracy nad albomam muzyki chacieli dabicca takoha efiektu, niby słuchač znachodzicca ŭ susiednim pakoi. I heta atrymałasia vydatna!
MGZAVREBI — GEO
GEO — heta nie tolki ziamla ŭ pierakładzie z hrečaskaj, ale i ŭsim viadomaje mižnarodnaje skaračeńnie Hruzii, adkul tranśluje luboŭ da žyćcia svaim słuchačam hurt MGZAVREBI.
Da dziesiacihodździa svajoj tvorčaj dziejnaści muzyki padrychtavali samy emacyjny i śmieły albom, jaki staŭ pieršaj staronkaj novaj hłavy.
Hriečka — My budto piersonaži
Novy albom 18-hadovaj śpiavački. Za hety hod praz Nastu Ivanovu prajšoŭ katok słavy i šlejf krytyki. Dziaŭčyna vyrašyła zakrycca, kab praanalizavać siabie i svaju tvorčaść. Vynik samaanalizu — vašaj uvazie.
Darečy, u zapisie alboma prymaŭ udzieł bas-hitaryst ź Minska Stas Muraška.
Muse — Simulation Theory
Dyjapazon talentu brytanskaha hurta nastolki šyroki, što jany zmahli stvaryć albom u styli retravejv, zachavaŭšy firmovyja ḿjuzaŭskija štučki.
Niechta skaža, što Muse papytalisia zaskočyć u apošni vahon sučasnych trendaŭ sa svajoj teoryjaj simulacyi. Niechta — pra muzyčnaje raźvićcio i adkryćcio novych tvorčych haryzontaŭ. Pasłuchajcie i vyznačcie dla siabie!
ZAZ — Effet miroir
Z francuzskaj nazva alboma pierakładajecca jak «efiekt lusterka». Kambinacyja roznych muzyčnych žanraŭ — heta niby pryniaćcie samoha siabie z usimi, časam supiarečlivymi, hraniami ŭłasnaha charaktaru.
The Good, The Bad & The Queen — Merrie Land
U muzycy isnuje paniaćcie «supierhurta». Heta kali ŭ adzin kalektyŭ źbirajucca muzyki i vykanaŭcy, što stali viadomymi ŭ składzie inšych hurtoŭ ci solna.
Pieršy albom supierhurta The Good, The Bad & The Queen vyjšaŭ u 2007 hodzie, i prychilniki razam z krytykami pačali mierkavać, što heta byŭ adnarazovy muzyčny kiejs.
Ale naprykancy 2018 hoda Dejman Ałbarn i kampanija vydali novuju płytku, pryśviečanuju pravincyjnaj Anhlii, i, zdajecca, heta adzin z najlepšych albomaŭ hoda.
P.O.D. — Circles
Pijaniery niu-mietału ŭračysta praciahvajuć nieści ściah svajho žanru ŭ masy, niahledziačy na toje što jahony čas, zdajecca, daŭno minuŭ.
Pakul kalehi pa styli tanuli ŭ elektronnych ekśpierymientach, P.O.D. ekśpierymientujuć chutčej z kancepcyjami albomaŭ. Byli i łonhpłej-historyi, ciapier nadyšoŭ čas ciopłych mietaličnych kazańniaŭ.
Laibach — The Sound Of Music
Laibach byli pieršym zachodnim hurtom, jakomu dazvolili vystupić u Paŭnočnaj Karei. Heta adbyłosia ŭ 2015-m, i mienavita tady źjaviłasia ideja hetaha alboma.
«The Sound Of Music» — heta pieraasensavańnie kłasičnaha halivudskaha miuzikła 1965-ha hoda, pa jakim paŭnočnakarejskija dzieci vučać anhlijskuju movu.
YUKO — DURA?
DURA? — heta pytańnie hramadstvu. Albom pra kanflikt prahresiŭnaha myśleńnia i sacyjalnych stereatypaŭ.
Ci možna nazvać «duraj» čałavieka, čyje dumki i imknieńni nie ŭpisvajucca ŭ kansiervatyŭnyja hramadskija normy?
Emigrate — A Million Degrees
Treci albom sajd-prajekta hitarysta Rammstein Rycharda Kruspe, jaki zusim nie padobny da Rammstein, chacia hraje taki ž indastryjał.
Pakul usio jašče niezrazumieły los niamieckaha hurta: jany nibyta zapisvajuć novy albom (charavyja partyi navat zapisvalisia ŭ Minsku), nie abviarhajučy čutak pra źniknieńnie kalektyva paśla suśvietnaha turne ŭ 2019 hodzie. Pakul fany ŭ čakańni, raim pasłuchać albom Emigrate, tym bolš na im jość fit ź Cilem Lindemanam.
Našy papiarednija ahlady:
Tramp padziakavaŭ «mahutnamu lidaru Biełarusi»: Spadziajusia, 1300 čałaviek chutka buduć vyzvaleny!55
Tramp padziakavaŭ «mahutnamu lidaru Biełarusi»: Spadziajusia, 1300 čałaviek chutka buduć vyzvaleny!
Biełaruska arhanizavała adpačynak dla dziaciej palitviaźniaŭ na Łazurnym bierazie. Jana raskazała, jak uciakała z krainy i jak jaje zatrymlivaŭ Interpał1010
Kamientary