Biełarus, jaki vydavaŭ siabie za ŭkrainca na rasijskim TB: Ja nie atrymaŭ ni kapiejki. Mnie biaskonca soramna — heta hańba
Błohier Illa Varłamaŭ vyjaviŭ čarhovy fejk rasijskaj prapahandy, jaki mieŭ dačynieńnie i da Biełarusi. Da piataj hadaviny Majdanu na rasijskim Pieršym kanale vyjšaŭ siužet ab žyćci Ukrainy.
U roliku źjaŭlajecca nibyta ŭkrainiec Kirył Čubienka, jaki łaščyć kata i raskazvaje pra tyja žachi, jakija jamu davodzicca ciarpieć paśla Majdanu: «Ničoha mnie asabista nie daŭ Jeŭramajdan. Voś, pahladzicie, dzie my akazalisia. Treba było hladzieć u budučyniu, a my ŭ budučyni zastalisia bieź ciapła, z darahoj enierhijaj, i niezrazumieła, kali ŭsio heta skončycca. Jak pieražyć zimu, jak dziaciej adpraŭlać u škołu?!» — aburaŭsia «Kirył Čubienka».
Adnak vyśvietliłasia, što «Čubienku» syhraŭ žychar horada Minska Vital Jurčanka. Znajomyja Jurčanki adpisalisia Varłamavu ŭ sacyjalnych sietkach, što heta sapraŭdy biełarus, a nijaki nie žychar Kryvoha Roha.
Vital Jurčanka sam źviazaŭsia z redakcyjaj «Našaj Nivy», kab raspavieści svaju historyju. Chłopiec biaskonca paŭtaraŭ, što jamu soramna za hetuju situacyju.
«Ja pracavaŭ analitykam u biełaruskaj kampanii, jakaja źjaŭlajecca pasiarednikam miž telekanałami i apieratarami pa ŭsim śviecie. Naprykład, dzieści zdarajecca ziemlatrus — i telekanałam treba adtul rolik, my šukajem apieratara.
Pryjšła zamova ad Pieršaha kanała Rasii źniać siamju ci čałavieka ŭ Kryvym Rozie va Ukrainie, jaki pakutuje ad adsutnaści hazu i darahoha aciapleńnia. Takoha čałavieka znajšli, źniali materyjał, dasłali nam. Sam ja pa svaich abaviazkach nijak nie ŭzajemadziejničaju z apieratarami, tamu nie byŭ u kursie, što jany zdymajuć.
Potym vyśvietliłasia, što ŭ materyjale z Kryvoha Roha byŭ kiepski huk. Jaho było nielha adpraŭlać zakazčyku. Pryniali absalutna niasłušnaje rašeńnie — pieraźniać siužet z takim samym tekstam, što zrabili ŭ Kryvym Rozie. Ja nie viedaju, ci padpisali imia taho ž čałavieka.
Ja ŭ kampanii adpracavaŭ čatyry miesiacy, tam pracujuć prafiesijanały. Taki vypadak — adziny. Było pryniata takoje niasłušnaje rašeńnie, vy bačycie, jakija nastupstvy jano mieła.
Mnie prapanavali źniacca ŭ jakaści hieroja, bo ja niadaŭna pracavaŭ, maŭlaŭ, novy rabotnik. Ja sumniavaŭsia, ale pajechaŭ zdymacca. Ja pabajaŭsia admovicca, chacia ŭvieś čas sumniavaŭsia. Zmaładušničaŭ, ci što. Kali ŭžo źniali materyjał, to ja niejki čas pachadziŭ, paśla paprasiŭ ničoha nie adpraŭlać u Maskvu. A mnie adkazali na heta, što materyjał užo dasłali.
Zamoŭca ź Pieršaha kanała nie byŭ u kursie, što tak adbyłosia. Nielha było ŭžo skazać «vybačajcie, my vam nie toje adpravili». Rolik źjaviŭsia na Pieršym kanale dva z pałovaj tydni tamu. Mnie ŭžo tady stała i soramna, i ja spałochaŭsia. U dzień efiru troje maich znajomych napisali mnie, što pabačyli siužet. Ja niejak zmoh im usio rastłumačyć, chacia i pačuŭ šmat niepryjemnych słovaŭ pra siabie.
Ja nie mieŭ nijakaha maralnaha prava ŭ hetym udzielničać. Heta supiarečyć usim maim pohladam. Mnie soramna da samaj vysokaj stupieni.
Hrošaj za hety rolik ja nie atrymlivaŭ. Prosta ŭnutry kampanii paprasili dapamahčy, a pra nastupstvy ŭ toj momant ja nie padumaŭ. Ja nie mahu znajści sabie miesca. Chaču paprasić prabačeńnia va ŭsich, chto heta bačyŭ i nie bačyŭ, kali za takoje ŭvohule možna vybačycca.
Paśla vychadu materyjała Varłamava mnie stali pisać u sacyjalnych sietkach z pahrozami. Jany mnie pišuć žachlivyja słovy, a ja razumieju, što ich zasłužyŭ. Nie mahu zrazumieć, jak ja na takoje pahadziŭsia.
U kanflikcie Ukrainy i Rasii ja nie zajmaju ničyjoj pazicyi. Heta infarmacyjnaja vajna, i mnie soramna, što ja staŭ jaje častkaj.
Ja vučyŭsia na jurfaku BDU, skončyŭ mahistraturu pa biznes-administravańni. Na praktyku trapiŭ u tuju samuju kampaniju, dzie i zastaŭsia pracavać. Ale ciapier ja syšoŭ.
Moža, i dobra, što tak atrymałasia. Kali ŭ mianie jość choć minimalny šaniec patłumačyć ci vybačycca, to ja chaču im skarystacca. Mnie biaskonca soramna, heta hańba», — raskazaŭ Vital Jurčanka.
Kamientary