Što treba viedać pra zvyčajnaje myła, kab nie naškodzić svajoj skury
Zdavałasia b, što ŭ našaj vannaj moža być bolš zvykłaje za nievialički brusok myła? Ź dziacinstva nas pryvučali myć ruki pierad abiedam ci pryjšoŭšy z vulicy. I my brali myła, što pachła sunicami, jabłykam ci niečym inšym — napeŭna, samim dziacinstvam.
A paśla zvykły brusok adsunuli roznyja inšyja srodki: dla tvaru — adny, dla cieła — inšyja, dla ruk — zamiest duchmianaha kvadracika ŭžo vadkaje myła roznych koleraŭ i pachaŭ.
My spytali ŭ kaśmietołaha Volhi Działajevaj, ci spraviadliva my zabylisia na ćviordaje myła?
«Samaje važnaje, na što treba źviartać uvahu, kali vy nabyvajecie myła, — jaho skład. Heta nie značyć, što treba raźbiracca va ŭsim napisanym. Ale kali vy ŭbačycie, što termin prydatnaści myła try hady, viedajcie, što pierad vami ščołačny pradukt», — kaža Volha.
Jak vybrać myła
Zvyčajnaje ščołačnaje myła rastvaraje tłuščavuju zmazku, na jakoj asiadaje pył i brud. Razam z ačyščeńniem heta myła viadzie da zruchu kisłotnaści skury ŭ ščołačny bok. Heta značyć, što skura pazbaŭlajecca samaha važnaha miechanizmu abarony ad ahresiŭnych źniešnich faktaraŭ, bieź jakoha niemahčyma zachavać maładość.
Akramia taho, pry karystańni ščołačnym myłam unutr rahavoha płastu pranikaje vilhać i sušyć skuru. Tamu duchmiany brusočak lepš nie vykarystoŭvać dla tvaru. Ščołačnaje myła padychodzić vyklučna dla myćcia ruk. Pryčym paśla jaho vykarystańnia treba abaviazkova nanieści ŭvilhatnialny krem.
«Naohuł, ciapier u kramach nastolki bahaty vybar roznaha myła, što možna śmieła padbirać sabie pad peŭnyja mety. Jość myła-pilinh dla hłybokaha ačyščeńnia skury, jość śpiecyjalnaje myła dla łaźni. Kali ž vy płanujecie karystacca myłam vyklučna dla myćcia ruk, to nie pierapłačvajcie, kupicie zvyčajnaje dziciačaje myła. Jano vyrablajecca z naturalnych kampanientaŭ z dadavańniem hlicerynu, łanalinu ci alejaŭ, jakija źmiakčajuć i ŭvilhatniajuć skuru. Časta ŭ skład dziciačaha myła ŭvachodziać raślinnyja dabaŭki, jakija majuć supraćzapalenčy i zaspakajalny efiekt (naprykład, ekstrakt ramonka). A voś škodnych farbavalnikaŭ u takim myle niama, tamu jano padychodzić navat dla adčuvalnaj skury», — raskazvaje kaśmietołah.
Vadkaje myła bolš hihijeničnaje, tamu što ŭ im jość dazatar i vy brudnymi rukami nie dakranajeciesia da ŭsiaho kavałka adrazu. Taksama ŭ vadkaje myła našmat praściej dadać karysnyja rečyvy, efirnyja alei, roznyja ekstrakty.
«Ale jaho taksama nie varta vykarystoŭvać dla myćcia tvaru. Dla hetaj mety najlepš abirać myła ručnoj raboty. Toje, u naturalnym składzie jakoha vy ŭpeŭnienyja na 100%», — kaža Volha Dziełajeva.
Ciapier na asnovie myła ručnoj raboty vyrablajuć i ŭsiemahčymyja kaśmietyčnyja srodki mas-markietu: akurat dla tych, kamu chočacca i naturalnaści, i zručnaści ŭ karystańni. Tut užo nie treba asabliva zamaročvacca z nabyćciom naturalnaha praduktu, jaho zachoŭvańniem, sposabami vykarystańnia i hetak dalej — vytvorcy pra ŭsio heta ŭžo padumali.
U kramach, naprykład, možna zaŭvažyć novuju sieryju kaśmietyčnych srodkaŭ ad Bielity-M z afrykanskim čornym myłam. Hety niezvyčajny pradukt vyrablajecca ŭ Zachodniaj Afrycy ručnym sposabam z pryrodnych kampanientaŭ vyklučna raślinnaha pachodžańnia: kakava-baboŭ, arechaŭ karyte (šy), kakosaŭ.
Kampanienty doŭha sušacca i smažacca, pakul nie pieratvarajucca ŭ zału — asnoŭnuju syravinu, jakaja i daje myłu taki ciomna-karyčnievy, amal čorny koler.
Takoje myła maje šmat karysnych ułaścivaściaŭ. Jano nie tolki ačyščaje skuru, ale i supakojvaje jaje, akazvaje supraćmikrobnaje dziejańnie, spryjaje aśviatleńniu pihmientacyi i vyroŭnivańniu tonu skury, pazbaŭlaje ad tłustaha blasku i čornych kropak. Myłam možna navat myć vałasy — jano zdymaje śvierb, nie razdražniaje skuru i zmahajecca ź pierchaćciu.
Čaściej za ŭsio na palicach my bačym brusočki, na jakich bujnymi litarami napisana, što myła hlicerynavaje ci antybakteryjalnaje.
«Hlicerynavaje myła ŭtrymlivaje ŭ składzie hliceryn — vidavočna. Heta značyć, što ŭ im jość kampanienty, jakija ŭvilhatniajuć skuru i lohka zmyvajucca. U skład ža antybakteryjalnaha myła ŭvachodziać kampanienty, jakija zabivajuć mikroby. Adnak ja b raiła nie zachaplacca takimi srodkami. Jany pavinny vykarystoŭvacca jak maha radziej i ŭ śpiecyjalnych ustanovach: balnicach ci kaviarniach», — kaža kaśmietołah.
Jak pravilna mycca?
Kali zadača zmyć brud sa skury, to nieabaviazkova namylvać mačałku i cierci joj cieła. Mačałka traŭmuje skuru, z zabrudžvańniem lohka spravicca i vaša dałoń, adznačaje kaśmietołah Volha Działajeva.
Nie škadujcie ŭźbivać bolš pieny.
«Što takoje piena pa svajoj sutnaści? Heta burbałki pavietra z mylnymi malekułami. I kali takich pavietranych burbałak budzie bolš, to i pavierchnia z mylnymi malekułami budzie taksama bolšaj. Mienavita hetyja malekuły źjaŭlajucca čyścilščykami brudu. Tamu mycca lepš pienaj, čym mylnym rastvoram».
Staranna zmyvajcie reštki myła vadoj. Vada nie tolki pazbaŭlaje ad brudu, ale i ačyščaje skuru ad ščołačy, što zastałasia na skury.
Nie złoŭžyvajcie śpiecyjalnym myłam. Tym ža bakterycydnym lepiej nie mycca, a tolki pramyvać ranki.
Mycca z myłam nie varta čaściej, čym raz na sutki, lepš pierad snom. Tolki važna nie zabyvać uvilhatniać skuru kremam.
I jašče adna parada ad kaśmietołaha:
«Rajciesia sa śpiecyjalistami. Tolki jany mohuć padabrać adpaviedny srodak mienavita dla vašaha typu skury».
Ciapier čytajuć
Novy pasoł Ukrainy pa pytańniach Biełarusi: «Pryznajom Cichanoŭskuju lidaram. A ŭ Łukašenki niama manapolii na hołas naroda»35
Kamientary