Niamiecki sud dazvoliŭ byłomu biełaruskamu palitviaźniu Juryju Rubcovu zastacca ŭ Hiermanii jašče na try hady
3 studzienia sud u Hiermanii razhledzieŭ apielacyju byłoha biełaruskaha palitviaźnia Juryja Rubcova, jakomu raniej było admoŭlena ŭ pradastaŭleńni palityčnaha prytułku.
«Advakat paviedamiŭ, što ŭ dačynieńni da mianie było pryniata stanoŭčaje rašeńnie», — raspavioŭ sajtu palitviazni.info Juryj Rubcoŭ.
Nahadajem, što hamialčanin Juryj Rubcoŭ staŭ viadomy jak «čałaviek-majka». Na vuličnyja akcyi apazicyi ŭ Minsku jon vychodziŭ u majcy z palityčnymi nadpisami. Samym viadomym staŭ łozunh «Łukašenka, sychodź!». U kastryčniku 2014 hoda Rubcova asudzili na dva z pałovaj hady abmiežavańnia voli ŭ papraŭčaj ŭstanovie adkrytaha typu, abvinavaciŭščy ŭ abrazie sudździ. Na «chimii» Rubcoŭ admaŭlaŭsia pracavać, patrabujučy hodny zarobak, i trymaŭ haładoŭku. Jon zrabiŭ sabie na hrudziach tatu «Łukašenka, sychodź».
28 maja 2015 hoda sud pryhavaryŭ Rubcova da dvuch hadoŭ kałonii ahulnaha režymu. Ale 22 žniŭnia jaho ŭ liku inšych palitviaźniaŭ pamiłavaŭ svaim ukazam Alaksandr Łukašenka. Paśla hetaha Juryj Rubcoŭ paprasiŭ palityčny prytułak u Hiermanii, rašeńnia daviałosia čakać kala hodu. Jano akazałasia nie na karyść byłoha biełaruskaha palitviaźnia, ale jon vyrašyŭ padać apielacyju na admovu.
Juryj Rubcoŭ žyvie ŭ Niurnbierhu, pracuje pamočnikam chatniaha majstra».
«Pa rašeńni suda, mnie dazvolena žyć u Hiermanii ŭ statusie biežanca jašče na praciahu troch hadoŭ, — kaža były palitviazień. — Heta aznačaje, što mnie buduć pradastaŭleny novyja kursy pa vyvučeńni niamieckaj movy nie dva razy na tydzień pa dźvie hadziny, a ŭžo piać dzion na tydzień pa vosiem hadzin. Akramia hetaha, budzie dazvolena zdymać kvateru, a paśla zakančeńnia kursaŭ pracavać biez abmiežavańnia ŭ zarobku i pracoŭnym časie».
Sa słoŭ surazmoŭcy, jość i šmat inšych niuansaŭ, ale pra ŭsio jon zmoža daviedacca tolki paśla taho, jak atrymaje na ruki aficyjnyja papiery z suda.
«A zaraz ja pierajechaŭ žyć u inšaje miesca, — dadaje Juryj Rubcoŭ. — Adras pražyvańnia źmianiŭsia tamu, što značna źmienšyłasia kolkaść biežancaŭ, i, suadnosna, urad Hiermanii źmianšaje kolkaść arendujemych pamiaškańniaŭ dla biežancaŭ. Mienavita ŭ suviazi z hetym z hatela, u jakim ja žyŭ raniej, pierasialili ŭsich biežancaŭ ŭ inšyja miescy».
Chto toj nieadekvatny biełarus, jaki lasnuŭ dziciatka hałavoj ab padłohu ŭ maskoŭskim Šaramiećcievie8
Kamientary