Maryna Zołatava, fota Voli Aficeravaj
Biełarusy, što pražyvajuć u ZŠA, stvaryli pietycyju ŭ padtrymku hałoŭnaha redaktara Tut.by Maryny Zołatavaj, sud nad jakoj pačniecca 12 lutaha.
Upieršyniu ŭ historyi sučasnaj Biełarusi buduć sudzić hałoŭnaha redaktara ŚMI pa abvinavačvańni ŭ złačynstvie, źviazanym z prafiesijnaj dziejnaściu.
Maryna Zołatava zastałasia adzinaj abvinavačvanaj pa «spravie BiełTA», astatnija fihuranty — 14 supracoŭnikaŭ roznych ŚMI — byli vyzvalenyja ad kryminalnaj adkaznaści z pryciahnieńniem da administracyjnaj. Hałoŭnaha redaktara Tut.by abvinavačvajuć pa č. 2 art. 425 Kryminalnaha kodeksa (Biaździejnaść słužbovaj asoby), sankcyja artykuła — ad štrafu i da 5 hadoŭ pazbaŭleńnia voli.
«Biełaruskaja supolnaść u ZŠA, našy siabry i rodnyja, jakija sočać za padziejami ŭ Biełarusi, źviartajemsia z zaklikam da adpaviednych dziaržaŭnych ustanoŭ Respubliki Biełaruś, u tym liku Śledčaha Kamiteta i Minski haradski sud, nieadkładna spynić pieraśled hałoŭnaha redaktara infarmacyjnaha partała Tut.by, Maryny Zołatavaj, u suviazi sa spravaj BiełTA», — adznačajecca ŭ pietycyi.
«My rašuča pratestujem suprać hetaj sproby dziaržavy zapałochać i ustalavać kantrol nad niezaležnymi žurnalistami i tymi niezaležnymi infarmacyjnymi ŭstanovami, jakija zabiaśpiečvajuć u Biełarusi adnu z fundamientalnych asnoŭ demakratyčnaha hramadstva - prysutnaść niezaležnych miedyja», — pišuć aŭtary pietycyi.
«My zaklikajem Śledčy Kamitet i Minski sud spynić kryminalnuju spravu suprać hałoŭnaha redaktara Tut.by. Sprava BiełTA užo niehatyŭna paŭpłyvała na imidž Biełarusi na mižnarodnaj arenie. Sud nad hałoŭnym redaktaram Tut.by vyklikaje novuju chvalu pratestu va ŭsim śviecie i jašče horš adabjecca na inviestycyjach i palityčnych pierśpiektyvach krainy», — śćviardžajuć aŭtary zvarotu.
