Biełaruś zmoža atrymać pieršyja 800 młn dalaraŭ užo ŭ studzieni. U pakiecie antykryzisnych zachadaŭ razam z kredytam - devalvacyja rubla i abmiežavańnie zarpłaty ŭ dziaržaŭnym siektary.
Biełaruś zmoža atrymać pieršyja 800 młn dalaraŭ užo ŭ studzieni. U pakiecie antykryzisnych zachadaŭ razam z kredytam - devalvacyja rubla i abmiežavańnie zarpłaty ŭ dziaržaŭnym siektary.
Mižnarodny valutny fond 31 śniežnia abjaviŭ pra damoŭlenaść na ŭzroŭni piersanału ab kredycie «stend‑baj» u 2,5 młrd. dalaraŭ dla Biełarusi.
«Misija supracoŭnikaŭ MVF i aficyjnyja ŭłady Biełarusi dasiahnuli pahadnieńnia, jakoje padlahaje pryniaćciu kiraŭnictvam MVF i Vykanaŭčaj radaj, pa ekanamičnaj prahramie, što padtrymlivajecca 15‑miesiačnaj damoŭlenaściu ab kredycie «stend‑baj» na sumu prykładna 2,5 młrd. dalaraŭ.
Płanujecca, što abmierkavańnie prahramy Vykanaŭčaj radaj adbudziecca ŭ studzieni 2009 hoda. Biełaruś zmoža atrymać prykładna 800 młn dalaraŭ nieadkładna paśla ŭchvały prahramy Vykanaŭčaj radaj», — havorycca ŭ zajavie dyrektara‑rasparadčyka MVF Daminika Stros‑Kana.
Jon zaznačyŭ, što «Biełaruś apynułasia ŭ składanaj ekanamičnaj situacyi».«Na praciahu niekalkich hadoŭ naziraŭsia ŭražalny ekanamičny rost, ale ŭ apošni čas źjavilisia prykmiety pierahrevu ekanomiki. Hłabalny ekanamičny kryzis taksama značna zakranuŭ ekanomiku Biełarusi. Admoŭnyja źmieny ŭmovaŭ handlu, źnižeńnie popytu z boku asnoŭnych handlovych partnioraŭ i ŭskładnieny dostup da handlovaha i inšaha źniešniaha finansavańnia pryviali da pamianšeńnia mižnarodnych reziervaŭ u krainie», — skazaŭ D.Stros‑Kan.
Pavodle jaho słovaŭ, biełaruskija aficyjnyja orhany ciapier robiać surjoznyja zachady pa spynieńni padzieńnia reziervaŭ, pa adnaŭleńni ekanamičnaj stabilnaści i padrychtoŭcy hleby dla adnaŭleńnia ekanamičnaha rostu.«Ekanamičnaja prahrama, jakaja padtrymlivajecca fondam, budzie sadziejničać praviadzieńniu ŭparadkavanaj adaptacyi ekanomiki Biełarusi da vonkavych šokaŭ, ź jakimi jana sutykajecca ciapier, i daść abaronu dla jaje najbolš uraźlivych miescaŭ», — padkreśliŭ dyrektar‑rasparadčyk MVF.
Pavodle infarmacyi fondu, uzhodnienyja miery ŭklučajuć bolš mocnuju hrašova‑kredytnuju palityku i sistemu palityki abmiennaha kursu, abmiežavańnie padatkova‑biudžetnaj palityki šlacham skaračeńnia dziaržaŭnych inviestycyj i metavaha kredytavańnia bankami, strohaje abmiežavańnie zarabotnaj płaty ŭ dziaržaŭnym siektary.
«Takija mocnyja miery ekanamičnaj palityki, što prymajucca ŭładami, słužać asnovaj dla vyklučnaha ŭzroŭniu dostupu da resursaŭ MVF, ekvivalentnaha prykładna 420% ad kvoty Biełarusi ŭ MVF, i zasłuhoŭvajuć padtrymki mižnarodnaj supolnaści», — zajaviŭ D.Stros‑Kan.
Pieramovy ab vydzialeńni Biełarusi hetaha kredytu vialisia ekśpiertami MVF z pradstaŭnikami biełaruskich uładaŭ na praciahu apošnich dvuch miesiacaŭ.
U 1995 hodzie MVF spyniŭ vydzialeńnie kredytaŭ Biełarusi z‑za nieadpaviednaści ekanamičnaj palityki ŭrada rekamiendacyjam fondu.
U pačatku 2004 hoda ŭrad i Nacbank Biełarusi zajavili pra adsutnaść nieabchodnaści ŭ pryciahnieńni kredytnych resursaŭ MVF. Z taho času supracoŭnictva z fondam było skancentravanaje na atrymańni techničnaj dapamohi i kansultacyj.
Kamientary