Vy ździviciesia, ale nakład «Sovietskoj Biełoruśsii» nie 400 tysiač asobnikaŭ, jak paznačana, a ŭdvaja mienšy
«Naša Niva» adsočvaje situacyju z drukavanymi ŚMI ŭ Biełarusi. Jana takaja, jak i va ŭsim śviecie: nakłady papiarovych vydańniaŭ źnižajucca, aŭdytoryja pierachodzić u sieciva — «Naša Niva» i sama admoviłasia ad papiarovaj haziety praz stratu rentabielnaści.
Tolki hazieta «Sovietskaja Biełoruśsija» («SB. Biełaruś siońnia»), zdavałasia b, paśpiachova zmahajecca z vyklikami času i ŭzorna trymaje svoj nakład na ŭzroŭni fantastyčnych 400 tysiač asobnikaŭ. Biełaruski fienomien? Nasamreč, nie.
Ad niejkaha času ŭ vychodnych źviestkach haziety «Sovietskaja Biełoruśsija» ŭkazvajecca farmuloŭka «ahulny nakład 402 tysiačy» i ŭdakładnieńnie, što źviestki datyčacca «SB. Biełaruś siehodnia» i «Sojuz. Biełaruś — Rośsija».
«Sojuz. Biełaruś — Rośsija» — heta vydańnie Savieta ministraŭ Sajuznaj dziaržavy.
Pavodle damovy, «Sajuz» raz na tydzień układvajecca ŭ aficyjoznuju ŭradavuju «Rasijskuju hazietu» i jaje biełaruski anałah.
Dyk voś, u Rasii drukujecca 130 tysiač asobnikaŭ «Sajuza». I hetaja ličba stroha adpaviadaje nakładu «Rasijskaj haziety». Usio łahična — u kožnuju hazietu ŭkładajecca pa adnym dadatku.
Razam z tym zajaŭleny nakład «Sajuza» dla Biełarusi — 187 tysiač. Jak jon moža być nastolki mienšym za nakład «SB»?
Heta pytańnie my adrasavali kiraŭnictvu «Sovietskoj Biełoruśsii».
«Na 1 studzienia nakład byŭ 215 tysiač asobnikaŭ, heta byŭ piatničny vypusk, — adkazvaje namieśnik redaktara «SB» Michaił Labiedzik. — U astatnija dni jon adroźnivajecca: 180 tysiač u aŭtorak, 190 tysiač u subotu.
Ci ŭ kožny numar układajem «Sajuz»? Tak, u kožny. U čaćvier nakład «SB» adpaviadaje nakładu «Sajuza».
Jak tady ŭ vychodnych dadzienych moža być paznačana 402 tysiačy asobnikaŭ? Akazvajecca, ličbu vychodnych dadzienych «SB» składaje maksimalny nakład za piatnicu i daplusavany da jaho nakład «Sajuza» za čaćvier.
Labiedzik miarkuje, što hetaja suma adpaviadaje aznačeńniu «ahulny nakład».
Admietna, što rekłamu ŭ vydańnie «SB» pradaje, abiacajučy raźmiaścić jaje ŭ 400 tysiač asobnikaŭ haziety.
Čytajcie. Piać faktaŭ pra hałoŭnaha redaktara «Sovietskoj Biełoruśsii» Dźmitryja Žuka
Łukašenka prapanavaŭ rasiejcam i ŭkraincam skuplać za kapiejki biełaruskija vioski1
Kamientary