Piać faktaŭ pra novaha hałoŭnaha redaktara «Sovietskoj Biełoruśsii» Dźmitryja Žuka
Lehiendarny Pavieł Jakubovič sychodzić u adstaŭku z pasady hałoŭnaha redaktara najbujniejšaj dziaržaŭnaj haziety krainy «Sovietskoj Biełoruśsii». Jakubovič kiravaŭ vydańniem 24 hady. «Ja svabodny», — skazaŭ jon paśla adstaŭki.
Novym redaktaram haziety Administracyi prezidenta stanie redaktar infarmacyjnaha ahienctva BiełTA Dźmitryj Žuk. Dla Žuka taki pierachod vyhladaje pavyšeńniem — moža tamu, što da jaho hetaje miesca zajmaŭ čałaviek, čyj upłyŭ byŭ bolšy za pasadu ŭ siłu asabistych jakaściaŭ.
Syn piśmieńnika Alesia Žuka
Heta mała dzie afišujecca, ale novy redaktar «Sovietskoj Biełoruśsii» — syn viadomaha piśmieńnika Alesia Žuka. Dźmitryj naradziŭsia na małoj radzimie baćki ŭ Słuckim rajonie ŭ 1970-m. Aleś Žuk u toj hod akurat skančvaŭ univiersitet.
Admietna, što Aleś Žuk padtrymaŭ niedziaržaŭny Sajuz biełaruskich piśmieńnikaŭ i dahetul uvachodzić u jaho. Kali litaraturnyja časopisy abjadnali ŭ chołdynh, Žuk-starejšy na toj momant uznačalvaŭ ruskamoŭny «Nioman». Na jahonaje miesca pryjšła viadomaja kamunistka Nina Čajka.
Zrešty, Žuk-syn piša pa-rusku, biełaruskaj movaj na pracy nie karystajecca.
Pracavaŭ nastaŭnikam biełaruskaj movy
Mahčyma, piśmieńnickaja siamja akurat spryčyniłasia da taho, što vučycca Dźmitryj Žuk pajšoŭ na biełaruskuju fiłałohiju BDU, jakuju skončyŭ u 1992 hodzie. Potym hod adpracavaŭ nastaŭnikam movy ŭ škole-himnazii №199. Pry hetym ciapier Dźmitryj Žuk imkniecca nie vykarystoŭvać biełaruskuju movu padčas efiraŭ na telebačańni, navat kali jahony surazmoŭca razmaŭlaje pa-biełarusku.
Paśla hetaha Dźmitryj Žuk syšoŭ u žurnalistyku. Spačatku jon pracavaŭ u vydavieckim centry Nacbanka, a paśla trapiŭ u biełaruskuju redakcyju rasijskaha infarmacyjnaha ahiencva «Interfaks».
Uznačalvaŭ pres-słužbu Łukašenki
U pieryjad ad 1999 da 2003 Dźmitryj Žuk uznačalvaŭ pres-słužbu (nie błytać z pasadaj pres-sakratara) Alaksandra Łukašenki. «Biełhazieta» pisała pra jaho ŭ toj čas: «Nie zapomniŭsia žurnalistam i ciapierašni kiraŭnik pres-słužby prezidenta Dźmitryj Žuk, usie funkcyi jakoha abmiežavalisia filtravańniem žurnalistaŭ, zaprošanych na mierapryjemstvy z udziełam prezidenta». Žuka na hetaj pasadzie źmianiŭ Pavieł Lohki, jaki ciapier źjaŭlajecca namieśnikam ministra infarmacyi.
Pierachapiŭ inicyjatyvu ŭ «Interfaksa»
Kali Žuk uznačaliŭ BiełTA, jamu było ŭsiaho 33 hady.
Doŭhi čas ekskluzivy ad dziaržaŭnych orhanaŭ davała rasijskaje infarmahienctva «Interfaks». A ŭsie dziaržaŭnyja ŚMI byli ŭžo na druhim płanie. Mienavita Dźmitryj Žuk, kali staŭ dyrektaram BiełTA, zmoh pierałamić hetuju tradycyju.
Na siońnia mienavita na BiełTA źjaŭlajecca samaja śviežaja i aktualnaja infarmacyja z aficyjnych krynic. A «Interfaks» pastupova zhasaje. Heta była vialikaja pieramoha Žuka, jaki dakazaŭ pieravahu biełaruskich ŚMI nad rasijskimi.
Pry Žuku BiełTA adyšła ad strohaj kancylarščyny. Na sajcie źjaŭlajecca šmat infarmacyi pra šou-biznes (na žal, najpierš rasijski), zabaŭlalnaj infarmacyi, testaŭ. Na siońnia BiełTA — heta samy papularny dziaržaŭny sajt, jaki, adnak, usio adno šmat sastupaje niezaležnym partałam.
Stały ŭdzielnik «Kłuba redaktaraŭ»
Razam z Paŭłam Jakubovičam i Hienadziem Davydźkam Dźmitryj Žuk byŭ stałym udzielnikam «Kłuba redaktaraŭ» na «Biełaruś 1».
Žuk tam staraŭsia bolš maŭčać, čym havaryć. Kali ž braŭ słova, to zdaralisia i adyjoznyja vykazvańni.
Naprykład, kali maładafrontaŭcy źbirali podpisy za bieł-čyrvona-bieły ściah, to Žuk skazaŭ: «Chaču viarnucca da podpisaŭ. Chłopcy, jakija padpisalisia, moža, vy jašče i svaje pašpartnyja dadzienyja skazali? Dyk za kahości kredyt zapłacicie. Nie śpiašajciesia padpisvacca».
Kali źbili žurnalista tut.by Paŭła Dabravolskaha, to Žuk staŭ na bok milicyi.
Novy hałoŭny redaktar «Sovietskoj Biełoruśsii» źjaŭlajecca kavaleram Ordena Pašany.
Na dźviarach kabinieta Žuka ŭ BiełTA visieła šylda z vykazvańniem lehiendarnaha Če Hievary: «Stamiŭsia — adpačni. Ale paśla hetaha ty ŭžo nikoli nie budzieš bajcom revalucyi».
Kamientary