Na telekanale STB vyjšaŭ pieršy vypusk pieradačy «U abstanoŭcy mira», jakuju viadzie historyk, deputat Pałaty pradstaŭnikoŭ Ihar Marzaluk. U pradmovie da prahramy Marzaluk kazaŭ pra biełaruskuju talerantnaść, što ŭ nas zaŭsiody mirna žyli pravasłaŭnyja, kataliki, habrei i musulmanie, hładziŭ kata, a taksama ŭziraŭsia ŭ vieličnyja panaramy Mirskaha zamka.
Źleva naprava: Rusłan Abramčyk, Ihar Marzaluk, Natalla Karčeŭskaja i Ihar Łucki.
Pieradača i zapisvałasia ŭ interjery Mirskaha zamka. Hości siadzieli za ciažkim dubovym stałom u prastornaj zale, pobač byŭ kamin z hierbam Mira, u pamiaškańni byli raźviešany partrety mahnataŭ. Dumajecca, što taki vybar pamiaškańnia dla šou vyklikaje razdražnieńnie ŭ mnohich zachodnierusisckich i čarnasocienskich kołach.
Sama pieradača — kopija «Kłuba redaktaraŭ», jaki idzie na telekanale «Biełaruś-1». Za stałom źbirajucca adny łukašenkaŭcy, usie z adnolkavaj pazicyjaj, niama dyskusii i sutyknieńnia dumak, i razmova niepaźbiežna pieratvarajecca ŭ charavuju kontrprapahandu.
A chto byli ŭ haściach? Hienieralny dyrektar STB Ihar Łucki, pieršaja namieśnica ministra kultury Natalla Karčeŭskaja, a taksama pieršy namieśnik staršyni Karelickaha rajvykankama Rusłan Abramčyk.
U asnoŭnym u pieradačy razmaŭlali pa-biełarusku. Rabiŭ heta, viadoma, sam Marzaluk, absalutna ŭvieś čas na našaj movie pramaŭlaŭ Rusłan Abramčyk (da hetaha čynoŭnika varta pryhladziecca, jon moža zrabić sabie dobruju karjeru), starałasia havaryć Karčeŭskaja, navat Łucki paru frazaŭ pramoviŭ pa-biełarusku.
Pa-rusku Marzaluk razmaŭlaje značna horš, u jaho mocny biełaruski akcent z frykatyŭnym «h». Ale pry ŭzhadvańniach, naprykład, pasłańnia Łukašenki jon čamuści ličyŭ za lepšaje pierachodzić na ruskuju.
Deputat, a ciapier i viadučy Marzaluk, byŭ zachopleny vystupam Łukašenki pierad parłamientam. «Vyrasła pakaleńnie ludziej, jakoje dychaje niezaležnaściu. Niezaležnaść nie pradajecca za banku mazuty ci vareńnia», — kazaŭ Marzaluk.
Samy, mabyć, doŭhi śpič viadučaha «U abstanoŭcy mira» Marzaluka byŭ pryśviečany Kurapatam. Jon nazvaŭ dziejańni peŭnych ludziej u Kurapatach «pravakacyjaj» i kazaŭ, što tak moža pačacca hramadzianskaja vajna. «Jość rečy, na jakich nielha śpiekulavać. Sapraŭdy, heta miesca palityčnych represij 1937 — 1940 hadoŭ. Ale djabał u detalach», — kaža Marzaluk.
Jon staŭ aburacca dziejańniami Źmitra Daškieviča, jaki samavolna ŭstaloŭvaŭ kryžy ŭ achoŭnaj zonie. «Chto aśviačaŭ tyja kryžy?» — kryčaŭ Marzaluk. Historyk skazaŭ, što sami pachavańni znachodziacca na ŭzhorku tak zvanaj Hałhofy, a taksama jaje schiłach, a na miescach, dzie byli kryžy, jakija źnieśli, ich niama.
«Kryžy na miescach pachavańniaŭ nichto nie čapaŭ i čapać nie budzie. Ułada sami ich uznović, kali budzie patreba», — tłumačyŭ deputat. Jon raspavioŭ, što hryf «sakretna» z rasśledavańnia KDB pa Kurapatach, jakoje pravodziłasia ŭ 1998 hodzie, užo źniaty. I anansavaŭ, što bližejšym časam dakumienty buduć nadrukavanyja.
U druhoj častcy pieradačy Marzaluk znoŭ zhadaŭ Kurapaty. U toj častcy, dzie havaryŭ pra «miemaryjalizacyju pamiaci», što pavinny być miescy, kudy ŭ abaviazkovym paradku buduć jeździć školniki — heta Chatyń, Traścianiec, Kurapaty, Biaroza-Kartuzskaja. Pra apošniuju jon skazaŭ: «Chaj ludzi adčujuć usiu radaść polskaha panavańnia».
Nu i ŭrešcie havorka trochu zajšła pra ŭkrainskija vybary. Karčeŭskaja zapeŭniła, što «artyst — heta taksama čałaviek, a Zialenski jašče vałodaje bujnym biznesam». «Va Ukrainy ŭsio pavinna atrymacca», — adznačyŭ Łucki. «My im ščyra hetaha zyčym», — zapeŭniła Karčeŭskaja.
Abramčyk, jaki ŭ cełym rabiŭ pazityŭnaje ŭražańnie, na žal, mała havaryŭ pra ahulnarespublikanskija ci mižnarodnyja temy. Pakul heta šou adnaho hieroja. Kali Marzaluk choča bolšaj papularnaści i prahladaŭ, to hości pavinny być bolš słovaachvotnymi.
