U Mahilovie raźvitvajucca z zabitym milicyjanieram FOTY
U Mahilovie siońnia raźvitvajucca z 22-hadovym Jaŭhienam Patapovičam — supracoŭnikam milicyi, jakoha zabili ŭ čaćvier, 16 maja.
Vyhladaje, što raźvitacca pryjšła bolšaja častka asabovaha składu Mahiloŭskaj milicyi. Niedzie 40 čałaviek u formie DAI stajać naŭprost la raźvitalnaj zały i maleńkimi hrupami zachodziać va ŭnutr. Taksama pieryjadyčna prychodziać z kvietkami ci viankami prosta milicyjaniery.
Prynosiać vianki i inšyja siłavyja viedamstvy: naprykład, pryjšło kiraŭnictva prakuratury. A taksama kiraŭnictva harvykankama.
Maci chłopca hladzić skroź trunu, z dvuch bakoŭ jaje padtrymlivajuć žančyny, vycirajučy ślozy to joj, to sabie.
Praz paŭhadziny ad pačatku ŭ trunie — u nahach — bolš niama miesca dla kvietak, ich kładuć pobač.
Siabry lejtenanta admaŭlajucca havaryć ź nieznajomymi.
Čałaviek, jaki, jak vyhladaje, kiruje raźvitańniem, nie moža dakładna adkazać, ci budzie na raźvitańni ministr Šunievič.
Doŭhaj kałonaj zajšli ŭ raźvitalnuju zału milicyjaniery, la truny zastałasia tolki maci, baćka — były milicyjanier — staić trochu dalej, aficery asabista padychodziać pacisnuć jamu ruku.
Siabry siamji, jakija padtrymlivajuć maci, kažuć tolki: «Bieražycie siabie».
Ź Minska pryjechaŭ Ivan Kubrakoŭ, načalnik minskaj milicyi, načalnik AMAPa Dźmitryj Bałaba.
Z žadajučych raźvitacca ź lejtenantam utvaryłasia čarha, ludziej dadałosia pad 11 hadzin. Stajać na vulicy z kvietkami prostyja mahiloŭcy.
Paru socień čałaviek pravodziać trunu ź ciełam zahinułaha. Milicyjaniery iduć kałonnaj pa 3 čałavieki. A zamykaje kałonu milicejski arkiestr.
Čytajcie taksama: U Mahilovie nieviadomyja na rasijskich numarach vykrali i zabili 22-hadovaha inśpiektara DAI
Kamientary