Upieršyniu ŭ rekłamie «Miłavicy» źnialisia pradstaŭnicy roznych ras FOTA
U letnim imidžavym prajekcie «Miłavicy» źniałasia madel ź Nihieryi i dziaŭčyna z Karei. Tym samym u kampanii chacieli padkreślić, što ich bializna pasuje absalutna roznym žančynam.
Pra heta «Našaj Ninie» raskazała načalnica adździeła markietynhu kampanii «Miłavica» Julija Mirharodskaja.
«Ciapier my vychodzim taksama i na rynak Afryki, tamu łahična, što tvaram novaj rekłamnaj kampanii stała dziaŭčyna z hetaha kantynienta», — kaža Julija.
Džesika rodam ź Nihieryi, u Minsku vučycca ŭ Instytucie žurnalistyki BDU. Zaraz dziaŭčyna vyrašaje, dzie ž praciahvać svaju karjeru: źjazdžać dadomu, pierabiracca ŭ Jeŭropu, abo zastavacca ŭ Biełarusi. Džesiku markietołahi kampanii «Miłavica» ŭbačyli vypadkova. Adzin navinny partał krainy rabiŭ pra jaje materyjał. U «Miłavicy» raskazvajuć, što ŭ Džesiki sapraŭdnaja madelnaja źniešnaść. Jaje rost — 180 santymietraŭ.
«Razumiejecie, ideja rabić internacyjanalnuju zdymku nie ŭźnikła vypadkova. My razumieli, što naša pradukcyja pradajecca ŭ 25 krainach, dzie kožny bačyć i razumieje pryhažość pa-svojmu. Tamu my prosta abaviazany byli pakazać, jak naša bializna hladzicca na roznych žančynach, jana padkreślivaje ich pryhažość i ŭnikalnaść», — raskazvaje Julija Mirharodskaja.
Druhaja dziaŭčyna — Anhielina, napałovu karejanka. Vučycca ŭ BDU na ekanamista. Jaje pryviała na zdymki siabroŭka, jakaja ŭžo pracavała z «Miłavicaj».
«Zdymki adbyvalisia na minułym tydni, u ich ahułam udzielničała 20 čałaviek, a vy viedajecie, jak heta ciažka sabrać u adnym miescy ŭ peŭny čas takuju kolkaść ludziej. Zdymki pieranosili try razy. Madeli — ludzi zaniatyja. I voś kab nie zryvać zdymki ŭ čaćviorty raz z-za adsutnaści madeli, joj zhadziłasia pabyć naša markietołah Natalla. Natalla navat u fotasiesii nikoli nie ŭdzielničała. Ja heta kažu da taho, što siońnia madellu, jakaja rekłamuje pradukcyju «Miłavicy», moža być absalutna lubaja žančyna. Pryhažość — jana roznaja», — padkreślivaje Julija Mirharodskaja.
Nie tak daŭno rekłamnym tvaram «Miłavicy» stała madel plus-sajz Kryścina Krysanava.
«Kryścina źniałasia ŭ kalendary «Miłavicy» na 2019 hod i praciahvaje aktyŭna z nami supracoŭničać, udzielničaje ŭ zdymkach i pakazach. Viedajecie, vielmi składana było znajści madel z pamieram 48—52, jakaja b pahadziłasia na publicy demanstravać nižniuju bializnu. Tamu «Miłavica» — heta bializna dla roznych, ale ŭpeŭnienych u sabie žančyn», — adkazała Julija Mirharodskaja.
Ciapier čytajuć
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama9
Kamientary