Čytač «Našaj Nivy» Jaŭhien Małachoŭski raskazaŭ adrazu pra dźvie amal anałahičnyja historyi, jakija adbylisia ź im pry pierasiačeńni rasijska-finskaj i narviežska-rasijskaj hranic.
Jaŭhien Małachoŭski. Fota «Ukantakcie»
«U hetyja krainy ja jechaŭ na mašynie. Ciažkaści ŭźnikli na hranicy Rasija — Finlandyja, prapuskny punkt Viartsila z boku RF. Padčas pierasiačeńnia hranicy pahraničnica doŭha praviarała pašpart. Sprava ŭ tym, što ja byŭ u Hruzii za apošnija hady niekalki razoŭ, byŭ i va Ukrainie», — kaža Jaŭhien.
«Dalej jana pačała cikavicca, a ź jakimi heta metami ja naviedvaŭ Hruziju i Ukrainu? A dalej vydała prykładna takoje: «kab paźbiehnuć prablem na rasijskaj hranicy, vam treba admovicca ad naviedvańnia Hruzii i Ukrainy».
Paśla hetaha mnie paviedamili, što maja mašyna «vyklikaje padazreńni» i što jana budzie pravierana. U vyniku ja pravioŭ u boksie bolš za 2 hadziny, mašynu pieraryli całkam, pravieryli ŭsie asabistyja rečy, zaleźli navat u trusy i bankaŭskija kartki», — dadaŭ Jaŭhien.
Taksama jon śćviardžaje, što rasijskija pahraničniki ŭčynili drobnuju škodu i zalili pašpart farbaj.
Plamy, jak śćviardžaje Jaŭhien, źjavilisia paśla taho, jak rasijskija pahraničniki viarnuli pašpart. «Heta nie vialikaja biada, ale takoje pieršy raz. Patłumačyli ŭsio «vypadkovaściu», — kaža jon.
Prykładna takaja ž historyja z dahladam pavyšanaj pilnaści adbyłasia i na narviežska-rasijskaj hranicy.
«Dapytvalisia, što ja rabiŭ va Ukrainie i Hruzii, maje adkazy supracoŭnik adrazu ž pieradavaŭ pa racyi. Znoŭ raspranuli da trusoŭ», — reziumavaŭ jon.
«Naša Niva» adrasavała pytańnie ŭ Pahraničnaje ŭpraŭleńnie FSB pa Respublicy Karelija, dzie adbylisia hetyja situacyi.
«Heta pryvatnyja vypadki ŭ ramkach praviadzieńnia dahladu i pašpartnaha kantrolu. Biełarusy pierasiakajuć hranicu niezaležna ad taho, štampy jakich krain stajać u pašparcie. Hałoŭnaje — kab dakumienty byli ŭ paradku, i čałaviek nie byŭ u vyšuku i nie mieŭ zabarony na vyjezd», — patłumačyli tam.