Navukoŭcy znajšli sposab vyjaŭlać chvarobu Alchiejmiera pa analizie kryvi

Daśledčyki vyśvietlili, što kali peŭny ŭzrovień amiłoida ŭ kryvi spałučajecca z dvuma inšymi asnoŭnymi faktarami ryzyki, chvarobu možna dyjahnastavać z dakładnaściu 94%.

Amierykanskija navukoŭcy znajšli novy sposab raspaznavańnia chvaroby Alchiejmiera zadoŭha da pieršych simptomaŭ. Ciapier vyjavić rannija źmieny, jakija adbyvajucca ŭ arhaniźmie čałavieka, dapamoža prosty analiz kryvi, piša TASS sa spasyłkaj na The Telegraph.

Śpiecyjalisty ź Miedycynskaj škoły Vašynhtonskaha ŭniviersiteta ŭ Sent-Łuisie praviali daśledavańnie, u jakim uziali ŭdzieł bolš za 150 čałaviek va ŭzroście, starejšym za 50 hadoŭ. Pry hetym tolki 10 dobraachvotnikaŭ mieli peŭnyja prablemy sa zdaroŭjem. Dakładnyja pryčyny chvaroby Alchiejmiera da hetaha času całkam nieviadomyja. Adnak navukoŭcy nahadvajuć, što prykładna za 20 hadoŭ da ŭźniknieńnia pieršych prykmiet zachvorvańnia, takich jak błytanaść śviadomaści i zaciamnieńnie pamiaci, u hałaŭnym mozhu nazapašvajucca niebiaśpiečnyja beta-amiłoidnyja białki. Mienavita jany i ličacca hałoŭnaj krynicaj raźvićcia chvaroby.

Usie pacyjenty dali miedykam jak minimum adzin ŭzor kryvi i prajšli pazitronna-emisijnuju tamahrafiju (PET) mozhu. Dadzieny mietad, jak śćviardžajuć śpiecyjalisty, dazvalaje na malekularnym i kletkavym uzroŭniach acanić intensiŭnaść abmienu rečyvaŭ u tkankach arhanizmu. Ekśpierty vyvučyli analizy kryvi paddoślednych i vyjavili, što, kali peŭny ŭzrovień amiłoida ŭ kryvi spałučajecca z dvuma inšymi asnoŭnymi faktarami ryzyki chvaroby Alchiejmiera — uzrost i najaŭnaść hienietyčnaha varyjantu APOE4 — dadzienaje zachvorvańnie možna dyjahnastavać zahadzia. Pryčym dakładnaść testu składaje amal 94%.

«Ciapier my vykarystoŭvajem mietady skanavańnia hałaŭnoha mozhu dla vyjaŭleńnia prykmiet chvaroby Alchiejmiera, adnak heta vielmi doraha i zajmaje šmat času», - padkreśliŭ prafiesar Rendał Biejtman ź Miedycynskaj škoły Vašynhtonskaha ŭniviersiteta. «Z dapamohaj analizu kryvi my patencyjna možam pravodzić ahlad tysiačy ludziej u miesiac. Heta aznačaje, što možna bolš efiektyŭna pryciahvać udzielnikaŭ da kliničnych vyprabavańniaŭ, što dazvolić nam chutčej znajści sposaby lačeńnia zachvorvańnia, a taksama palehčyć čałaviečyja pakuty», - skazaŭ jon.

Chvaroba Alchiejmiera źjaŭlajecca najbolš raspaŭsiudžanaj formaj demiencyi. Siaredniaja praciahłaść žyćcia chvoraha paśla dyjahnastavańnia zachvorvańnia zaležyć ad jaho vieku, ale, jak praviła, składaje ad 7 da 10 hadoŭ. Pavodle Suśvietnaj arhanizacyi achovy zdaroŭja (SAAZ), kala 50 młn stałych ludziej u śviecie chvoryja na demiencyju, ź ich dźvie traciny pakutuje na chvarobu Alchiejmiera. Ich kolkaść z kožnym hodam raście i, pavodle niekatorych prahnozaŭ, da 2050 hoda moža pieravysić 130 młn čałaviek.

• 0
• 0
• 0
• 0
• 0
• 0
• 0
• 0