«Z 7 bałami iduć u ahraryi. A potym karovy ŭ hnai» — eks-čynoŭnik tłumačyć, što z adukacyjaj nie tak
Baćki i abituryjenty łoviać svaje proźviščy ŭ śpisach tych, chto pastupiŭ u VNU. A kiraŭnik prajektu «Narodny padručnik» repetytar Siarhiej Alšeŭski litaralna palcam ukazvaje Minadukacyi na prablemy ŭ jaje sfery. Jon zdaŭ CT «metadam tyku» i, nia viedajučy kitajskaj movy, nabraŭ pa joj 34 bały. Sudzicca ź Minadukacyi z pryčyny pierapoŭnienaści himnazičnych klasaŭ. I rviecca ŭ parlament.
Na finišy ŭstupnaj kampanii Svaboda spytałasia ŭ Alšeŭskaha, što jon pra ŭsio heta dumaje.
Siarhiej Alšeŭski skončyŭ fakultet matematyki i infarmatyki i aśpiranturu Haradzienskaha dziaržaŭnaha ŭniversytetu. Vykładaŭ u škole, PTV, universytecie, pracavaŭ u Hałoŭnym infarmacyjna-analityčnym centry Ministerstva adukacyi.
«Luby čałaviek z vulicy moža pryjści na CT i «natykać» na prachadny bał»
Asabista ja «natykaŭ» pa rasiejskaj movie na 25 bałaŭ. U častcy A adkazy staviŭ u takoj paśladoŭnaści: 1, 2, 3, 4, 5, 1, 2, 3, 4, 5. U «B» fantaziravaŭ.
Heta, darečy, nižejšaja planka navat na specyjalnaści, dzie mova źjaŭlajecca profilnym pradmietam. Mahu prajści na słavianskuju filalohiju na fiłfak BDU, kudy abviaścili dadatkovy nabor.
Na matematycy ja staviŭ 2, 3, 2, 3, 2, 3, 5. Praŭda, mnie jak matematyku było maralna ciažka i kryŭdna ŭ pieršym varyjancie stavić niapravilny adkaz.
U vyniku nabraŭ 49 bałaŭ, a siaredni bał pa krainie — 50. Mahu pastupić na specyjalnaść «achova pracy» ŭ Baranavicki ŭniversytet.
Na kitajskaj movie ja nabraŭ 34 bały. Ja što — hramatny ŭ kitajskaj? U častcy «A» staviŭ druhi adkaz, u «B» uhadvaŭ hierohlify. Darečy, byŭ jašče adzin eksperymentatar, jaki nia viedaje kitajskaj movy, i jon metadam tyku nabraŭ bolš za 40.
Nu nie pracuje hetaja systema! Raniej 40% abituryjentaŭ nie nabirali parohavaha bału pa matematycy. Navošta było mianiać raniejšuju systemu, jakaja pakazvała abjektyŭnuju karcinu? Navošta było mianiać instrument, jaki pracuje?
Vy chacieli b, kab vas lačyŭ słaby ŭrač? Vy chacieli b, kab vaša dzicia vučyŭ taki vykładčyk, jaki prosta «natykaŭ» i pastupiŭ vučycca?
«Kali vučyŭsia na 1, možaš iści ŭ ahraryi, kali na 2 i 3 — u vajskovuju akademiju»
Było b našmat pravilniej ustalavać planki pastupleńnia na specyjalnaści. Umoŭna kažučy, kab pastupać na pedahahičnyja specyjalnaści — patrebna nia mieniej za 300 bałaŭ. Na prahramnaje zabieśpiačeńnie (heta elitnyja specyjalnaści) — niachaj budzie 350.
A jakija ciapier nižnija planki ŭ ahrarnyja VNU? U Horackaj sielhasakademii 7 bałaŭ prachadny!!!
Pieraviadziem heta ŭ 10-balnuju systemu: 7 bałaŭ sa 100 mahčymych — atrymlivajecca mienš za adzinku. To bok, kali ty vučyŭsia na adzinki, možaš iści ŭ ahraryi. A potym niechta kryŭdzicca, što karovy ŭ hnai. A ŭ čym buduć karovy, kali na ahrarnyja specyjalnaści takija prachadnyja bały?
Analahična — na vajskovyja specyjalnaści: 101, 107, 121 bał.
My kryčym pra ŭźniaćcie prestyžu vojska. Ale na vajskovyja specyjalnaści možna pastupić z uzroŭniem savieckaha navat nia troječnika, a dvoječnika. Pra jakuju vajskovuju elitu my kažam?
«My hadujem dziaciej, tracimsia na ichnuju adukacyju i pastaŭlajem na ekspart»
My padličyli, što ŭ 2018 hodzie bolš za 3 tysiačy biełaruskich abituryjentaŭ źjechali vučycca za miažu. Jak praviła, heta našy lepšyja chłopcy i dziaŭčaty. Ja pierakanany, što jak minimum 80% chłopcaŭ da 27 hadoŭ u siłu apošniaha «zakonu ab adterminoŭkach» nia viernucca i buduć aktyŭna ŭciahnutyja ŭ ekanomiku inšaj krainy.
U nas budzie dva šlachi: albo Minadukacyi apamiatajecca i budzie niešta rabić, albo našych dziaciej padzielać ministerstvy adukacyi inšych krainaŭ.
Susiednija krainy nasamreč rady davać biudžetnyja miescy našym studentam, płacić stypendyi, kab jany vučylisia za miažoj. A my stvarajem usie ŭmovy, kab najlepšyja dzieci źjaždžali.
Voś i rasiejcy chočuć pavialičyć kolkaść biudžetnych miescaŭ dla biełarusaŭ.
Z 0 da 18 hadoŭ — heta samy «darahi» peryjad, tak by mović, u padrychtoŭcy kadraŭ: pryščepki, medycyna, adukacyja. Kali paličyć, u hod na adno dzicia dziaržava tracić 1400 rubloŭ na adukacyju (700 dalaraŭ), za 11 hod vyjdzie 7700 dalaraŭ. Na achovu zdaroŭja — prykładna stolki ž. Vychodzić tysiač 15 dalaraŭ, a jašče ž daškolnaja adukacyja.
To bok, kala 20 tysiač dalaraŭ dziaržava vydatkoŭvaje na adno dzicia. Pamnažajem heta na 3 tysiačy, jakija źjechali letaś. I z hodu ŭ hod tendencyja — da pavieličeńnia kolkaści tych, chto źjechaŭ vučycca za miažu.
To bok my hadujem dziaciej, tracimsia na ich adukacyju i raźvićcio, i hetych dziaciej pastaŭlajem na ekspart, nie atrymlivajučy nijakaj vyhady.
«U systemie adukacyi nie chapaje praŭdy, prazrystaści, abjektyŭnaści»
Samy vialiki «abmiežavalnik» u ludziej, jakija pracujuć u systemie adukacyi, — jany bajacca zrabić štości nia tak, bajacca pamylicca. Bo značna praściej ničoha nie rabić: za toje, što ty ničoha nia robiš, ciabie mocna nie pakarajuć. A voś kali ty zrabiŭ što nia tak, litaści nia budzie.
Usie stupieni ja prajšoŭ, i čym nižej ja byŭ, tym bolš było mahčymaściaŭ štości rabić i mianiać. Ale mnie zdavałasia, što čym vyšej ty ŭźlaciš, tym bolš ty zmožaš karysnaha zrabić. Nasamreč akazałasia, čym vyšej, tym mienš ty možaš zrabić zpryčyny šmatlikich uzhadnieńniaŭ, biurakratyi.
«Znoŭ idu na vybary. Nia treba maŭčać, treba metadyčna pakazvać, što ŭ krainie nia tak»
Znoŭ idu na vybary. Heta treciaja sproba. U minułaj parlamenckaj kampanii ŭ Dziatłaŭskaj akruzie maim kankurentam byŭ pieršy namieśnik ministra ŭnutranych spraŭ Valancin Michnievič. Mianie źniali z techničnych pryčyn. U tym liku tamu, što maje byłyja vykładčyki admovilisia ad podpisaŭ, jakija za mianie pastavili. Było baluča i kryŭdna. Ale ja atrymaŭ dośvied i šmat čamu navučyŭsia.
Na miascovych vybarach ja dajšoŭ da etapu hałasavańnia, hałasy raźmierkavalisia 60 na 40. U mianie byŭ apanent, jakoha raptoŭna pierakinuli ź inšaha ŭčastku i jaki išoŭ ad pracoŭnaha kalektyvu. I heta byŭ kiraŭnik arhanizacyi, dzie pracuje moj baćka. Mnie dali zrazumieć: «Chłopčyk, supakojsia».
Idu razam z hramadzkim abjadnańniem «Havary praŭdu». Kamanda ŭ mianie jość, jość dośvied dźviuch vybarčych kampanij.
Z akruhaj vyznačyŭsia: heta znoŭ maja małaja radzima — Dziatłaŭski rajon.
Ja pačuŭ šmat mierkavańniaŭ, što vybaraŭ niama i što ja, kali nie zdymusia, budu padtrymlivać režym. Ale ŭ mianie svoj pohlad: treba iści i treba sprabavać rabić. Kali ničoha nie rabić, nie dziaŭbści hetuju haru prablem, ničoha nie pamianiajecca.
Narodu ŭsio abrydła, narod abyjakavy. Pačynać treba ź siabie. Možna adsiedziecca, a možna dziejničać. Chtości łapki skłaŭ, a chtości ŭ zbanie z małakom źbivaje śmiatanu i masła.
Nia treba maŭčać, treba metadyčna pakazvać, što ŭ krainie nia tak. Voś ja zaraz sudžusia ź Ministerstvam adukacyi nakont pierapoŭnienaści klasaŭ.
Vykarystoŭvaju zvyčajny pryjom «social media»: praviali Eŭrapiejskija hulni, znajšli 270 miljonaŭ dalaraŭ — značyć, jość hrošy ŭ krainie. Pabudujcie škoły, u niekatorych himnazičnych klasach pa 36 vučniaŭ pry normie 20. 97% staličnych himnazij pierapoŭnienyja.
Kamientary