Pres-sakratar Ministerstva zamiežnych spravaŭ vystupiŭ z krytykaj vykazvańniaŭ pasła Rasii ŭ Minsku Alaksandra Surykava na pres-kanfierencyi 6 lutaha.
Uviečary ŭ piatnicu MZS raspaŭsiudziła «Adkaz pres-sakratara MZS Andreja Papova na pytańnie pradstaŭnikoŭ ŚMI ŭ suviazi ź niekatorymi vykazvańniami pasła Rasii ŭ Biełarusi A.Surykava padčas pres-kanfierencyi ŭ Minsku 6 lutaha 2009 hoda».Dypłamat, u pryvatnaści, zajaviŭ, što ŭ suviazi z padpisanym u Maskvie 4 lutaha dakumientam ab stvareńni Kalektyŭnych sił apieratyŭnaha razhortvańnia (KSAR) ADKB treba «razabracca, zapatrabujecca ŭdzieł Biełarusi za miažoj ci nie».
«Pa-pieršaje, adrazu chaču padkreślić, što ŭžo dakładna nie pasły inšych dziaržaŭ buduć «raźbiracca» ŭ adpaviednych niuansach biełaruskaha zakanadaŭstva, — zajaviŭ A.Papoŭ.— Pa-druhoje, jość zakon našaj krainy na hetuju temu, i jon budzie niaŭchilna vykonvacca. Dyj zhadany vami dakumient ADKB pa KSAR, darečy, pakul nie maje statusu mižnarodnaha pahadnieńnia. Akramia taho, treba mieć na ŭvazie, što rašeńni ab zadziejničańni KSAR buduć prymacca tolki kiraŭnikami dziaržaŭ ADKB i tolki na asnovie kansiensusu.
Tak što nie treba pasłu zabiahać napierad.Taksama jak nie treba jamu śpiašacca apiaredžvać vyniki vykanańnia daručeńniaŭ VDS i pa takich temach biełaruska-rasijskaha ŭzajemadziejańnia, jak udzieł Rasii ŭ budaŭnictvie biełaruskaj AES i mahčymaje budaŭnictva hazapravoda «Jamał — Jeŭropa — 2».
«Na pasiadžeńni VDS u Maskvie lidery dźviuch krain daručyli adpaviednym viedamstvam našych dziaržaŭ jašče raz uvažliva ŭniknuć u hetyja temy i dadatkova ŭnieści na razhlad prezidentaŭ dapracavanyja kankretnyja prapanovy. Tak što davajcie, napeŭna, jak minimum dačakajemsia vynikaŭ vykanańnia daručeńniaŭ dvuch prezidentaŭ», — zajaviŭ pradstaŭnik biełaruskaha źniešniepalityčnaha viedamstva.
5 lutaha A.Papoŭ na bryfinhu ŭ MZS padkreśliŭ, što biełaruskija vajennasłužačyja ŭ vajennych dziejańniach za miežami Biełarusi nie ŭdzielničali i nie buduć udzielničać — heta zabaroniena ajčynnym zakanadaŭstvam.
Na pres-kanfierencyi 6 lutaha A.Surykaŭ zaznačyŭ, što «pa praktycy prymianieńnia miždziaržaŭnyja pahadnieńni i dahavory vyšej pa statusie nacyjanalnaha zakanadaŭstva adnoj krainy».
Pasoł taksama zajaviŭ, što finansavańnie budaŭnictva biełaruskaj AES budzie vieścisia za košt kredytaŭ Rasii, jakaja «pojdzie na maksimalna spryjalnyja ŭmovy finansavańnia pa pracentnych staŭkach i pa terminach viartańnia». Dypłamat nahadaŭ, što pamiž biełaruskim uradam i «Rasatamam» padpisany pratakoł, zhodna ź jakim u pieršym kvartale 2009 hoda budzie zaklučana mižuradavaje pahadnieńnie ab mirnym vykarystańni atamnaj enierhii pamiž dźviuma kainami, što papiaredničaje budaŭnictvu AES. Paśla hetaha płanujecca padpisać «kankretnaje pahadnieńnie ab kankretnym budaŭnictvie AES».
A.Surykaŭ paviedamiŭ, što Rasija nie pačnie budaŭnictva hazapravoda «Jamał — Jeŭropa — 2» pa terytoryi Biełarusi da zaviaršeńnia budaŭnictva hazapravodaŭ «Paŭnočny patok» i «Paŭdniovy patok». Pavodle jaho słoŭ, luby pastaŭščyk, vytvorca enierharesursaŭ «imkniecca adyjści ad tranzitnych dziaržaŭ». «Heta narmalnaja suśvietnaja praktyka, kab nie zaležać ad hetaj dziaržavy ŭ stresavych situacyjach», — zaznačyŭ pasoł, zajaviŭšy, što «pytańnie ab budaŭnictvie «Jamał — Jeŭropa — 2» nie adchilena, ale adkładziena na prapracoŭku».
Łukašenka ŭpieršyniu źjaviŭsia na publicy razam z mamaj Koli3
Kamientary